Регулаторната комисија за енергетика донесе одлука за намалување на малопродажните цени на нафтените деривати во просек за 2,73 проценти во однос на претходната одлука од 6 април.

Новите цени ќе стапат во сила од полноќ (00:01 часот). Според пресметката, Еуросупер БС-95 ќе се продава по 82 денари за литар, а Еуросупер БС-98 по 84 денари за литар. Цената на Еуродизелот ќе изнесува 95,5 денари за литар, додека екстра лесното масло за домаќинство ќе чини 96,5 денари за литар. Мазутот ќе се продава по 49,227 денари за килограм.

Со новата одлука, бензините поевтинуваат за 1,5 денар по литар, дизелот за 2,5 денари, екстра лесното масло за 3,5 денари, а мазутот бележи намалување од 2,084 денари по килограм.

Од Регулаторната комисија посочуваат дека намалувањето е резултат на падот на референтните цени на светските пазари кај сите деривати, при што најизразено е кај мазутот. Влијание врз конечната пресметка има и благото намалување на курсот на денарот во однос на доларот.

Регулаторот нагласува дека станува збор за максимално дозволени цени, додека трговците можат да ги формираат и пониско.

Само неколку часа пред САД и Иран да објават примирје, инвеститори вложиле околу 950 милиони долари во позиции кои предвидуваат пад на цените на нафтата, по што пазарот навистина забележал остар пад од околу 15 проценти по обраќањето на Доналд Трамп.

Станува збор за една од најголемите вакви трансакции во последниот период, која повторно го отвора прашањето за навременоста на големите трговски потези пред важни политички одлуки. Според податоците, инвеститорите продале вкупно 8.600 фјучерс договори за нафта тип Брент и американската сурова нафта.

Кратко по ова, Трамп најавил двонеделно примирје со Иран, што довело до нагло намалување на цените на нафтата, под 100 долари за барел на почетокот на тргувањето во средата.

Иако големите позиции на пазарот на нафта не се невообичаени, експертите посочуваат дека вакви големи пакети ретко се реализираат одеднаш. Вообичаено, трговците ги распределуваат налозите на повеќе берзи и во подолг временски период за да избегнат влијание врз цената.

Овој случај потсетува на сличен настан од март, кога инвеститори продале фјучерси вредни околу 500 милиони долари непосредно пред Трамп да објави одложување на напад врз иранската енергетска инфраструктура, по што исто така следел пад на цените од околу 15 проценти.

Ниту берзанските оператори, ниту американскиот регулатор за деривати засега не коментираат за трансакцијата.

Во меѓувреме, пазарот на нафта останува во состојба на висока неизвесност. Од почетокот на конфликтот, обемот на тргување значително се зголемил, при што дневниот промет во последните недели достигнува и повеќе од еден милион договори, што одговара на вредност од околу милијарда барели нафта.

Е-трговијата во Северна Македонија продолжува да бележи силен раст, покажуваат најновите податоци анализирани од Асоцијацијата за е-трговија, врз основа на статистиките на Народната банка.

Во текот на 2025 година, вкупната вредност на онлајн трансакциите достигнала 950 милиони евра, што претставува зголемување од 32% во споредба со претходната година. Од нив, кон домашните е-трговци се слеале 522 милиони евра, додека значителен дел од средствата завршиле кај странски платформи.

Бројот на реализирани онлајн трансакции исто така бележи раст и изнесува 28,9 милиони, што е за 32% повеќе во однос на 2024 година. Најголем пораст е регистриран кај купувањата од странски е-трговци, што укажува на зголемена активност на граѓаните на меѓународните платформи.

Просечната вредност на трансакција останува стабилна и изнесува околу 33 евра, при што се забележуваат разлики во зависност од тоа дали купувањето е направено кај домашни или странски трговци.

Во 2025 година се зголемил и бројот на активни е-продавници, кои достигнале 1.396, што е за 84 повеќе од претходната година. Овој тренд укажува на раст на понудата и развој на дигиталниот пазар.

Сепак, анализите посочуваат дека растот на трансакциите кон странски е-трговци отвора прашања за одливот на средства од домашната економија, бидејќи нивниот удел во вкупната вредност и бројот на трансакции е во пораст.