По првичните загуби на азиските берзи, повеќето главни регионални индекси се во зелено на почетокот на неделата, бидејќи инвеститорите проценуваат какво влијание ќе има најновиот потег на кинеските власти врз забавената економија, а фокусот е и на општите избори во Јапонија , што ќе се одржат кон крајот на неделата, пренесе новинската агенција „Хина“.

Индексот „MSCI“ на азиските берзи околу 6 часа беше во благ пораст за 0,11 проценти, како одраз на претпазливоста на инвеститорите откако индексите на американските берзи пораснаа шеста недела по ред.

Истовремено, јапонскиот Никеи порасна за 0,26%, додека австралиските и шангајските берзански индекси зајакнаа за приближно 0,8 отсто, а берзанскиот индекс на Хонг Конг ослабе за половина процент.

Кинеската централна банка ги намали клучните каматни стапки за 25 базични поени, па сега е 3,1 проценти за заеми до една година и 3,6% за пет години.

Учесниците на пазарот очекуваа ваква одлука, па затоа пазарот остана претпазлив, додека се чекаат натамошни потези и најави од кинеските претставници поврзани со економски стимулации, што може да потрае.

„Можеби ќе треба да почекаме до крајот на октомври или почетокот на ноември за конкретни планови од состанокот на Постојаниот комитет на Националниот народен конгрес“, изјави Чаопинг Жу, стратег за глобален пазар во JP Morgan Asset Management во Шангај. Две недели пред претседателските избори во САД, кај некои финансиски инструменти растат облозите за победа на Доналд Трамп.

Царинската, даночна и имиграциска политика на републиканскиот кандидат се сметаат за инфлаторни, па затоа се негативни за обврзниците, а позитивни за доларот.

Се верува дека Трамп има попозитивен став кон криптовалутите.

„Се чини дека Трамп е во предност во клучните држави во бојното поле, што сугерира дека е прилично добро позициониран да се врати во Белата куќа, и мислам дека пазарите почнаа да го земаат тоа предвид минатата недела со посилните цени на акциите, повисоките приноси, американскиот долар што добро котира и со биткоинот, што е на добар пат за зголемување од 10 проценти во споредба со претходната недела“, изјави Тони Сајкамор, пазарен аналитичар во IG.

Биткоинот моментално е во пораст за 0,5 проценти, на 69,100 долари, а во текот на денешното тргување го достигна највисокото ниво од јули, 69,487 долари.

Најголемата криптовалута во светот минатата недела се зголеми за 9,6 проценти и е во пораст од 8% од почетокот на месецот.

Индексот на доларот, што ги мери перформансите на САД во однос на кошницата од шесте најважни светски валути, стагнира на 103,46 поени, недалеку од највисокото ниво во повеќе од два месеци.

Ова е само одраз на малите флуктуации на курсот на доларот во однос на еврото и јенот.

Еврото утринава се тргува по 1,086 долари, а курсот на доларот е 149,27 евра речиси непроменет во однос на петокот.

Италијанската влада размислува да го зголеми данокот на капитална добивка за инвестиции во биткоин на 42% наместо досегашните 26%, изјави заменик-министерот за економија Маурицио Лео.

Говорејќи на прес-конференција во „Палацо Чиги“, Маурицио Лео го коментираше новиот предлог-закон за буџетот на Италија, кој Советот на министри го одобри.

Заменик-министерот изјави дека данокот за задржување на капиталните добивки од биткоин треба да се зголеми на 42% со цел зголемување на средствата во буџетот.

Италија планира да го отстрани минималниот приход за данок на дигитални услуги

Заменик-министерот за економија Маурицио Лео, исто така, изјави дека предлог-законот ќе го отстрани минималниот услов за приходи за данокот за дигитални услуги (DST), кој беше воведен како дел од буџетот на земјата во 2019 година.

Данокот за дигитални услуги (DST) во моментов се применува на компании кои генерирале најмалку 750 милиони евра (817 милиони долари) во изминатата календарска година и најмалку 5,5 милиони евра (5,9 милиони долари) приход од работењето на дигитални услуги во Италија.

„На капиталните добивки од биткоин, данокот за задржување се зголемува од 26% на 42%. На веб-даночните приходи работиме на елиминирање на границата од 750 милиони евра вкупно и 5 милиони во Италија, затоа ги елиминираме праговите“, изјави заменик-министерот.

Во 2024 година, пазарот на криптовалути покажува значително созревање, поттикнато од забележителни настани и трендови кои ја зголемија неговата стабилност и ликвидност. Според извештајот од 15 октомври на една од најпознатите и најголеми берзи за криптовалути „Coinbase“ и платформата за анализа на блокчејн податоци „Glassnode“, пазарите за криптовалути се поуспешни и подостапни од кога било, при што во прв план е успехот на спот ETF фондовите, кои им овозможуваат на инвеститорите директен пристап до биткоин и етериум преку берзата.

„Од неверојатниот успех на спот ETF до порастот на onchain активноста до зголемувањето на обемот на тргување, јасно е дека пазарите станаа подлабоки, поликвидни, пософистицирани и подостапни“, се вели во извештајот креиран од Дејвид Дуонг, шеф на институционално истражување на „Coinbase“ и аналитичарскиот тим на „Glassnode“.

Биткоин спот ETF фондовите се воведени во САД во јануари 2024 година. Од нивното основање интересот за инвестирање во овие фондови секојдневно се зголемува. Доказ за тоа е податокот дека само во третиот квартал на 2024 година привлекоа околу 5 милијарди долари, што укажува на зголемената доверба на институционалните инвеститори во крипто-пазарот. Пазарот на стабилни монети, исто така, доживеа пораст, со пазарна капитализација од 160 милијарди долари, поради нивната зголемена употреба за различни финансиски трансакции.

Една од главните причини за оваа стабилност е забележаното намалување на нестабилноста на биткоинот, која падна под 60% во третиот квартал на 2024 година, значително помалку од врвот во 2021 година од 130%. Ова ја прави криптовалутата помалку ризична за инвеститорите.

Етериум, иако заостана зад биткоинот во перформансите на цената, сепак продолжува да го гради својот екосистем, со забележлив пораст на слој 2 решенија (layer 2 solutions) кои овозможуваат побрзи и поевтини трансакции.

Во целина, извештајот од „Coinbase“ и „Glassnode“ укажува дека пазарот на криптовалути во 2024 година станува сè подлабок и пософистициран, со зголемена ликвидност и стабилност, додека инвеститорите се фокусираат на висококвалитетни средства.