Connect with us

Компании

Висок раст на профитот и силни перформанси во сите сегменти – Групација Триглав на крајот на првиот квартал проценува дека ќе ги постигне годишните насоки за добивката

Објавено

пред 8 месеци

на

Групација Триглав, во Q1 2024-та година ефикасно го надмина недостатокот на премија за дополнително здравствено осигурување во Словенија. Групацијата значително го зголеми деловниот обем на другите сегменти, особено на сегментот неживот (раст од 12%), a постигна раст и на пазарите во регионот Адриа (раст од 14%) и поширокото меѓународно опкружување (раст од 19%), воедно одржувајќи ги својата финансиска стабилност и силната капитализација. Заработката на Групацијата пред оданочување изнесува 43,3 милиони евра (раст од 153%), а нето добивката изнесува 36,6 милиони евра (раст од 154%). Имајќи ги предвид очекуваните деловни услови за остатокот од годината, на крајот на првиот квартал Групацијата проценува дека ќе го оствари планираниот годишен резултат. Управниот и Надзорниот одбор предложија на овогодинешното редовно Собрание на акционери, што ќе се одржи на 4-ти јуни, 2024-та година, да се одобри исплата на дивиденда од 1,75 евра бруто по акција, што претставува дивиденден принос од 5% по тековната цена на акцијата.

Финансиски индикатори за Q1, 2024-та година

Вкупниот деловен обем на Групацијата во Q1 2024-та година изнесува 488,7 милиони евра, слично на истиот период минатата година. Кварталната добивка на Групацијата пред оданочување изнесува 43,3 милиони евра (Q1 2023-та: 17,1 милиони евра, индекс 253), а нето добивката на Групацијата изнесува 36,6 милиони евра (Q1 2023-та: 14,4 милиони евра, индекс 254). Заваровалница Триглав, матичната компанија на Групацијата, оствари добивка пред оданочување од 29,4 милиони евра (Q1 2023-та: 8,8 милиони евра, индекс 335) и нето добивка од 24,9 милиони евра (Q1 2023-та: 7,3 милиони евра, индекс 341).

Комбинираниот количник за сегментите на неживотно и здравствено осигурување, што ја покажува профитабилноста на овие два сегмента, изнесуваше поволни 87,9% (11,0 процентни поени помалку споредено со истиот период минатата година). Новата деловна маржа на сегментот на животното осигурување изнесуваше 14,9%, што е раст од 3,5 процентни поени во споредба со првиот квартал минатата година.

Андреј Слапар, претседател на Управниот одбор на Заваровалница Триглав, изјави: „Направивме многу ветувачки почеток оваа година, со забележително подобрување на резултатите на Групацијата во однос на минатата година. Врз основа на резултатите од крајот на првиот квартал, проценуваме дека ќе го постигнеме нашиот планиран годишен резултат, земајќи ги предвид очекуваните деловни услови за остатокот од годината. Групацијата Триглав во Q1, 2024-та година во голема мера го надмина недостатокот на премија за дополнително здравствено осигурување во Словенија, која што во првиот квартал од 2023-та година изнесуваше 11% од вкупната бруто полисирана премија, преку раст на премиите во другите класи на осигурување, како во регионот, така и на меѓународно ниво. Нашето работење во првиот квартал од 2024-та година беше под влијание на помалку интензивни штетни настани, што имаше позитивно влијание. Накратко, работевме добро во сите сегменти на двете дејности – осигурување и управување со средства – за што сакам да им се заблагодарам и на сите вработени во Групацијата Триглав“.

ФИНАНСИСКИ РЕЗУЛТАТИ ЗА Q1 2024-та ГОДИНА

Групација Триглав е финансиски стабилна и соодветно ликвидна со силна капитална основа. Вкупниот биланс на состојба на Групацијата се зголеми на 4,2 милијарди евра (индекс 102) во однос на 31-ви декември, 2023-та година, додека вкупниот капитал изнесува 929,8 милиони евра (индекс 104).

Вкупниот деловен обем на Групацијата достигна 488,7 милиони евра (индекс 99), а бруто полисираната премија, која сочинува 92% од вкупниот деловен обем, изнесува 448,7 милиони евра (индекс 99). Поради укинувањето на дополнителното здравствено осигурување, на словенечкиот пазар има намалување на полисираната премија за 10% во однос на истиот период минатата година, додека на меѓународниот пазар и во регионот Адриа е забележан раст од 19% и 12% респективно. Во однос на географската структура на полисираната премија, Групацијата обезбеди 58,6% од вкупната полисирана премија на осигурителниот пазар на Словенија (Q1 2023-та: 64,7%) и 19,9% на останатите пазари во регионот Адриа (Q1 2023-та: 17,5%), додека учеството на меѓународниот пазар за осигурување и реосигурување се зголеми за 3,7 процентни поени на 21,5% на годишно ниво.

Кварталната добивка на Групацијата пред оданочување изнесува 43,3 милиони евра (Q1 2023-та: 17,1 милиони евра). Најголемиот дел од нив, 38,3 милиони евра, се генерирани од осигурителната дејност (Q1 2023-та: 7,4 милиони евра), со висок раст во сите три сегменти, односно неживот, живот и здравје. Нето инвестицискиот резултат во извештајниот период достигна 5,2 милиони евра. На споредливиот резултат минатата година (11,3 милиони евра) позитивно влијаеше промената на резервациите за неостварување на гарантираниот принос (5,5 милиони евра), додека годинава немаше значително влијание (0,4 милиони евра). Урош Иванц, член на Управниот одбор на Заваровалница Триглав, објасни: „Инвестицискиот дел од нашиот бизнис покажа силни перформанси во првиот квартал, првенствено поттикнат од растот на приходите од камати. Во сегментот на управување со средства, значително ги зголемивме средствата под управувањето со взаемните и пензиските фондови, како и дискреционите мандатни средства врз основа на нето-приливите и ефектите на пазарот на капитал, кои што обезбедија добри резултати“.

Вкупните средства под управување на Групацијата на 31-ви март, 2024-та година изнесуваат 5.162,7 милиони евра, што е за 6% повеќе во однос на 31-ви декември, 2023-та година. Од нив, 3.508,8 милиони евра (индекс 103 во однос на крајот на 2023-та година) се однесуваа на сопствени средства и средства кај кои што осигуреникот го презема инвестицискиот ризик, а со кои што компаниите на Групацијата управуваа. Структурата на ова портфолио е споредлива со таа на 31-ви декември, 2023-та година, при што најголемиот дел (52,8%) опфаќа обврзници инвестирани на развиени пазари, од кои што повеќето имаат висок кредитен рејтинг. Одржливите инвестиции со фиксни приходи достигнаа 267,4 милиони евра, што е за 2% повеќе во однос на 31-ви декември, 2023-та година, а нивното учество во вкупното портфолио на обврзници порасна на 11,3% (31.12.2023: 11,1%). Групацијата, исто така, управува со средства во заеднички и пензиски фондови, како и со дискрециони мандатни средства под индивидуално управување во износ од 1.542,6 милиони евра (индекс 115).

Годишната стапка на поврат на инвестициите на Групацијата (без средства кај кои што осигуреникот го презема инвестицискиот ризик) изнесуваше 2%, што е исто како и минатата година.

Останатите сеопфатни приходи изнесуваат 2,1 милиони евра (Q1 2023-та: 7,6 милиони евра). Урош Иванц, член на Управниот одбор на Заваровалница Триглав, објасни: „Нема значајни промени во Q1, 2024-та година во врска со ревалоризацијата на финансиските инструменти и обврските за осигурување. Водиме грижа времетраењето на средствата и обврските да е соодветно усогласено, што резултира со релативно ниско нето влијание врз сеопфатната добивка“.

Перформанси по сегменти во Q1, 2024-та година

Сегмент Неживот: Вкупниот деловен обем на сегментот се зголеми за 12% на 397,5 милиони евра. Приходите од осигурување пораснаа со иста стапка на 260,5 милиони евра, а нивниот раст произлегува од зголемувањето на обемот на осигурување, влијанието на минатите зголемувања на стапките на премиите врз зголемувањето на премијата и поголем обем на продажба на осигурување врз основа на принципот на слободен проток на услуги (FOS зделки). Настанатите штети се намалија за 6% на 125,2 милиони евра на годишно ниво, додека трошоците за прибава и административните трошоци, вклучувајќи ги и трошоците, кои што не се припишуваат, пораснаа за 2% на 65,0 милиони евра. Комбинираниот количник на сегментот неживот изнесува поволни 89,5% (Q1 2023-та: 98,8%). Кварталната добивка пред оданочување изнесува 28,5 милиони евра (Q1 2023-та: 7,1 милиони евра).

Сегмент Живот: Вкупниот деловен обем на овој сегмент се зголеми за 5% на 59,6 милиони евра. Профитабилноста на новите бизниси достигна 14,9%, што е раст од 3,5 процентни поени на годишно ниво. Маржата за договорни услуги порасна за еден процентен поен на 224,7 милиони евра, додека учеството на маржата за договорни услуги за нови договори во вкупната маржа за договорни услуги се зголеми за 0,6 процентни поени на 5,0%. Кварталната добивка пред оданочување изнесува 6,1 милиони евра (Q1, 2023-та: 3,5 милиони евра).

Сегмент Здравје: По укинувањето на дополнителното здравствено осигурување во Словенија, вкупниот обем на работа во Q1, 2024-та година се намали за 90% на годишно ниво на 5,0 милиони евра. Кварталната добивка пред оданочување беше позитивна и изнесува 4,2 милиони евра, главно поради влијанието на намалувањето на резервациите, како последица на укинувањето на дополнителното здравствено осигурување.

Управување со средства: Вкупниот обем на деловно работење изнесува 26,6 милиони евра (индекс 92); приходите од управување со средства (приходи од надоместоци) се зголемени за 16% на 11,2 милиони евра. Кварталната добивка пред оданочување изнесува 4,5 милиони евра, со намалување од 32% на годишно ниво, пред сѐ како резултат на ефектот од еднократните настани, кои што позитивно влијаеа на добивката во претходната година.

ДРУГИ ИНДИКАТОРИ

Дивиденда и редовно собрание на акционери. Управниот и Надзорниот одбор НА Заваровалница Триглав предложија овогодинешното Собрание на акционери, кое што ќе се одржи на 4-ти јуни 2024-та година, да одобри исплата на дивиденда од 1,75 евра бруто по акција, или вкупно 39,8 милиони евра, што претставува дивиденден принос од 5% на моменталната цена на акцијата. Компанијата има за цел да ја спроведува својата политика за дивиденда доследно, а со тоа да ги исполни очекувањата на акционерите да биде стабилна, сигурна и профитабилна долгорочна инвестиција.

Сегмент Здравје. Во тек е процесот на спојување на Триглав, Здравствена заваровалница со Заваровалница Триглав, матичната компанија на Групација Триглав. Спојувањето ќе го поедностави и оптимизира работењето на Групацијата во здравствениот сегмент на словенечкиот пазар по укинувањето на дополнителното здравствено осигурување.

Слични Теми:

Компании

MINT Fintech Group: Осум години иновации и револуција во финансискиот сектор

Објавено

пред 1 месец

на

MINT Fintech Group, лидер во финтек индустријата во Македонија, вчера го одбележа својот 8-годишен јубилеј со свечен настан кој привлече истакнати претставници од деловниот свет и финансискиот сектор. Централна тема на вечерта беа ребрендирањето на компанијата и премиерата на нејзината иновативна мобилна апликација.

Новата апликација на MINT Fintech Group претставува интегрирано решение кое обединува клучни финансиски услуги – плаќања, осигурување, програми за лојалност, туристички услуги и менувачки курсеви – сè на едно место. Со современ дизајн и едноставност, апликацијата обезбедува врвно корисничко искуство и високо ниво на транспарентност.

Генералниот директор на MINT Fintech Group, Никола Јошевски, истакна дека компанијата влегува во нова ера со овој значаен проект: „Нашето ребрендирање и новата апликација не се само технологија – тие се визија за иднината на финансиските услуги во Македонија. Со овој чекор, ние создаваме нова платформа која ќе ги задоволи и надмине очекувањата на нашите клиенти, нудејќи им сигурност, брзина и лесен пристап до сите потребни услуги.“

На настанот, покрај промоцијата на апликацијата, беше претставена и изложбата „Патот на парите, од праисторијата до денес“, која ја визуализираше еволуцијата на финансиските услуги низ времето – од првите монети до денешните дигитални решенија.

За MINT Fintech Group

Од своето основање пред осум години, MINT Fintech Group прерасна во симбол на иновации и прогрес во финансискиот сектор во Македонија. Со тим од стручни професионалци и напредни технолошки решенија, компанијата продолжува да воведува стандарди кои го обликуваат пазарот и обезбедуваат иднина ориентирана кон корисниците.

Продолжи со читање

Бизнис

Бобан Томески именуван за нов извршен член на Одборот на директори на „Кроација осигурување – Живот“ АД Скопје

Објавено

пред 2 месеци

на

Во согласност со Законот за хартии од вредност , а по одржаното Собрание на акционери на Друштвото, КРОАЦИА ОСИГУРУВАЊЕ АД – Друштво за осигурување на живот Скопје преку соопштение на Македонска берза ја информира јавноста дека на г-ѓа Маја Станковска Костова досегашен извршен член на Одборот на директори и престана функцијата поради поднесена оставка заклучно со 01.12.2024 година.

За нов извршен член на Одборот на директори на КРОАЦИА ОСИГУРУВАЊЕ АД – Друштво за осигурување на живот Скопје е именуван г-дин Бобан Томески, почнувајќи од 01.12.2024 година.

„Управувањето со Кроациа осигурување – Живот, друштво кое е лидер на пазарот за осигурување и најстара осигурителна компанија за животно осигурување во Македонија, е голема привилегија, но и одговорност за водечката личност. Во текот на петгодишниот мандат, Маја Станковска Костова даде значаен придонес за развојот на Друштвото, за подобрување на услугите кон клиентите, креирање прилагодени понуди на производи како и зголемување на профитабилноста. Ѝ благодариме за досегашниот ангажман и за сето она што го постигна, и ѝ посакуваме успешна кариера надвор од компанијата. На Бобан Томески му посакуваме многу успех на новата функцијата – извршен член на Одборот на директори и во водењето на друштвото кон нови деловни достигнувања“ – изјави Марио Батарило, претседател на Одборот на директори на Кроациа осигурување – ЖИВОТ АД Скопје.

Новиот состав на Одборот на директори на КРОАЦИА ОСИГУРУВАЊЕ АД – Друштво за осигурување на живот Скопје е:

  • Марио Батарило – неизвршен член и Претседател на Одборот на директори;
  • Бобан Томески – извршен член на Одборот на директори;
  • Иван Залар – неизвршен член на Одборот на директори;
  • Владимир Стефановски – независен неизвршен член на Одборот на директори.
Продолжи со читање

Банки

Ексклузивната соработка на Триглав Осигурување Живот и ТТК Банка продолжена со нов договор за стратешко партнерство

Објавено

пред 2 месеци

на

Триглав Осигурување Живот АД Скопје и ТТК Банка АД Скопје, на заемно задоволство, ја продолжија заедничката ексклузивна соработка за банкоосигурување со потпишување нов договор за стратешко партнерство.

Благодарение на стратешката соработка што двете компании партнерски ја градат и негуваат од 2019 година, граѓаните имаат можност да добијат кредит со вклучена полиса за осигурување на живот, која обезбедува финансиска сигурност за семејството на кредитобарателот при немил настан. А, како дополнителна придобивка добиваат значително поповолни услови за кредитирање, достапни во која било од 30-те експозитури и филијали на ТТК Банка АД Скопје.

Новиот договор за соработка претставува зацврстување на стратешкото партнерство меѓу ТТК Банка АД Скопје и Триглав Осигурување Живот АД Скопје, како и збогатување на портфолиото финансиски производи на ТТК Банка АД Скопје, којашто ќе им понуди на своите клиенти низа придобивки кои, пред сѐ, обезбедуваат дополнителна финансиска заштита.

Развојот на банкоoсигурувањето претставува стратешка определба за Триглав Осигурување Живот АД Скопје.

„Ни претставува вистинско задоволство што ја продолжуваме успешната и силна соработка со ТТК Банка АД Скопје, соработка што активно ја градевме и ја развиваме како партнери во изминатите 5 години. Соработката со ТТК Банка АД Скопје за нас е од големо значење, а особено бидејќи тоа е Банката што прва ни ја даде својата доверба за партнер во доменот на банкоосигурувањето. Преку развој на иновативни производи и заеднички проекти, ќе продолжиме да ја негуваме соработката и да им нудиме на клиентите финансиски производи што ќе им донесат максимално корисничко задоволство и погодности“, изјави Христина Џамбазовска Анастасов, Генерален директор на Триглав Осигурување Живот АД Скопје.

„Нашето партнерство со Триглав Осигурување Живот АД Скопје обезбедува значајни придобивки за клиентите преку иновативни решенија што ги комбинираат кредитите со полиси за осигурување на живот. Со тоа, нудиме повеќе од финансиски производи –  нудиме сигурност, заштита и поволни услови за сите наши клиенти. Новиот договор е потврда за нашата заедничка визија за унапредување на финансиската стабилност на клиентите и поддршка на најважните животни одлуки. Ќе продолжиме партнерски да создаваме додадена вредност за корисниците и да поставуваме нови стандарди во банкарските и осигурителните услуги, секогаш ставајќи ги клиентите на прво место“, изјави проф. д-р Драгољуб Арсовски, претседател на Управниот одбор на ТТК Банка АД Скопје.

ТТК Банка АД Скопје се издвојува како доверлив партнер на корисниците на кредитни производи коишто вклучуваат животно осигурување, а кои Банката ги нуди со атрактивни фиксни каматни стапки од 5,3% за целиот период на отплата од 10 години за СМАРТ ненаменски потрошувачки кредит, како и 3,7% фиксна каматна стапка во првите 10 години за СУПЕР станбен кредит, односно 4,0% фиксна каматна стапка во првите 3 години за хипотекарен кредит.

Во изминатите години Триглав Осигурување Живот АД Скопје изгради успешна соработки со дури 5 банки во земјата кои имаат лиценца за застапување во осигурување издадена од Агенцијата за застапување во осигурување. Со ова, се издвои на пазарот како осигурителна компанија – лидер во банкоосигурувањето, односно како компанија со најголем број банки соработници и доминантно учество од 45% во вкупната бруто-полисирана премија за осигурување на живот преку банко канал за продажба.

ТТК Банка АД Скопје, со својата широка мрежа од 30 експозитури и над 80 банкомати ширум земјата, е препознатлива како доверлив партнер на граѓаните и деловните субјекти во обезбедување квалитетни финансиски услуги. Преку иновативни производи што ги исполнуваат потребите на клиентите, Банката ја зацврстува својата позиција во банкоосигурувањето, придонесувајќи за поголема достапност на осигурителните производи и на финансиската заштита. И во иднина, ТТК Банка АД Скопје ќе се фокусира на развојот на експертизата во креирање производи коишто директно соодветствуваат на потребите на клиентите и можните ризици, сè со цел да им помогне на клиентите да инвестираат во сопствената иднина.

Продолжи со читање

Популарно