Агенцијата за кредитен рејтинг AM бест (АМ Best) ги потврди кредитните рејтинзи на заваровалница Триглав и позаваровалница Триглав Ре за финансиска моќ „А“ (одлично) и долгорочен кредитен рејтинг на издавач „А“ (одлично) во текот на редовниот годишен преглед. Сите елементи од овогодинешните оценки се на исто ниво како и претходната година, и двете оценки ја задржаа стабилната среднорочна прогноза.

Агенцијата повторно ја оцени финансиската состојба на Триглав како многу солидна, а неговите оперативни перформанси како солидни, при што влијанието на деловниот профил и мнозинската државна сопственост врз кредитниот рејтинг на компанијата останува неутрално. Притоа, наведува дека Триглав има добро развиен систем за управување со ризик, кој што е соодветен за профилот на ризик и делокругот на деловното работење. Во потврдувањето на високиот кредитен рејтинг на позаваровалница Триглав Ре, агенцијата го истакна нејзиното стратешко значење за групацијата Триглав и изјави дека таа е добро интегрирана во неа.

Според AM Best, капитализацијата на Триглав достигнува највисоко ниво и е соодветно приспособена на ризиците, додека Триглав покажува и добра финансиска флексибилност со пристап до пазарите на акции и обврзници. Како позитивен фактор го споменува и тоа што во последните години Триглав постојано ја намалува изложеноста на производи со гарантиран принос во портфолиото на животното осигурување, а нивното влијание сега е ублажено со повисоките приноси од инвестициите како резултат на зголемувањето на каматните стапки.

Во текот на годините, Триглав постигна добри деловни резултати, а во своето работење има придобивки од конкурентни предности, кои вклучуваат водечка позиција во Словенија и регионот Адриа и добро диверзифицирана понуда. Во 2023 година, работењето на групацијата Триглав беше негативно, под влијание на еднократни настани. Во 2024 година, агенцијата очекува Групацијата да работи успешно, во согласност со нивото од последните години. Тоа го потврдуваат и добрите полугодишни резултати.

Најголемата спортска манифестација во Македонија, Виз Ер Скопски маратон, го надмина својот рекорд од 2019 година од пред-пандемичниот период за број на пријавени тркачи. Рекордот претходно беше постигнат во 2019 година на тогашното издание на маратонската манифестација.

Оваа недела, 6^ти октомври 2024, во рамките на своето јубилејно 20^то издание, ќе учествуваат рекорден број љубители на трчањето. На стартот во недела се очекува да се појават 13.440 натпреварувачи од 55 земји, кои ќе ги исполнат улиците на главниот град со позитивна енергија и ќе ја потсетат јавноста дека навистина, – трчањето може да те промени.

Пријавените тркачи со своето учество на Виз Ер Скопскиот маратон мапираат земји од целиот свет. Со својата дводецениска традиција, Виз Ер Скопски маратон стана симбол на сплотеност и неверојатен спортски дух. 

Покрај традиционалната маратонска трка (42.195 км), на Виз Ер Скопски маратон како и секоја година ќе се трча и полумаратон (21.097 км), штафетен маратон, како и трката за рекреативци на 5км, како најмасовната трка од сите. 

На денешната прес конференција, свои обраќања имаа Кире Синадиновски, Спортски директор на Виз Ер Скопски маратон, Зоран Стојановиќ, Претседател на Сојуз на Спортови на Скопје, Гордана Николовска – Генерален секретар на Сојуз на спортови – Скопје и Борко Ристовски – Министер за спорт.

„По 20-ти пат се одржува Виз Ер Скопскиот маратон, најмасовниот спортски настан кај нас, кој што Скопје и Македонија ги става на светската тркачка мапа. Овој настан не би можел да биде одржан без помош на Министерството за внатрешни работи, на Министеството за спорт, кое што покажа исклучително разбирање, Министерство за одбрана, Црвениот крст на град Скопје, Службата за итна медицинска помош и спонзорите. Оваа година има рекорден број учесници.“ изјави Зоран Стојановиќ, Претседател на Сојуз на спортови на Скопје.

Организаторите потсетуваат за претстојното Виз Ер Маратон Експо, кое ќе трае од 04.-05.10.2024 (петок-сабота) во СЦ Јане Сандански во Скопје. 

„Од името на министерството можам да изразам едно задоволство што оваа година ќе бидеме дел од Скопскиот маратон. Не знам како било во минатото, но можам да кажам дека овој маратон ќе ја има поддршката, бидејќи гради исти вредности што ние сакаме да ги вметнеме во нашата држава. Иако се работи за рекреативен настан, она што нас како министерство ни е од интерес е што врзувате многу луѓе и има многу учесници. Негуваме исти вредности по кои сака да се води и Министерствто за спорт и да бидеме пример во општеството и можам јавно да кажам дека маратонот ја има нашата целосна поддршка. Се надевам дека и годинашниот маратон ќе биде успешен како и сите досегашни и стоиме на располагање за сѐ она што можеме да го помогнеме.“ изјави Министерот за спорт, Борко Ристовски.

Дали ќе се срушат нови рекорди оваа година на Виз Ер Скопскиот маратон, ќе открие неделното утро. 

„Оваа година имаме рекорден број на учесници 13.440 од 55 земји, со што е надминат бројот од 2019 година кога имавме 12.450. Ова е многу поголем број учесници во споредба со минатата година, кога учествуваа 11.400 учесници и нѐ радува што интересот е огромен, како кај нашите тркачи, така и кај странските. Во сите четири трки, рекреативната трка од 5 км, маратонот, полумаратојот и штафетниот маратон е зголемен бројот на учесници во однос на минатите изданија. Можам да најавам дека ќе учествуваат неколку елитни натпреварувачи од Кенија и се надевам дека ќе бидат срушени рекордите на патеките. Оваа година имаме мала измена на патеките во однос на минатите години, но стартот останува на исто место, пред Собранието на Република Македонија. Тркачите на маратонот, полумаратонот и штафетниот маратон ќе трчаат накај населбата Хром, по улицата Теодосиј Гологанов, по што кај Хром ќе свртат полукружно, се враќаат назад во центарот на градот, каде продолжуваат покрај Тутунски комбинат, на Трета македонска бригада, по што ќе свртат лево, по улицата Васко Карангелевски, кај Мајчин Дом, па потоа по Булевар Србија десно, тука вртат полукружно, по што се враќаат на Тобако 2 и по Булеварот Јане Сандански, се враќаат повторно на Трета македонска бригада и завршуваат на Порта Македонија, на плоштадот во Скопје. Ова е првиот круг за полумаратонот, додека маратонците уште еднаш ќе го свртат истиот круг. Додека патеката за трката на 5 км, стартот е исто пред Собранието, по што натпреварувачите трчаат во правец на населбата Аеродром, односно кај Тутунски комбинат вртат лево, по Трета македонска бригада и кај Супермаркетот Тинекс свртуваат полукружно и се враќаат повторно назад на плоштад Македонија, каде што е целта.“ изјави Кире Синадиновски, спортски директор на Виз Ер Скопски маратон.

Голема помош на целосната организација даваат и сите пријавени 600 волонтери, кои ќе бидат вклучени традиционално во реализацијата на овогодинешното јубилејно издание, но секако и сите поддржувачи и покровители на овој голем настан.

„Оваа година имаме и Маратон Експо, при што од утре почнува издавањето на стартни пакети. Воведуваме и новина, каде што секој учесник треба да дојде со QR кодот што му е испратен на мејл, за да си го подигне стартниот пакет. Очекувам дека и покрај најавите за променливи временски услови во недела, дека сепак ќе имаме добро време и дека ќе имаме успешна трка.“ дополни Синадиновски.

Организаторите уште еднаш ги повикуваат сите во недела да ги бодрат тркачите и да ја споделат позитивната енергија на јубилејното издание на можеби омилениот спортски настан во државата.

„Оваа година е јубилејно 20 издание, првите две изданија беа одржани во 97 и 98, но од 2007 година се возобнови Скопскиот маратон, тогаш како полумаратон, трка на 5 км и детска трка, каде што имавме околу 700 натпреварувачи. Низ годините, Сојузот на спортови на Скопје, поддржуван од Јавните претпријатија и од тогашната Агенција за млади и спорт и Делгацијата на ЕУ помогнаа да се подигне рекреацијата и масовното трчање на едно високо ниво. Оваа година имаме 13.440 натпреварувачи, при што за прв пат имаме приближен број на женски и машки учесници, односно околу 48 проценти се жени, а околу 52 отсто се мажи. Ова е глобален проблем, но Сојузот на спортови на Скопје преку своите програми успеа да мотивира да се пријават повеќе жени и да има повеќе учесници од повеќе старосни категории. Покрај рекреативниот карактер на манифестацијата, со текот на годините се натпреваруваа и врвни маратонци, а имавме дури и учесник на Олимписките игри во маратонската дисциплина. Се радувам што имаме и голема поддршка од медиумите и дури 60 проценти од спорстките новинари се директни учесници во маратонските и полумаратонскитев трки и посакувам и оваа година да видиме што поголем број новинари на стартот на трките. Исто така, ги повикувам сите оние што не се во можност да трчаат годинава, да се појават долж патеката и да ги бодрат натпреварувачите“, изјави Гордана Николовска – Кузмановска од Сојуз на Спортови – Скопје.

Главен покровител на Виз Ер Скопски маратон 2024 е Министерството за спорт, а покровители се Град Скопје и Делегацијата на ЕУ во Скопје. 

Повеќе информации за 20. Виз Ер Скопскиот маратон можат да се најдат на официјалната веб страница: http://skopskimaraton.com.mk/. 

Претставници од најголемите светски брендови како TikTok, OpenAI, Klarna, и ZEOS by Zalando, заедно со уште многу други светски, регионални и домашни компании, ќе бидат дел од 7-мата регионална конференција за е-трговија „E-commerce: Untangling potential!“ , што ќе се одржи на 12 ноември во Скопје. Настанот веќе трета година го задржува својот регионален карактер и привлекува учесници од повеќе од 10 држави од регионот и светот.

Во своето најголемо и тематски најисполнето издание до сега, конференцијата за е-трговија ќе ги обедини најистакнатите домашни и меѓународни експерти во областа. Говорниците преку клучни говори, панел дискусии и неформални разговори ќе покажат во кои аспекти од е-трговијата е постигнат потенцијалот, и каде се уште има простор за развој за да може да се искористи во целост. Ќе бидат опфатени теми како испорака и логистика, нови можности за е-плаќање, маркетинг за е-трговија со користење на податоци и вештачка интелигенција, како и прекуграничен и меѓународен раст на бизнисите со е-трговија. Покрај тоа, конференцијата ќе биде одлично место за вмрежување и споделување искуства, поддржано од иновативниот саемски концепт, кој дополнително ги зголемува можностите за интеракција и размена на знаење.

Селесте Фејзо од OpenAI, водечката истражувачка компанија фокусирана на создавање безбедни и корисни AI системи, со нивниот производ ChatGPT кој веќе секојдневно го користат милиони луѓе ширум светот, е една од говорниците која ќе одржи своја презентација на конференцијата и ќе зборува за тоа како вештачката интелигенција може да ја револуционизира е-трговијата. Селесте, како AI Data Trainer, ќе ги сподели своите искуства во развојот на сигурни и ефективни AI технологии, кои ќе ја обликуваат иднината на е-трговијата.

Говорникот Бобан Љубиноски од Klarna, шведската финтек компанија позната по својот модел Купи сега, плати подоцна (Buy Now, Pay Later – BNPL), е глобален лидер во онлајн плаќањата, овозможувајќи им на корисниците да купуваат сега, а да плаќаат подоцна преку флексибилни опции за плаќање. Бобан ќе зборува за иновативните и флексибилни платежни методи наменети за модерните е-купувачи, кои допринесуваат кон зголемување на посетите кон е-продавниците, како и зголемување на просечна вредност на нарачките и на лојалноста на купувачите.

Дополнително, говорникот Бојан Доленц од ZEOS by Zalando е експерт за логистички иновации и ќе зборува за оптимизацијата на логистичките процеси кои го прават Zalando еден од лидерите во е-трговијата. ZEOS, дел од Zalando, е напреден систем за управување со складирање, обработка и испорака на нарачки. Бојан со своето 7-годишно искуство ќе сподели како ZEOS ја подобрува логистиката и ги намалува трошоците за големите интернационални брендови.