Цените на акциите на компаниите од индексот МБИ 10 на Македонската берза за период од 20 години бележат огромен раст, кој е особено изразен во последните 10 години. Ако во 2004 година купевте акции на Алкалоид, Тутунска банка (сегашна НЛБ), Комерцијална банка, Макпетрол или Гранит, во 2024 година ќе можевте да се прогласите за милионер! Во случајот со компаниите кои добија мнозински сопственик, како НЛБ банка, опција за тогашните акционери била да не ги продадат акциите и да ги чуваат до денес.

Еве што покажуваат бројките.

Акцијата на Комерцијална банка ќе ви донесеше заработка од фантастични 3.226%. На почетокот од 2004 година се продаваше за 2.523 денари, а на почетокот од 2024 година за 14.337 денари.

100 акции од Комерцијална банка во 2004 ќе можевте да ги купите за 252.300 денари, но потоа тие 100 акции ќе станеа 500 затоа што оваа банка во 2005 година направи сток сплит во сооднос 5:1, така што сега ќе имавте 7.168.500 денари.

Одлична заработка ќе имавте ако сте биле или сте станале акционер во Тутунска банка во 2004 година. Растот на цената на оваа акција за 20 години изнесува фантастични 1.675%. Во првиот трговски ден од 2004 година, оваа акција се продавала по цена од 1.676 денари, а на првиот ден на тргување во 2024 година имаше цена од 20.748 денари.

За 100 акции во Тутунска банка во 2004 година ќе сте плателе 167.600 денари и сега ќе сте имале 2.974.800 денари!

Следна по заработка е акцијата на Гранит, која за 20 години бележи раст од 1.141%! Во 2004 година го отворила тргувањето со цена од 95 денари, а во 2024 со цена од 1.179 денари.

За да бидете милионер денес, во 2004 година требало да купите 1.000 акции од Гранит, што ќе ве чинело 95.000 денари, а сега ќе имавте 1.179.000 денари.

Принос од 1.034% за 20 години носи акцијата на УНИбанка (поранешна Балканска банка). На 5 јануари 2004 година се продавала по цена од 500 денари, а на 2 јануари 2024 година по цена од 5.670 денари.

За 200 акции во Балканска банка во 2004 година биле потребни 100.000 денари, инвестиција која денеска ве прави милионер со имот вреден 1.134.000 денари.

Ценовниот раст на акцијата на Алкалоид за 20 години изнесува 921%. Акцијата на најголемата фармацевтска компанија во земјата на почетокот од 2004 година чинела 1.791 денари, а на почетокот од 2024 година вреди 18.284 денари.

За 100 акции од Алкалоид во 2004 година ќе требало да платите 179.100 денари, а после 20 години ќе имавте 1.828.400 денари.

Следна на листата по ценовен раст е акцијата на Стопанска банка АД – Скопје, кој за 20 години изнесува 799%, а исто толкав е и приносот што ќе сте го имале ако сте останале сопственик на акции од оваа банка. Во 2004 година, цената на 5 јануари била 150 денари, а на 2 јануари оваа година изнесуваше 1.348 денари.

Оваа акција можела да ве направи милионер ако во 2004 година сте имале 1.000 акции, кои сега вредат 1.348.000 денари.

Акцијата на Макпетрол за 20 години носи заработка од 432%. Во 2004 година чинела 12.100 денари, а на почетокот од оваа година вреди 64.375 денари.

За 100 акции од Макпетрол во 2004 година требало да платите 1.200.000 денари за после 20 години да имате 6.437.500 денари.

Во оваа конкуренција, најмалку атрактивна е акцијата на Македонија турист, која за 20 години бележи ценовен раст од 377%. На 5 јануари 2004 година се продавала по цена од 1.000 денари, а на 2 јануари 2024 година постигна просечна цена на тргување од 4.774 денари.

Акцијата на Македонија турист ќе ве направела милионер ако во 2004 година сте купеле 250 акции во вредност од 250.000 денари. Сега ќе бевте милионер со инвестиција вредна 1.193.500 денари.

Добро е да се знае дека од сите овие акции на Македонската берза најтргувани се акциите на Комерцијална банка, Алкалоид и на АД Гранит. Помалку се тргуваат акциите на Макпетрол, додека акциите на останатите компании речиси и да не се тргуваат.