Connect with us

Банки

ПРВ КВАРТАЛ ОД СОНИШТАТА ЗА КОМЕРЦИЈАЛНА БАНКА – добивката зголемена за речиси 100%!

Објавено

пред 2 години

на

Во периодот од 01.01-31.03.2023 година Комерцијална банка од своето работење оствари позитивен финансиски резултат во износ од 1.039,7 милиони денари наспроти остварениот позитивен финансиски резултат во истиот период минатата година во износ од 522,6 милиони денари што претставува зголемување за 98,9%.

Планираната бруто-добивка за првиот квартал од годинава е остварена со 136,4 %. Притоа, остварената добивка пред исправка на вредност, која претставува показател за оперативната способност на Банката да ги покрива расходите од работењето, е за 67,9% поголема во однос на истиот период минатата година. Зголемувањето на добивката пред исправка на вредност главно произлегува од зголемувањето на приходите од редовно работење, односно од нето-приходите од камати кои бележат значително зголемување што се должи на континуираниот пораст на основната каматна стапка на Народната банка и на каматните стапки на странските финансиски пазари, во комбинација со структурата на активата на Банката. Зголемувањето на каматните стапки е резултат на напорите за намалување на инфлацијата на светско ниво. Позитивниот резултат од работењето Банката го оствари во услови на зголемена неизвесност на пазарите, сѐуште висока инфлација која забележа мало забавување, како и натамошно затегнување на монетарната политика.

Вкупните приходи од работењето изнесуваат 1.580,3 милиони денари и бележат зголемување од 40,6 % во однос на истиот период од минатата година.

Нето-приходите од камата претставуваат основна компонента во формирањето на вкупните приходи од работењето и на 31.03.2023 година истите бележат зголемување од 82,6 % во однос на истиот период од минатата година. Притоа, треба да се укаже дека заради затегнувањето на монетарната политика и зголемените каматни стапки, остварен е пораст и на приходите од камати на кредитите дадени на правните лица и населението, но тој пораст е значително, дури неколкукратно помал од порастот на приходите од камати кај нерезидентите, кај финансиските друштва, па и кај државата. На пример, зголемувањето на каматните приходи остварени кај финансиските друштва, каде доминираат пласманите во благајнички записи и депозитите во НБРСМ, се единаесеткратно поголеми, а кај нерезидентите, каде доминираат пласманите во странски банки се и над четиринаесеткратно поголеми од приходите остварени во истиот период минатата година. Тоа е затоа што во првиот квартал од минатата година каматната стапка Euribor беше околу 0 % или негативна, а оваа година достигна околу 3,5 % – 4 %. Кај благајничките записи, каматите се зголемија од 1,25 % на најновите 5,50%, а на државните записи од 0,40 % на 3,70 %, или 5,25 % кај двегодишните државни обврзници, па сѐ до 7,14 % кај последната еврообврзница. Исто така, просечната пондерирана каматна стапка на депозитите во странска валута, споредено со истиот период минатата година, е зголемена од 0,25 % на 4,39 %, додека просечната пондерирана каматна стапка на пласманите во НБРСМ од 0,31 % на 3,63 %. Токму затоа, во билансот на Банката, за прв пат приходите од камати кај финансиските друштва и нерезидентите збирно, се значително поголеми од приходите од каматите кај населението. Или пак, збирните приходи од каматите кај финансиските друштва, нерезидентите и државата се значително поголеми од приходите од камати кај правните лица. Банката ги оствари овие резултати благодарение на структурата на активата, во која над 55 % од пласманите се во парични средства, парични еквиваленти и пласмани во хартии од вредност, што влијаеше на одржување на висока ликвидност и профитабилност од каматни приходи. Како резултат на ваквите движења, нетокаматната маржа на ниво на Банката се зголеми од 1,9 % во првиот квартал од минатата година, на 3,3 % во истиот период од оваа година.

Нето приходите од провизии и надоместоци на 31.03.2023 година изнесуваат 267,9 милиони денари и во однос на истиот период од минатата година бележат зголемување од 6,8 % како резултат на зголемен обем на активности кој продолжува од минатата година. Планот за анализираниот период е остварен со 89,2 %.

Нето приходите од курсни разлики на 31.03.2023 година изнесуваат 96,7 милиони денари и бележат зголемување од 68,8 %, во најголем дел како резултат на зголемениот промет на девизен пазар со правни лица, како и по основ на методолошка промена на евидентирањето на приходите од девизно работење почнувајќи од 01.01.2023 година. Планот за анализираниот период е остварен со 159,2 %.

Останатите приходи од работењето на Банката на 31.03.2023 година изнесуваат 66,6 милиони денари и бележат намалување од 64,4 % во најголем дел како резултат на помалиот износ на наплатени претходно отпишани побарувања, како и поради извршена измена на евидентирањето на приходите од девизно работење, кои од 01.01.2023 година се евидентираат во позицијата курсни разлики. Планот е остварен со 40,6 %.

Оперативните расходи за периодот 01.01-31.03.2023 година изнесуваат 485 милиони денари и во однос на истиот период од минатата година се зголемени за 2,9 % како резултат на зголемен износ на плати и други трошоци на вработените поради зголемување на вредноста на бодот кон крајот на 2022 година, како и зголемената амортизација. Планот е остварен со 92,8 %.

Во периодот од 01.01-31.03.2023 година, Банката прокнижи загуба поради оштетување на нефинансиските средства на нето основа во износ од 1 милион денари, во согласност со регулативата од НБРСМ.

Во извештајниот период Банката прокнижи исправка на вредност на финансиските средства и посебна резерва за вонбилансни изложености на нето основа во износ од 54,6 милиони денари, наспроти 128,8 милиони денари во истиот период минатата година.

Вкупната актива на Банката на 31.03.2023 година достигна износ од 152.815,1 милиони денари и во однос на декември 2022 година бележи зголемување од 1,2%. Зголемувањето на вкупната актива во најголем дел се должи на зголемувањето кај вложувањата во хартии од вредност, а во помал дел и поради зголемените кредити на и побарувања од банки и зголемените кредити на и побарувања од други комитенти. Планот е остварен со 100,1%.

Паричните средства и паричните еквиваленти бележат намалување од 9,6%, во најголем дел заради намалената состојба на пласираните депозити преку ноќ во НБРСМ, намалувањето кај орочените депозити во странски банки до 3 месеци (како резултат на достасани депозити во валута УСД и нивно орочување на подолги рокови), како и намалувањето кај девизните тековни сметки во странски банки поради пренасочување на средствата во вложување во хартии од вредност. Планот е остварен со 89,4 %.

Средствата за тргување бележат зголемување од 3,1% како резултат на купени акции.

Финансиски средства по објективна вредност преку билансот на успех определени како такви при почетното признавање во износ од 357,8 милиони денари се состојат од вложувања во удели во инвестициски фондови.

Кредитите на и побарувањата од банки бележат зголемување од 209,7%, кое се должи главно на зголемените девизни депозити од 3 месеци до 1 година во валута УСД. Планот е исполнет со 308,6%.

Кредитите на и побарувањата од други комитенти бележат зголемување од 0,7% како резултат на зголемено кредитирање, пред сѐ на секторот домаќинства. Планот е остварен со 99,6%.

Вложувањата во хартии од вредност се зголемени за 21,1 % главно како резултат на запишани континуирани државни обврзници во денари, запишани државни записи и купени македонски еврообврзници. Планот е остварен со 119,3 %.

Преземените средства врз основа на ненаплатени побарувања се зголемени за 58,6% и имаат минимално учество во вкупната актива.

Вкупните депозити (депозити на комитенти и депозити на банки) достигнаа износ од 134.074,6 милиони денари и бележат зголемување од 0,4 %. Планот е остварен со 99,5%.

Обврските по кредити изнесуваат 678,3 милиони денари и се намалени во однос на декември 2022 година за 2,8%, како резултат на нето-ефектот од нови повлекувања и отплатени доспеани рати од кредитните линии. Планот е остварен со 103,7%.

Акционерскиот капитал и резервите на Банката со состојба 31.03.2023 година достигнаа износ од 15.462,4 милиони денари. Во нивната структура, останатите резерви бележат пораст од 8,6 %, додека задржаната добивка е намалена, согласно Одлука за распределба на добивката за 2022 година, донесена од Собранието на акционери на 29.03.2023 година. Планот е реализиран со 96,5%.

Слични Теми:

Банки

ТТК Банка АД Скопје со стабилни финансиски резултати во првиот квартал од 2025 година

Објавено

пред 9 часа

на

Во првиот квартал од 2025 година, активностите на ТТК Банка АД Скопје беа насочени
кон остварување на приоритетните цели и задачи дефинирани во Деловната политика
и во Финансискиот план на Банката за 2025 годинa.

ТТК Банка АД Скопје во периодот од 1 јануари до 31 март 2025 година оствари позитивен финансиски резултат од 10,6 милиони денари. Во услови на глобално економско закрепнување, но и присутни ризици поврзани со трговски тензии и динамична конкурентност, Банката успешно го реализираше својот традиционален и ефикасен деловен модел.

Остварените оперативни приходи изнесуваат 144 милиони денари, додека оперативните трошоци се во висина од 120 милиони денари, што резултира со нето-оперативен приход пред исправки на вредност од 24 милиони денари. Издвоени се исправки на вредност на финансиски и нефинансиски средства во износ од 13,8 милиони денари, во согласност со структурата и квалитетот на кредитното портфолио.

Нето-приходите од камати изнесуваат 83,7 милиони денари, со реализација од 99% од планираното и се на ниво слично на првиот квартал од 2024 година. Нето-приходите од провизии и надоместоци се реализирани во износ од 37,5 милиони денари, со пад од 6% во споредба со истиот период минатата година, но со реализација од 96,7% во однос на планот. Најголем удел во овие приходи имаат провизиите од домашниот платен промет и картичното работење. Приходите од курсни разлики изнесуваат 3,1 милиони денари и се пониски во однос на минатата година, поради намален обем на тргување на девизниот и менувачкиот пазар, со реализација од 84,8% од планираното. Значаен придонес во приходите имаат и останатите приходи од работењето кои достигнаа 19,7 милиони денари, значително повисоки поради реализирана капитална добивка од продажба на преземени средства, со реализација од 97,5% од планот.

Вкупните оперативни трошоци изнесуваат 120,4 милиони денари, со зголемување во однос на истиот период минатата година, најмногу поради раст на трошоците за плати и на административните и материјалните трошоци. Во однос на планот, трошоците се реализирани со 101,5%. Исправката на вредност на финансиски средства и резервации за вонбилансна изложеност е во висина од 13,8 милиони денари, а во анализираниот период не е евидентирана загуба од оштетување на нефинансиски средства.

Дивиденда и дивиденден календар

Во однос на капиталната политика, ТТК Банка АД Скопје во март објави повик за учество на Годишното собрание на акционери, коешто се одржа на 2 април 2025 година. На седницата беше донесена одлука за исплата на дивиденда за 2024 година. Согласно одлуката, бруто-дивиденда по акција изнесува 61 денар, односно 6,1% од номиналната вредност на акцијата (1.000 денари), и ќе биде исплатена на платежните сметки на акционерите, сразмерно на нивното учество во основната главнина на Банката.

Очекувања за претстојниот период

Проекциите за глобалната економија за идниот период упатуваат на нејзин стабилен раст, но ризиците поврзани со можната ескалација на геополитичките тензии и неизвесноста од трговските политики, со потенцијални ефекти и врз инфлацијата, можат да предизвикаат забавување на започнатиот процес на монетарно
олабавување, со неповолно влијание врз фискалната и финансиската одржливост.

Според Народната банка на Република Северна Македонија, најновите показатели од
домашната економија упатуваат на макроекономска слика којашто не отстапува
значително од октомвриските оцени. Имено, реалниот БДП за целата 2024 година би
се забрзал, искачувајќи се на 3,3% во 2025 година и би достигнал 4% на среден рок,
со очекувања за поповолно надворешно окружување, поволен амбиент за странски и
домашни инвестиции и позитивен придонес од започнатите инфраструктурни проекти.
Годишната стапка на инфлацијата во февруари изнесуваше 5% и се задржа на
слично ниво како претходниот месец (4,9%), под влијание на пониската споредбена
основа од истиот период претходната година, кога беа во сила мерките за
ублажување на ценовниот раст.

Постојното глобално и домашно макроекономско окружување упатува на постоење
ризици и предизвици и, во следниот период, Банката посветено ќе ги следи и анализира најновите макроекономски параметри, мерки, активности и предвидувања на економските авторитети и носителите на економските политики, како и на операторите. Истовремено, Банката соодветно ќе ги усогласува интерните индикатори и ќе го приспособува нејзиното работење и активности на пазарните услови, со акцент на долгорочната стабилност и одржување на ликвидноста.

Банката ќе остане фокусирана на проактивно, стабилно и профитабилно оперативно работење засновано на реални и на предвидливи очекувања. Кредитната активност се очекува да продолжи да се реализира преку работата со населението и со малите и средни претпријатија, паралелно со севкупното закрепнување на економската активност и на зголемената побарувачка за кредити. Притоа, Банката ќе ги презема сите неопходни активности за одржување на квалитетот на портфолиото, конкурентноста и развојот на понудата на производи и услуги, како и изнаоѓање флексибилни решенија приспособени на потребите на клиентите.

Креирањето одржливи и ефикасни процеси, посветеноста кон зголемување на квалитетот и ефикасноста во клиентската услуга и зголеменото клиентско задоволство, реализацијата на планираниот обем на активности предвидени со деловната политика, понудата на нови зелени кредитни производи приспособени на потребите на специфичните клиенти, натамошниот развој на дигитализација на процесите, приспособувањето на деловните процеси во согласност со барањата на новиот Закон за платежни услуги и платни системи, надградбата на производите и услугите достапни преку дигиталните канали и како и потпирањето на сопствените извори на финансирање и понатаму ќе претставуваат основа на деловната стратегија на Банката за 2025 година, при што и натаму депозитите од секторот население остануваат со доминантно учество во вкупните извори на средства.

Продолжи со читање

Банки

Централна кооперативна банка АД Скопје со добивка од 7,8 милиони денари во првото тримесечје од 2025 година

Објавено

пред 9 часа

на

Централна кооперативна банка АД Скопје го затвори првото тримесечје од 2025 година со добивка од 7,8 милиони денари, работејќи во услови на економски раст, инфраструктурни инвестиции и засилена надворешна побарувачка.

Банката оствари раст на вкупната актива и пасива од 4%, со реализација на планираните цели од 102%, што укажува на стабилно и одржливо деловно позиционирање.

Кредитите и побарувањата од комитенти се зголемени за 1%, при што најголем пораст е остварен кај физички лица. Паричните средства се зголемени за 7%, а вложувањата во хартии од вредност се за 15% над планот.

Позицијата депозити бележи пораст од 5% во однос на крајот на минатата година, што се должи на повисоките каматни стапки. Во исто време, зголемувањето на активните каматни стапки овозможи раст на приходите од камати за 4%, додека нето-каматниот приход е зголемен за 1% во однос на истиот период лани.

Приходите од провизии се зголемени за 2%, но поради раст на трошоците за провизии од 9%, нето-приходите од провизии се пониски за 3% на годишно ниво и 23% под планираното. Забележан е умерен раст на трошоците за вработените и останатите расходи од дејноста, но под нивото на планираното, додека приходите од дејноста се над планот за 10%.

Нето-приходите од курсни разлики се зголемени за 19%, а расходите за амортизација се намалени за 7% на годишно ниво и 29% под планот. Заклучно со 31 март 2025 година, издвоената исправка на вредност на финансиски средства и резервации за кредитна изложеност изнесува 2,77 милиони денари, што претставува намалување од 5,23 милиони денари во однос на истиот период лани.

Централна кооперативна банка АД Скопје продолжува да го задржува квалитетот на кредитното портфолио и да остане конкурентна во услови на инфлаторни притисоци и прилагодувања во монетарната политика, следејќи ги трендовите на Европската централна банка и потребата од стабилен девизен курс.

Очекувања за претстојниот период

Макроекономските услови во кои Банката ја остварува својата активност на почетокот од 2025 година остануваат под силен притисок на актуелните глобални предизвици. Иако инфлаторните трендови во Европа и во САД влегоа во фаза на смирување и цената на капиталот полека се стабилизираше, на глобално ниво одново се појавуваат економски неизвесности кои ги носат промените во економските политики на САД и консеквентно големите светски економии. Ситуацијата во државата останува под индиректен притисок и во очекување од глобалните случувања, додека на локално ниво веќе се појавуваат знаци на стабилизација и зголемен економски оптимизам. 

За очекување е Централната банка и Министерството за финансии да започнат со внимателно намалување на каматните стапки на хартиите од вредност, со што постепено ќе се отвораат услови за кредитирање со пониски каматни стапки. Поволното задолжување на државата со цел поддршка на економијата дава дополнителни сигнали дека може да се очекува економско придивижување и поголем раст.

Покрај веќе неколкугодишните последователни глобални здравствени и економски кризи, вредно е да се забележи дека банкарскиот сектор покажува високо ниво на стабилност и отпорност и релативно брзо се приспособува на различните предизвици. За очекување е да следува период на пониска претпазливост во кредитирањето проследена со повисок апетит за преземање ризици и раст на активите и на приходите.

Во вакви околности, Банката останува будно да го следи нивото на кое ќе се стабилизира цената на капиталот, од една страна, и капацитетот на населението и фирмите за сервисирање на долговите, од друга страна. Банката очекува својата тековна активност до крајот на годината да ја остварува во релативно мирни макроекономски услови, но со сè уште високо ниво на претпазливост поради новите геополитички предизвици. Во наредниот период, до покажување линија на сигурен тренд на стабилизација и пазарна извесност, Банката ќе остане максимално претпазлива при преземањето нов кредитен ризик и ќе ги следи движењата и сигналите од пазарот и од НБРСМ.  Ќе продолжат континуираните напори за остварување на планираните позиции од деловниот план, но без, притоа, да се компромитира високото ниво на квалитет на кредитното портфолио. Зголемената продуктна и ценовна конкурентност, пред сè, ќе одат во насока на заштита и задржување на постоечките клиенти, а ќе се користи секоја пазарна можност за бележење нови аквизиции и пораст.

Со цел да се олеснат пристапот до услугите и безбедноста на клиентите, ќе продолжат напорите за модернизирање на постојниот технолошки сетап на Банката. Следејќи ги современите текови во развојот на информатичките технологии во банкарското работење, Банката и понатаму ќе продолжи да ги развива и да ги усовршува и алтернативните канали за дистрибуција и зголемување на достапноста на услугите.

Посветеноста кон зголемување на квалитетот и ефикасноста во клиентската услуга и зголеменото клиентско задоволство остануваат на врвот на приоритетите за претстојната година. Банката ќе се стреми кон одржување позитивна и стимулативна работна атмосфера, преку поттикнување на иницијативите и наградување на реалните резултати и успеси.

Продолжи со читање

Банки

НЛБ Банка исплаќа рекордна дивиденда од 36 милиони евра на своите акционери

Објавено

пред 11 часа

на

Акционерите на НЛБ Банка АД Скопје годинава ќе добијат рекордни 36,05 милиони евра како дивиденда, што претставува најголема исплата во историјата на банката. Исплатата е предвидена од добивката остварена во 2024 година, која надминува 53 милиони евра.

Според одлуката која треба да биде усвоена на Годишното собрание на акционери закажано за 29 мај 2025 година, секој акционер ќе добие по 2.596 денари бруто износ по акција, при што вкупниот број на издадени обични акции изнесува 854.061.

Вкупниот износ на дивидендата во денарска противвредност изнесува 2.217.142.356 денари.

Календар на дивиденда

  • Годишно собрание на акционери: 29 мај 2025
  • Последен ден за тргување со право на дивиденда: 10 јуни 2025
  • Датум без право на дивиденда: 11 јуни 2025
  • Утврдување на акционери со право на дивиденда: 12 јуни 2025
  • Почеток на исплата на дивиденда: 25 јуни 2025

Правото на исплата го стекнуваат сите акционери кои ќе поседуваат акции заклучно со 10 јуни, а листата на приматели ќе се утврди со извод од акционерската книга на Централниот депозитар за хартии од вредност, со датум од 12 јуни.

Распределба на добивката

Покрај средствата наменети за дивиденда, НЛБ Банка дел од добивката насочува и кон идниот развој и стабилност:

  • 3,75 милиони евра се распределени за инвестициски вложувања
  • 13,4 милиони евра се пренесени во општиот резервен фонд

Со оваа стратегија, Банката покажува балансиран пристап кон наградување на акционерите, но и долгорочна финансиска стабилност и раст.

Дивиденден принос

Дивиденден принос на акциите на НЛБ Банка изнесува приближно 4,21%. Ова е релативно висок принос споредено со банкарскиот и поширокиот пазар, што ја прави акцијата на НЛБ Банка многу атрактивна за инвеститорите кои бараат стабилен паричен тек од своите инвестиции.

Силен сигнал до инвеститорите

Со релативно висок дивиденден принос кој според актуелната пазарна цена на акцијата е доста атрактивен, НЛБ Банка дополнително ја зацврстува својата позиција како една од најпрофитабилните и најтранспарентни банки на македонскиот пазар. Оваа исплата ќе биде особено значајна за институционалните инвеститори, пензиските фондови, како и за индивидуалните инвеститори кои се ориентирани кон принос од дивиденда.

Продолжи со читање

Популарно