Според еден податок на којшто наидов неодамна, децениски студии и истражувања покажуваат дека жените лидери помагаат да се зголеми продуктивноста, да се подобри соработката, да се инспирира организациската посветеност и да се подобри правичноста. И покрај овие придобивки, само 10% од Форчн 500 (Fortune 500) компаниите се предводени од жени. 

Една друга анализа вели дека сите бизниси ќе имаат корист од поголемата еднаквост на жените. Затоа што жените лидери се повеќе трансформативни од мажите лидери. Тие функционираат како пример за нивните подредени. Тие го инспирираат својот тим и поминуваат многу време за да го тренираат својот тим. Многу се грижат за својот личен развој. Жените лидери ја нагласуваат тимската работа и автентичната комуникација како клуч за успехот. Ако појдеме од овие поставки, би сакала да поттикнам и алудирам на една поддршка, на едно зајакнување на процесот за развој на лидерскиот потенцијал на жената, затоа што токму тоа ни треба. Повеќе од потребна ни е трансформација, потребен ни е добар пример, потребна ни е инспирација и пред се’ развој… Во тој контекст, би се осврнала на трите основни принципи за зајакнување на одреден процес, сега гледани низ призмата за зајакнување на лидерскиот потенцијал на жената: 

Јасност во поставените цели и очекувања

Мораме ние како жени да работиме на јасно дефинирање што е тоа што може да се очекува од нас, да внимаваме што ќе поставиме како цел или очекување, а што ќе направиме и како ќе го реализираме тоа. Потребно е пред се’ да направиме анализа колку ѝ е јасно на јавноста која е предноста на една жена лидер. 

Поддршка на процесот и за процесот 

Обезбедување на потребни ресурси, техники, алатки за да успее една жена и овде алудирам на поддржка меѓу жените пред се’. Особено кога се препознава еден искрен пристап, јасно поставена улога и принципиелно извршување на задачите на една жена лидер. Да се запрашаме колку сме организирани по ова прашање, колку практикуваме поддршка за нашите колешки?

Автономност во процесот на носење одлуки

Најважниот фактор за зајакнување на процесот на развој на лидерскиот потенцијал на жената е образованието кое ни ги обезбедува потребните знаење, вештини и алатки да носиме информирани одлуки, да учествуваме во општеството и да ги постигнуваме своите цели. Во овој контекст, поттикнувам размислување за тоа колку ние како жени полагаме внимание на континуирано учење, надоградување на своите вештини, отворање на нови хоризонти..“ 

Со ова обраќање д-р Катерина Бошевска, генерална директорка на ЕОЅ во Македонија и ЕОЅ во Косово ги добредојде гостинките на овогодинешниот настан на АХК мрежата на деловни жени – Зајакнување на женското лидерство (AHK Woman Bussniess Network – Female Empowerment). Поголемото учество на жените на лидерски позиции поттикнува развој и носи просперитет во секое општество. Ова го потврдија 55 учеснички на настанот што се одржа на 6 септември 2023, под мотото „Заедно успешни – ослободување на женскиот лидерски потенцијал“. Настанот го организира АХК Сeверна Македонија, како дел од мрежата на германските стопански комори во странство и Македонско – Германското стопанско здружение заедно со својата премиум членка, ЕОS Матрих ДООЕЛ Скопје која воедно беше и домаќин на овој настан.

На настанот свои обраќања покрај Антје Ванделт, директорка на АХК Северна Македонија, имаа и д-р Катерина Бошевска, генерална директорка на ЕОЅ Матрих С. Македонија и ЕОЅ Матрих Косово, Марија Дуковска – Павловска, генерална директорка на Макстил и Eлена Младеновска – Јеленковиќ, извршна директорка на М6 Едукативен центар. 

„Се залагаме за јакнење на женското лидерство во економијата, воедно градиме и мрежа каде жените од деловниот свет можат да разменат лични искуства, да ги споделат предизвиците со кои се соочуваат на менаџерските позиции, да учат едни од други и да си бидат поддршка. Со споделување на конкретни искуства на успешни жени менаџери сакаме да ги охрабриме и мотивираме идните генерации да се стремат кон успех и лидерски позиции во компаниите“, истакна Антје Ванделт, директорка на АХК Северна Македонија.

Настанот се одржа во просториите на ЕОЅ Матрих во Скопје, а пред присутните претставници на бизнис заедницата се обрати и генералната директорка на компанијата, 

д-р Катерина Бошевска: „Современите општества се темелат на принципот на еднаквост, но сепак, само 10% од компаниите на „Форчн 500” (Fortune 500) се предводени од жени. Затоа треба да работиме да се примени целосно овој принцип и затоа важно е да се работи на зајакнување на женскиот лидерски потенцијал во сите сфери во општеството.“

ЕОЅ Матрих е водечки финансиски инвеститор базиран на напредни технологии, а компанијата одбележа 20 години од своето работење на пазарот. Како членка на ЕОЅ Групацијата, ЕОЅ Матрих има голема меѓународна експертиза и нуди напредни решенија за клиентите, креирајќи можности за економски развој.

АХК мрежата на деловни жени – Зајакнување на женското лидерство (AHK Woman Bussniess Network – Female Empowerment) е платформа за жените менаџери од компаниите членки на Македонско-Германското стопанско здружение.

Како дел од мрежата на стопански комори, АХК Северна Македонија преку своите активности создава цврсти врски помеѓу македонските и германските компании, зајакнувајќи ја економската соработка помеѓу двете земји. Германија е традиционално еден од најважните трговски партнери. Во вториот квартал од 2023 година Германија е втора земја по висината на странските директни инвестиции, кои изнесуваат 56,9 милиони евра.