Connect with us

Интервјуа

Очекувања 2023 година | СТЕВЧЕ КУЗМАНОВСКИ, ПРОКРЕДИТ БАНКА АД СКОПЈЕ

Објавено

на

На почетокот на тековната 2023 година, се обраќаме до банките во Република С.Македонија со цел објавување на очекувањата на водечките банкари во нашата земја од аспект на предизвиците со кои ќе се соочат Банките во периодот што следи.

Од соговорниците побаравме да направат кратка ретроспектива на изминатата 2022 година, да ги споделат своите очекувања околу новите трендови во банкарскиот сектор во 2023 година, да дадат свој коментар на движењето на каматите на активата и пасивата, да ги истакнат предизвиците со кои ќе се соочи банкарскиот сектор по имплементацијата на новиот Закон за платежни услуги и платни системи и да откријат еден новитет кој банката ќе го воведе во тековната година.

За таа цел во целост ги пренесуваме ставовите и очекувањата на Стевче Кузмановски, Член на Управен одбор во ПроКредит Банка.

Банкарство: Кратка ретроспектива на изминатата 2022 година. Кои настани ја одбележаа годината? Дали истата беше успешна за Вас и кои поуки ги извлековте?

Стевче Кузмановски: Изминатата година за  Македонија, но и за целиот свет беше година со многу предизвици.  Глобалните случувања, пред сé воениот конфликт помеѓу Русија и Украина,   ги продолжија негативните последици  врз  светската економија која сé уште не беше закрепната од пандемијата со корона вирусот. Она што го забележувавме кај бизнисите беа потешкотии со набавка на стоки и услуги , пролонгирано време на испорака од страна на  добавувачите, скратување на роковите за плаќање,  дури и барања за авансно плаќање, генерално зголемување на цените, поскапување на енергенсите и на електричната енергија итн.  

Настаните во 2022 година резултираа со потребата  сите бизниси  да се реорганизираат со цел да се прилагодат  на новите услови,  за да имаат повеќе ликвидни средства  и да продолжат нормално да функционираат. За физичките лица сите поскапувања значеа намалување на потрошувачката и ориентираност кон штедење и енергетски ефикасни инвестиции.      

Во цела таа ситуација ПроКредит Банка пристапи партнерски. Ги идентификува потребите на клиентите, како на  бизнисите,  така и на физичките лица, и понуди соодветна поддршка.

Во текот на 2022 година беа пласирани над 150 милиони евра за  бизнисите во Македонија и 16 милиони евра за  домаќинствата, со тоа што вкупното кредитно портфолио на банката достигна ниво од 473 милиони евра.

ПроКредит банка организираше преку 10 едукативни работилници каде што повеќе од 300 компании имаа можност да се запознаат со енергетскиот пазар на Македонија, влијанието на трендот на зголемени цени на струјата на конкурентноста на компаниите, и се информираа како да се намалат трошоците за струја преку инвестиции во фотоволтаични централи поставени на кров.

Како резултат на нашата кампања, до сега имаме финансирано преку 120 соларни централи поставени на кров или околу 30 MW во инсталиран капацитет. Кредитното портфолио за зелени кредити достигна учество од 20% во вкупното кредитно портфолио на банката што  претставува јасен сигнал за зелената агенда на банката и посветеноста да се направи сериозен импакт врз  опкружувањето во кое работиме и живееме.  

  Одговорниот пристап на банката во кредитирање на нашите клиенти се потврдува со ниското ниво на нефункционални кредити од 1,78%  што е под просекот на банкарскиот сектор. 

Показател за довербата која што ја имаат клиентите во банката е значителното зголемување на депозитната база. Во текот на 2022 година истата се зголеми за 68 милиони евра или 17% и достигна ниво од 480 милиони евра.     

Да сумирам, 2022 година беше успешна за банката, а за тоа пред сé  сведочат нашите клиенти.  Остануваме подготвени заеднички да се справиме со новите предизвици и во следниот период.  

Банкарство: Кои ќе бидат новите трендови во банкарскиот сектор во 2023 година во Македонија?

Стевче Кузмановски: Во делот на кредитно портфолио очекуваме да продолжи побарувачката за инвестиции во фотоволтаични централи, пред сé за сопствени потреби, со што компаниите би постигнале заштеда на трошоци за електрична енергија. Во отежнати услови за работење, намалена побарувачка, а од друга страна зголемени трошоци на работењето на компаниите, како и зголемување на каматните стапки, сигурно дека ќе се јави потреба за подолги рокови на тековните кредити и обезбедување фиксни каматни стапки. ПроКредит Банка тука е спремна да излезе во пресрет на барањата на клиентите и активно да ги поддржи во нивниот понатамошен развој.  

Во последните месеци забележуваме зголемен интерес и кај физичките лица за инвестиции во енергетски ефикасни проекти, кој во моментов сé уште е на релативно ниско ниво. За таа цел, започнавме циклус на едукативни настани за клиентите, одблиску да се запознаат со процесот, технологијата и предностите од инвестицијата, со надеж дека истото ќе резултира со зголемен интерес за инвестиции во соларната енергија.

Банките се повеќе ќе  работат на принципот на одржливо банкарство и ќе известуваат за своите ЕСГ активности. ПроКредит е импакт ориентирана банка во која применуваме одржлив модел на управување во кој освен економските резултати, посебен фокус е ставен и на нашето влијание кон екологијата и општественото опкружување, како резултат од нашите деловни активности и од портфолиото на финансираните клиенти. Во таа насока, веќе неколку години, поточно од 2017 година објавуваме годишен импакт извештај, кој е нефинансиски тип на извештај според принципите на ЕСГ. Нашите нефинансиски ЕСГ извештаи се предмет на оцена на меѓународни ЕСГ рејтинг агенции, чиј скоринг редовно се објавува на веб страната на ПроКредит групацијата.

Банкарство: Краток коментар околу очекувањата за движењата на каматните стапки на кредитните/депозитните производи во 2023 година.

Стевче Кузмановски: Затегнувањето на монетарната политика како одговор на  борбата со инфлација, како во земјава така и во светот, беше очекувано – исто како и растот на рефентните каматни стапки. Секако дека ќе се одрази со промена на каматните стапки кај депозитите и кредитите кај клиентите. 

Благајничките записи во моментов се на ниво на 4,75%, што е за цели 3,5% повисоко од почетокот на годината.  И EURIBOR-от, кој е референтна каматна стапка за исплатените еврови кредити, бележи зголемување за речиси 3.7% од почетокот на 2022 година, каде од негативна вредност, достигна до плус 3%.  Со ова, следствено ќе се зголемат каматните стапки на новоисплатените продукти, но и на кредитите со варијабилна камата, каде клиентите ќе имаат зголемување на месечните ануитети. 

Зголемувањето на каматните стапки на депозитите и кредитите во македонскиот банкарски сектор беше делумно рефлектирано во 2022 година, а поголем скок на каматите ќе има со почетокот на 2023 година.  

Банкарство: Со какви предизвици се соочува банкарскиот сектор со имплементацијата на новиот Закон за платни системи и платежни услуги?

Стевче Кузмановски: Законот за платежни услуги стапи на сила во април минатата година, а неговата примена започнува од почетокот на оваа година. Имплементацијата ќе се одвива сукцесивно, во повеќе фази, во текот на еден подолг временски период. Законот претставува усогласување на македонското законодавство сo европските директиви и носи поголеми предизвици за банките.

Главните измени кои Законот ги носи се поголемата заштита на правата на корисниците на платежните услуги, поголема транспарентност во доменот на платежните услуги кои се нудат , но и зголемување на конкуренцијата преку концептот на “отворено банкарство”.

Законот предвидува обврска за давателите на платежни услуги јасно и навремено да ги предочат трошоците кои корисникот би ги имал при вршење на трансакциите, а воведените Рамковни договори претставуваат една стандардизирана рамка во која се утврдуваат правата и обврските на корисниците на платежни услуги. Законот има и една социјална димензија преку обврската на давателите на платежни услуги за воведување на сметка со основни функции за ранливи групи на граѓани, со што се овозможува нивна полесна инклузија во финансискиот систем.

Сите овие промени предвидуваат големи предизвици за банките кои ќе треба да ги прилагодат системите во еден релативно краток рок, но истовремено сите овие промени носат и големи придобивки за клиентите . 

Банкарство: Наведете еден новитет што ПроКредит Банка АД Скопје ќе го имплементира во 2023 година и што очекувате од имплементација на истиот?

Стевче Кузмановски: ПроКредит Банка важи за прва дигитална банка на пазарот. Нашите клиенти, физички и правни лица, уште од 2017 година работат дигитално со нас, во делот на платен промет и во делот на готовински операции. Ние сме пионери во Македонија во воведување на нови модерни услуги. Имено, први воведовме самоуслужни зони 24/7. Сите трансакции се извршуваат дигитално преку каналите на електронско и мобилно банкарство, додека пак уплата и исплата на готовина се врши преку банкомати и останати специјализирани машини за броење на пари. За разлика од другите банки, ние немаме експозитури каде што висококваликфикувани вработени бројат пари или пак рачно пополнуваат вирмани. За нас вработените се на примарно место и инвестираме значително во нивна обука со цел да можат да понудат квалитетна поддршка на клиентите.  

Новина која сакаме да ја воведеме во 2023 година е можноста за користење на дигитален идентитет за отварање на сметка во банката и потпишување на документи и договори. Со тоа би овозможиле  клиентите да имаат целосно дигиталното искуство  при работењето со банката. Тоа би значело дека клиентот ќе може комплетно  да ги користи сите услуги на банката на брз и ефикасен начин преку дигитални платформи без да има потреба од физичко доаѓање.

Интервјуа

Интервју | АНТОНИО АРГИР: Групацијата НЛБ прерасна во регионален пионер во областа на напредните дигитални плаќања

Објавено

на

Во денешниот дигитален пејзаж кој брзо се развива, точката во која се вкрстуваат финансиите и технологијата го обликува начинот на кој спроведуваме трансакции. Еден од пионерите во оваа област е г-дин Антонио Аргир, искусен експерт со длабоко разбирање на дигиталните платежни системи.

Со фокус на теми како што се Apple Pay, Google Pay, NLB Smart POS и поширокиот спектар на дигитализација, Аргир носи богатство на знаење и детален увид во овие дејности.

Во ова ексклузивно интервју, навлеговме во нијансите на овие трансформативни технологии, истражувајќи го нивното влијание врз потрошувачите, бизнисите и иднината на финансиските екосистеми.

Во продолжение разговараме со г-дин Антонио Аргир, член на УО на НЛБ Групација, одговорен за управување со групацијата, плаќања и иновации.

Банкарство: Неодамна НЛБ го имплементираше Apple Pay во Словенија. Кажете ни малку повеќе за опциите што Apple Pay им ги нуди на клиентите? 

Антонио Аргир: Така е, ние сме исклучително горди што на крајот на февруари во Словенија ја овозможивме услугата Apple Pay за корисниците на НЛБ. Реакциите кои ги добиваме од клиентите се многу позитивни, бидејќи клиентите навистина со нетрпение ја очекуваа оваа услуга. Со овозможувањето на Apple Pay, НЛБ дополнително ја зајакна својата позиција како дигитално напредна банка. Сепак, ова не е единствената иновација што ја воведовме во НЛБ Групацијата во последната година. 

Дефинитивно би го споменал и воведувањето на услугата Google Pay, воведувањето на новата повеќеканална дигитална банка Клик која овозможува исто корисничко искуство на сите уреди, односно и на паметните телефони и на компјутерите, и последно, но не и најмалку важно, лансирањето на NLB Smart POS решението кое овозможува паметно користење на телефоните и како ПОС терминал. Со сите решенија што ги нудиме, клиентите секогаш ги имаме во нашиот фокус. На нашите клиенти сакаме да им го понудиме најдоброто корисничко искуство кое можат да го добијат на пазарот. 

Оценувам дека НЛБ Групацијата во последниот период навистина презеде решителни чекори на патот кон обезбедување на најдобро корисничко искуство за своите клиенти на сите пазари каде што работи, вклучително и во Македонија. Амбицијата на НЛБ е секако многу поголема и поширока. Сакаме што поскоро да ја овозможиме услугата Apple Pay и на другите пазари, секако и во Македонија. Желбата е слична како во случајот со услугата Google Pay, кога практично НЛБ Групацијата прва ја донесе глобално популарната услуга на пазарите во Северна Македонија, Црна Гора и Босна и Херцеговина. 

Со Google Pay докажавме колку е значајна улогата на НЛБ Групацијата и каква системска позиција имаме во однос на глобалните технолошки компании, како и на локалните пазари каде што работиме. Така, слично на Google Pay, сакаме да ја направиме услугата Apple Pay достапна за сите наши клиенти во регионот кој го нарекуваме наш дом. НЛБ Групацијата сака на клиентите да им ги понуди најнапредни решенија за дигитално банкарство, а во исто време да обезбеди најдобро корисничко искуство, кое е безбедно и доверливо. 

Apple Pay е чекор на овој пат, бидејќи со услугата Apple Pay можете брзо, лесно и безбедно да плаќате со НЛБ картичките директно со вашиот iPhone или други уреди на Apple. Можете да плаќате и на ПОС терминали и онлајн. Користењето на Apple Pay е многу лесно, бидејќи клиентите едноставно го доближуваат својот iPhone или Apple Watch поблиску до терминалот за плаќање. Кога плаќате онлајн и преку апликации, информациите како што се вашето име и презиме и адреса се пополнуваат автоматски. Apple Pay користи безбедносни карактеристики вградени во вашиот Apple уред, вклучувајќи Face ID и Touch ID, кои се дизајнирани така што само вие можете да одобрувате плаќања.

Банкарство: Дали е достапна дигитализацијата на платежните картички за сите брендови (Mastercard/Visa) и дали крајниот корисник има некакви почетни трошоци, т.е. цена по трансакција? 

Антонио Аргир: Во Словенија, НЛБ Групацијата обезбедува Apple Pay услуги и за Visa и за Mastercard картички. Истата амбиција ја имаме и за останатите пазари каде што работи НЛБ Групацијата. Apple Pay е достапен бесплатно за нашите клиенти, нема дополнителни трошоци за клиентите кои користат ја користат оваа услуга. 

Банкарство: Кога реално може да очекуваме Apple Pay во Македонија? Дали Apple Pay моментално се имплементира во НЛБ Банка Скопје? 

Антонио Аргир: Имплементацијата на услугата Apple Pay се одвива истовремено за останатите членки на НЛБ Групацијата. Се надеваме дека и другите банки од нашата Групација, за кои Банкарт обезбедува услуги за обработка на картички и банкомати, ќе можат да воведат Apple Pay за релативно краток временски период. Услов за имплементација на услугата е секако присуството на Apple Pay на секој пазар, што е исклучиво одговорност на Apple. Apple Pay сè уште не е достапен на пазарите во Северна Македонија, Босна и Херцеговина и Косово, па НЛБ Групацијата води интензивни разговори со Apple со цел што поскоро да ги отвори овие пазари за нивните производи. Врз основа на успешната имплементација во Словенија, сметам дека сме на добар пат да го донесеме Apple Pay и во Македонија.

Банкарство: Дали мислите дека имаме потенцијал да го користиме овој паричник во Македонија? Колку корисници со iPhone реално може да се очекува да ги дигитализираат своите картички преку Apple Pay, имајќи предвид дека во Македонија во септември 2023 година се дигитализирани само 29.000 дебитни и 14.000 кредитни картички? 

Антонио Аргир: Групацијата НЛБ е регионален пионер во областа на напредните дигитални плаќања. Уверен сум дека има голем потенцијал за раст на мобилните плаќања како на македонскиот, така и на другите регионални пазари. Овој вид на плаќање носи многу предности за клиентите, но и за продавачите и последно, но не и најмалку важно за државата, бидејќи го намалува уделот на сивата економија.

Токму поради ова, сметам дека земјите исто така треба да преземат поактивен пристап кон промовирање на дигиталните и безготовински плаќања, бидејќи уделот на овие плаќања во регионот е далеку под европскиот просек. По воведувањето на услугата Google Pay, а сега и услугата Apple Pay и со тоа подобреното корисничко искуство, бројот на дигитализирани картички меѓу корисниците на НЛБ во Словенија расте исклучително брзо. Од воведувањето на Google Pay минатиот јуни, бројот на дигитализирани картички меѓу корисниците на НЛБ во Словенија се зголеми за повеќе од четири пати до крајот на 2023 година, а тој број сè уште расте. 

Податоците за Apple Pay се уште поимпресивни, бидејќи корисниците на НЛБ дигитализираа повеќе од 30.000 картички само во првата недела. Подобреното корисничко искуство и популарноста на Google Pay меѓу корисниците на НЛБ во Словенија се докажува со фактот дека уделот на бесконтактните плаќања со мобилни и паметни часовници е двојно поголем од минатогодишниот просек. Сè уште немаме податоци по воведувањето на Apple Pay, но врз основа на бројот на дигитализирани картички, претпоставуваме дека процентот на плаќање преку мобилен и паметен часовник значително ќе се зголеми. Истовремено, неопходно е да се истакне и фактот дека во овој период обемот (износот) на трансакциите на клиентите на НЛБ направени со паметен телефон или паметен часовник исто така е повеќе од двојно зголемен. Сигурни сме дека ќе бидеме сведоци и на сличен тренд на брз раст на дигитализираните картички и трансакциите направени со овие картички и во Македонија.

Банкарство: Имајќи предвид дека ова интервју го спроведовме партнерски со АЕТМ Скопје, следното прашање е поврзано со нивното делување. Асоцијацијата за е-трговија преку своето делување се стреми да ги едуцира клиентите за бенефитите кои ги нуди е-плаќањето и дигитализацијата. Како ја оценувате работата на АЕТМ кога е во прашање овој сегмент на плаќања?

Антонио Аргир: Да потсетам дека НЛБ Банка Скопје е прва банка која на македонскиот пазар овозможи процесирање на плаќањата преку електронска трговија, практично уште во 2008 година, а денес банката има преку 50% пазарно учество во остварен волумен кога станува збор за онлајн плаќањата. На клиентите Банката им нуди стабилен, 24/7 достапен сервис за плаќање, но и низа дополнителни алатки и функционалности со цел корисниците да ги спроведат плаќањата на брз, едноставен и безбеден начин. 

За работата на Асоцијацијата, можам да дадам само позитивни оценки. Навистина сметам дека оваа организација, од нејзиното основање во 2017 година, е непоколеблива во своите напори да го катализира растот и напредокот на секторот за е-трговија. Би рекол, слично како што НЛБ е пионер во обогатување на финансискиот пејзаж со иновативни услуги и трансформација на традиционалното банкарство, така и Асоцијацијата за е-трговија е пионер во визионерски иницијативи и постојана потрага по иновации кои имаат трансформативно влијание на дигиталната трговија.

Преку регионалната улога која во моментов ја имам во нашата НЛБ Групација, имајќи подобар поглед и знаења за регионот, можам да кажам дека стратешките иницијативи на Македонската Асоцијација за е-трговија не само што ја поттикнаа индустријата напред, туку и поставија „златен стандард“ за сличните организации во регионот. 

Преку своите иновативни програми и посветеност кон извонредност, тие постојано демонстрираат длабоко разбирање на динамиката на пазарот, градејќи поволна средина за раст на овој сегмент, но и на сите останати чинители кои учествуваат во процесот на е-трговија, практично поттикнувајќи еден просперитетен екосистем кој придонесува за деловен успех.

Продолжи со читање

Интервјуа

Очекувања 2024 година | МИЛКА ТОДОРОВА, УНИБАНКА АД СКОПЈЕ

Објавено

на

На почетокот на тековната 2024 година, се обраќаме до банките во Република Северна Македонија со цел објавување на очекувањата на водечките банкари во нашата земја од аспект на предизвиците со кои ќе се соочат Банките во периодот што следи.

За таа цел во целост ги пренесуваме ставовите и очекувањата на Милка Тодорова, Претседател на Управниот одбор на УНИБанка АД Скопје.

Банкарство: Кратка ретроспектива на изминатата 2023 година. Кои настани ја одбележаа годината, дали истата беше успешна за Вас и кои поуки ги извлековте?

Милка Тодорова: Оваа година УНИБанка заокружи 30 години постоење на македонскиот банкарски пазар. Jубилеjната 2023 е уште една многу успешна година – jа завршивме со одлични резултати, наjдобрата година во историjата на банката. Како и во претходните години, бележиме пораст на активата како и на и добивката на Банката, која е исто така на досегашно рекордно ниво. Цената на акциjата на УНИБанка годинава се зголеми за 41%.

Во 2023 година УНИБанка е вклучена во MBI 10 на Македонската берза – една од 10-те компании што го формират индексот на берзата. И оваа година jа продолживме тенденцијата за доделување на дивиденда на акционерите – исплативме дивиденда од 282,97 МКД бруто по акциjа што претставува дивиденден тековен принос од 5,44 %.Издадовме нова, трета по ред, перпетуална обврзница во вкупен износ од 1.350.000 € -дополнителен капитал, наменет за одржување на нашите стратешки цели.

Успешната 2023 година и доброто работење на УНИБанка години наназад, одличниот имиџ и репутација кои ги ужива во јавноста и во деловното опкружување , придонесоа Банката да биде добитник на две значајни признанија од Македонска берза за 2023 година.

Првата награда е во категорија „Акција со најголем промет во 2023 година“, а втората за „Акција со најголем пораст на цената во 2023 година“ и двете во сегментот акционерски друштва под 50 милиони евра пазарна капитализација.

Во 2023 година продолживме континуирано да ги подобруваме услугите за нашите клиенти и корисничкото искуство:

  • Имаме нова, модерна веб страна, која сите продукти и услуги ќе ги направи уште поблиски и подостапни до потенцијалните клиенти;
  • Годинава целосно се заменети банкоматите на банката со нови, модерни и сите со функцијата chash–in – што овозможува 24/7 внес и изнес на готовина.
  • Воведени се нови функционалности на мобилното банкарство:
  • Моj Буџет, што го олеснува финансиското планирање на граѓаните;
  • Моментални плаќања во реално време со функциjата Плати на приjател;
  • Далечинска идентификација на нови и постоечки клиенти и користење на сите наши продукти и услуги – отворање сметка, кредити, депозити и др., без потреба од посета во експозитура, вклучувајќи и од странство.

Дополнително ја подобривме и ефикасноста на банката со воведување на неколку нови софтвери -за олеснување на комуникациjата со клиентите преку сите продажни канали и систем за оптимизациjа на работата со документи во банката.

Банкарство: Кои ќе бидат нови трендови во банкарскиот сектор во 2024 година во Македонија?

Милка Тодорова: Главните трендови во банкарскиот сектор за 2024 година ќе бидат поддршката и подготовката на економијата и граѓаните за подигитална и позелена иднина.

Дигитализацијата е тренд коj веќе неколку години е се посилно застапен – речиси сите банки овожможуват користење на своите продукти и услуги преку електронските канали 24/7 и овој тренд е веќе стандард во банкарското работење. Очекувам и во 2024 година да продолжат да се зголемуваат можностите за дигитален онбординг на клиенти, електронско аплицирање за кредитни продукти, моментални плаќања /плати на приjател/, депонирање готовина преку банкомат, плаќања со телефон, часовник и сл.

Следењето на принципите на еколошко, социјално и добро корпоративно управување (ESG), бара од банките уште поголем напредок во вклучувањето на климатските,еколошките и социјалните ризици во нашите постоечки стратегии и процеси за управување со ризик. Ние, банките, како и секоја компанија, мораме да се грижиме повеќе за планетата преку контролирање на нашето влијание врз животната средина и намалување на штетните емисии, со цел подобрување на здравјето и безбедноста на нашите клиенти, добавувачи и вработени.

Банкарство: Краток коментар околу очекувањата за движењето на каматните стапки на кредитните/депозитните производи во 2024 година.

Милка Тодорова: Позитивните сигнали за закрепнување на глобалните економски процеси и најавата за започнување на циклус на намалување на основните референтни каматни стапки на Американскиот Долар и Еврото од страна на Федералните Резерви во САД и ЕЦБ во ЕУ, креираат очекување кај мнозинството на економски аналитичари за почеток на процес на намалување на референтните камати во првата половина на 2024-та година.

Во таа насока на последна аукција за државни записи понудена е намалена каматна стапка кај краткорочните и долгорочните хартии од вредност за 0,15%. Ова исто така е сигнал дека во 2024-та чекориме во многу постабилна макроекономска состојба пред сè како резултат на намалена инфлација и позитивните макроекономски трендови кај девизните резерви и девизниот пазар.

Во моментот можеме да констатираме дека трендот на натамошно зголемување на основните каматни стапки е прекинат и доколку не се појават поголеми ризици, каматните стапки постепено би се намалувале на среден рок не само како резултат на монетарните каматни политики на централните банки,туку и како резултат на конкурецијата помеѓу банките за привлекување на квалитетни клиенти и градење на долгорочно депозитно јадро и квалитетно кредитно портфолио.

Од друга страна, сеуште сме сведоци на глобални воено-политички нестабилности, турбуленции на светските берзи, прекинати дистрибутивни канали за главните енергетски ресурси и храната, кои креираат ризици, што може да доведе до повторен процес на раст на инфлацијата и зголемување на каматните стапки.

Во таа насока, во 2024-та година банките како економски субјекти врз чие работење најмногу влијае каматната политика, можат да планираат благо релаксирање на каматните стапки согласно пазарните информации и континуирано да ги следат економските индикатори, заради потврда на стабилизарачкото движење на клучните економски индикатори, како и следење на можно повторно појавување на евентуалните ризици.

Банкарство: Колку домашните банки се дигитализирани и дали заостануваат во овој процес во однос на банките од Регионот/Европа?

Милка Тодорова: Домашните банки го следат чекорот со банките од регионот во делот на дигитализација, односно на нудење на своите услуги преку дигиталните канали.

Сепак, во споредба со Европа и регионот, домашните банки заостануваат во трендовите во иновациите во платежните услуги, пред сè поради недостаток на сервиси за брзи плаќања помеѓу домашните банки, а и користење на платежниот сервис СЕПА во рамките на Европа, со кој би се овозможила поголема брзина и ефикасност на плаќањата и овозможување на поголема конкуренција и фокус кон иновации.

Дополнителен предизвик на домашните банки е развојот и користењето на вештачка интелегенција (Artificial intelligence), како во делот на креирање на нови поволности за клиентите, така и во делот на унапредување на банкарските процеси. Користењето на вештачка интелегенција во домашните банки е на самиот почеток, но со оглед на стратегиските планови, се очекува застапеноста на истата во следниот период да се приближи до банките во регионот и Европа.

Банкарство: Наведете еден новитет што УНИБанка АД Скопје ќе го имплементира во 2024 година и што очекувате од имплементација на истиот?

Милка Тодорова: Оваа година, УНИ Банка со задоволство објавува успешна имплементација надоградување на мобилната банкарска апликација со алатката “Мој Буџет”.

Станува збор за ново, едноставно и ефикасно банкарско искуство за клиентите, кое има за цел да помогне во креирање на позитивни финансиски навики.

Како одличен финансиски советник “Moj Буџет” комуницира со клиентите преку персонализирани нотификации и совети кои помагаат за подобар увид и контрола на трошењето на личните средства и соодветно остварување на месечна заштеда.

Услугата е намената за секој поединец кој ги препознава бенефитите од новите технологии исака да има контрола врз трошењето, а истовремено да планира распределба и заштеда на личните средства, да има увид во своите навики на трошење и штедење и да ги менува кон подобро.

“Мој Буџет” е веќе достапна за секој корисник на мобилното банкарство на УНИБанка, преку најновата верзија на мобилната апликација.

Продолжи со читање

Интервјуа

Очекувања 2024 година | Управен Одбор, СТОПАНСКА БАНКА АД – СКОПЈЕ

Објавено

на

На почетокот на тековната 2024 година, се обраќаме до банките во Република Северна Македонија со цел објавување на очекувањата на водечките банкари во нашата земја од аспект на предизвиците со кои ќе се соочат Банките во периодот што следи.(повеќе…)

Продолжи со читање

Популарно