Денеска е потпишана спогодба за отворање на претставништво на Европската инвестициска банка (ЕИБ) во Скопје, по средбата на премиерот Христијан Мицкоски со потпретседателот на Банката, Роберт Де Грот.

Министерот за надворешни работи и надворешна трговија, Тимчо Муцунски, истакна дека отворањето на претставништвото е значаен чекор во продлабочувањето на партнерството со Европската Унија и европските институции, обезбедувајќи поблиска координација, поефикасна имплементација на проектите и зголемен пристап до финансиска и техничка поддршка за македонските компании и локалните самоуправи.

„ЕИБ ќе биде уште поблиску до државните институции, локалната самоуправа и македонските компании, давајќи поддршка за развојни инвестиции и проекти. Ова претставува јасен сигнал дека нашата држава се движи кон модерна, европска и конкурентна економија, ориентирана кон долгорочен и одржлив раст. Новата фаза на соработка се совпаѓа со стратешките цели на Владата, забрзување на економската трансформација, поддршка на зелената транзиција, интеграција во европскиот економски и финансиски простор и усвојување на европските успешни практики и стандарди. Нашата заложба останува јасна, да создадеме услови за стабилен раст, нови инвестиции, зголемена конкурентност и поквалитетни услови за живот на граѓаните“, рече Муцунски.

Роберт Де Грот посочи дека формалното присуство на ЕИБ во Скопје ќе овозможи продолжување на досегашниот интензитет на соработка во повеќе сектори, вклучително енергетика, транспорт, поврзување, зелена транзиција, третман на отпадни води и подобрување на здравствени и образовни услуги. Тој додаде дека банката досега има инвестирано над 1,6 милијарди евра во Северна Македонија и дека новото претставништво ќе ја олесни достапноста до заеми за малите и средните претпријатија и ќе поддржи нови развојни проекти.

„Навистина ми е драго што ги формализиравме односите на нашето претставништво и луѓето коишто ги имаме во нашето претставништво во Скопје. Од 1991 година, ние имаме договорено инвестиции од повеќе од 1,6 милијарди евра за поддржување на економијата, инфраструктурата, општините, како и малите и средните претпријатија, но потребно е и да го олесниме нивниот пристап до заеми. Ние навистина сме посветени на ова застапништво. Тоа го започнавме уште во 2022 година и сакаме да биде дел од пристапното патување на земјата, заедно со делегацијата на ЕУ“, посочи потпретседателот на ЕИБ, Роберт Де Грот.

Отворањето на претставништвото на ЕИБ ја зацврстува позицијата на Северна Македонија како стабилен и доверлив партнер за европските институции и инвеститори, додека истовремено придонесува за зелена транзиција, одржлив економски раст и интеграција во европскиот економски и финансиски простор.

Кристалина Георгиева, директорка на Меѓународниот монетарен фонд (ММФ), ја оцени Албанија како една од најбрзорастечките економии во Европа, истакнувајќи ја клучната улога на Банката на Албанија во обезбедување стабилност, доверба и одржлив раст.

„Со Централната банка на Албанија како силен партнер, посветена на здрави монетарни политики, регулаторна рамка и институционална транспарентност, Албанија се рангира меѓу најбрзорастечките економии во Европа, што е доказ за непоколеблив напредок и зголемена одржливост“, посочи Георгиева.

Таа додаде дека ММФ ќе продолжи да ја поддржува Албанија во процесот на интеграција во Европската унија и во одржување на макроекономската стабилност, како и во унапредување на финансиската инклузија и дигитализацијата на банкарскиот сектор.

Ова признание ја истакнува важноста на доброто управување со монетарната политика и стабилните институции за забрзување на економскиот раст и зајакнување на довербата на инвеститорите во регионот.

Комерцијална банка се искачи на 41-то место на ранг-листата SEE TOP 100 најголеми банки во Југоисточна Европа и уште еднаш го потврди статусот на најдобро рангирана македонска банка на оваа листа објавена од порталот SeeNews.com.

Во рангирањето базирано на финансиските извештаи за 2024 година, Комерцијална банка бележи скок од четири место погоре благодарение на растот на вкупната актива. Во домашна конкуренција, Комерцијална банка е убедливо на 1 место.

Овој успех е резултат на континуираниот раст на вкупната актива и на стабилните финансиски перформанси, што ја позиционира Комерцијална банка како лидер во домашниот банкарски сектор и значаен фактор на регионално ниво.

Годинава на ранг-листата SEE TOP 100 повторно се најдоа шест банки од Македонија. Рангирањето SEE TOP 100 претставува традиционална годишна анализа која ги претставува најголемите и најуспешни банки, компании и осигурителни друштва во Југоисточна Европа, нудејќи преглед на економските трендови и деловните достигнувања во регионот.

SeeNews е независен меѓународен извор на бизнис вести, со фокус на пазарите во развој во Југоисточна Европа.