Connect with us

Интервјуа

Интервју | Д-р КАТЕРИНА БОШЕВСКА: Професионалното управување со побарувањата игра клучна улога за секоја економија

Објавено

пред 10 месеци

на

Банките и компаниите треба да продолжат да го доверуваат управувањето со побарувањата на надворешен партнер како што е ЕОЅ, бидејќи преку услугите за наплата и откуп на побарувања се дава значителна поддршка за компаниите и за економскиот систем. Преку оваа поддршка, тие ја враќаат ликвидноста, а истовремено помагаат граѓаните да се интегрираат повторно во системот овојпат ослободени од нивните задолжувања.

Покрај услугите за наплата и откуп на побарувања, компанијата ЕОЅ нуди услуги за меѓународна наплата на побарувањата исто така се’ повеќе наоѓаат своја успешна примена. Компаниите се свесни дека управувањето со побарувањата е една комплексна област, а особено кога нивните задоцнети и заостанати побарувања се наоѓаат кај субјекти кои се наоѓаат во странство. Мрежата на компании и партнери на ЕОЅ во 180 земји околу светот и експертизата на нивните вработени овозможува решавање на 99% од предметите без започнување на правна постапка, што значи помалку трошоци и побрзо разрешување на проблемот за компаниите.

На тема управување со побарувања и неговото значење за економијата, работењето со фокус на „ги менуваме финансиите кон подобро“, иницијативата „Finance Talks by EOS“, студиите кои ги спроведе EOS Групацијата и предизвиците во периодот кој следи разговараме со д-р Катерина Бошевска, Генерален директор на ЕОЅ Матрих Македонија.

Банкарство: Изминатата 2022 година ја испративме како уште една многу динамична година, исполнета со предизвици и проблеми за бизнисот. Прогнозите за домашната и за глобалната економија во 2023 година се далеку од оптимистички, така што компаниите сигурно ги калкулираат состојбите. Како се носи EOS Matrix Macedonia со овие турбулентни времиња, со какви резултати ја завршувате фискалната 2022/23 година и кои се вашите очекувања?

Д-р Катерина Бошевска: Како и во изминатите неколку години, така и во 2022 година која донесе голем број на потешкотии за општата економска состојба кај нас и во светот, Групацијата ЕОЅ успешно се справува со предизвиците и успеавме повторно да оствариме одлични резултати. Со фокусиран менаџмент, стратешко позиционирање и благодарение на нашата способност за брзо донесување на одлуки се’ повеќе ја зацрвстуваме нашата улога на пазарот како водечки професионален партнер за управување со побарувањата.

EOS Матрих ДООЕЛ Скопје успешно ја комплетираше 2022/23 година со благо намалување на приходите од 0,76 % и покрај сите предизвици со кои компанијата се соочи на групациско ниво и на локално ниво. Заработката пред оданочување е поставена на охрабрувачко ниво во целина во износ од 386 илјади евра. Инвестицискиот обем е зголемен во однос на претходната година, инвестиравме 1,4 милион евра. Можам да заклучам дека во фискалната 2022/23 EOS Matrix остана стабилен. 

Гледајќи низ призмата на компанијата мајка и состојбата на ЕОЅ компаниите на ниво на Групацијата, годишниот Извештај на EOS за фискалната 21/22 покажа дека ЕОЅ бележи стабилен развој и во овие турбулентни времиња. Во исчекување на резултатите за фискалната 2022/23 година кои ќе бидат објавени во втората половина од месец јули оваа година, вреди да се осврнеме на постигнатите резултати кои ни втурија ветер в грб. Во финансиската 2021/22 година, приходите на EOS Consolidated останаа на високо ниво, со што се потврди силната оперативна изведба во изминатите неколку години. Изминатата финансиска година ЕОС Групацијата покрај тоа што одбележа одлични бројки, постигна значителни успеси коишто ја издвоија 2022 година од останатите. Овде ќе ги споменам етаблирањето на нова компанија во Португалија, истовремено нашата компанија сестра ЕОЅ во Шпанија го обезбеди своето прво портфолио на обезбедени побарувања во вредност од 60 милиони евра и ЕОЅ во Франција ја склучи најголемата зделка за годината со предвидена вредност од 66.2 милиони евра. Дополнително, изминатата фискална година ЕОЅ уште подобро се позиционираше себеси како составен дел од Otto Групацијата. 

Банкарство: Дали во услови на изразена финансиска криза се отвори повеќе работа за EOS Matrix? Колку компаниите и граѓаните ја користат можноста што им ја нудите за изнаоѓање заеднички решенија за проблемите со задоцнето плаќање, односно за ослободување од долговите?

Д-р Катерина Бошевска: Нашите услуги за наплата и откуп на побарувања се вредна поддршка за компаниите и за економскиот систем, бидејќи тие ја враќаат ликвидноста, но и помагаат граѓаните да се интегрираат повторно во системот со тоа што ги ослободуваме од нивните задолжувања. Кон тоа сведочи и изборот на нашите клиенти кои ни го доверуваат процесот на управување со побарувањата како и одличната соработка и прифаќање на граѓаните со нашите офицери за наплата во процесот на изнаоѓање решение за подмирување на нивните задолжувања. 

Банките и компаниите треба да продолжат да настојуваат да работат со надворешен партнер и да го пренесуваат управувањето со побарувањата и нивните процеси на наплата. Податоците покажуваат дека и продажбата на побарувањата исто така може да биде добро решение.

Покрај услугите за наплата и откуп на побарувања, нашите услуги за меѓународна наплата на побарувањата исто така се’ повеќе наоѓаат своја успешна примена кај нас. Компаниите се свесни дека управувањето со побарувањата е една комплексна област, а особено кога нивните задоцнети и заостанати побарувања се наоѓаат кај субјекти кои се наоѓаат во странство. Нашата мрежа на компании и партнери во 180 земји околу светот и експертизата на нашите колеги ни овозможува решавање на 99% од предметите без започнување на правна постапка, што значи помалку трошоци и побрзо разрешување на проблемот за компаниите. Професионалните услуги за меѓународна наплата ги нудиме на пазарот од 2011 година и до сега во 153 поединечни инстанци им обезбедуваме парични текови на македонските компании. Особено ме радува тоа што компаниите се’ повеќе ги согледуваат придобивките од соработка со искусен партнер како што е ЕОЅ Матрих и ги користат нашите услуги повеќекратно и континуирано. Бројот на нови компании коишто одбираат да се потпрат на нашите професионални услуги за меѓународна наплата на побарувањата (cross-border услуги) продолжува да расте. 

Банкарство: Иако 2022 година, без дилема, е прогласена за кризна година, EOS Matrix сепак започна неколку нови иницијативи и проекти кои имаат за цел подобрување на состојбите и, пред сѐ, имплементирање на европските законски решенија и практики во македонскиот финансиски сектор. Го претставивте и новиот изглед на брендот со фокус да „ги менувате финансиите кон подобро“. На што се должи овој проактивен однос со којшто очигледно цврсто чекорите и во 2023 година?

Д-р Катерина Бошевска: Да се биде водечки финансиски инвеститор на пазарот за нас исто така значи дека ние имаме одговорност да ги поставиме стандардите за професионални деловни практики и да ги применуваме највисоките стандарди. Нашето тврдење: „Ги менуваме финансиите кон подобро“ се темели на нашата заложба да им го обезбедиме најдобриот пристап, најдобриот модел за управување со побарувањата на нашите клиенти, а воедно да понудиме win-win решение каде ќе ги подобриме финансиите и на корисниците кои доцнат со наплата. Со други зборови, на поединците – потрошувачите кои се задолжуваат да им помогнеме да се ослободат од долговите, а компаниите и институциите да ги подмират своите ненаплатени побарувања кои ги оптоваруваат нивните биланси.  

Фокусирано продолживме да работиме на нашите цели. Со пристигнувањето на новиот бренд на ЕОЅ одлучивме да започнеме иницијативи и имплементираме процеси кои не’ направат подигитални, подинамични и поефективни во нашата работа. Воедно, преку овие активности секојдневно ги подобруваме нашите услуги и инидивидуалниот пристап кон изнаоѓање решенија за нашите клиенти, партнери и корисници кои ќе ги променат нивните финансии кон подобро, на долг рок. 

Банкарство: Минатата година ја започнавте и иницијативата „Finance Talks by EOS“. Се чини дека го погодивте моментот затоа што се чувствува една потреба од финансиска експертиза и помош за надминување на проблемите со ликвидноста и одржливоста на бизнисот, споделување искуства и идеи за надминување на актуелните предизвици и за отворање нови перспективи во услови на динамични промени на глобално ниво. Како можете да помогнете со една ваква иницијатива и дали сте задоволни од интересот и одзивот кај бизнисот, експертската јавност и носителите на закони за разговорите за финансиите?

Д-р Катерина Бошевска: Минатата година ја претставивме нашата платформа за размена на искуства и знаење “Finance Talks” во рамки на која создаваме простор за дискусија и размена на увиди на важни, актуелни теми во светот на финансиите. 

Очигледно е дека на македонскиот пазар му е потребно обединување на искуството и отворен простор за размена на успешни приказни и вредни алатки. Единствено на тој начин чинителите на пазарот ќе можат информирано и заеднички да придонесуваат кон економското закрепнување и успешно да се справат со предизвиците. Преку настаните и активностите кои ги организираме под името Finance Talks се ги носиме и преточуваме европските практики во домашниот пазар, да ги искористиме сознанијата и експертизата коишто ги поседува финансискиот свет во земјата. 

Сето ова, самата иницијатива Finance Talks постои благодарение на нашата експертиза како компанија којашто веќе 20 години делува на пазарот и директно и активно се залага за промени кон подобро. Преку нашата дејност не само што се обидуваме да изградиме свет без долгови, туку и да придонесеме кон ефективно градење на стабилен и здрав финансиски пазар. 

Редовната наплата на побарувањата е од огромно значење за самата економија. Влошениот тренд во последните неколку години со себе донесе големи последици за сите чинители на пазарот. Според нашите анализи дури 51% од компаниите во Европа се соочуваат со назадување на профитот, 42% известуваат за намалување на ликвидноста, а секоја петта компанија стравува за својот опстанок. Од друга страна пак, стапките на успех во процесот на управување со побарувањата на ЕОЅ Матрих, покажуваат дека со стручна помош, компаниите можат да ги ублажат последиците од лошите практики на плаќање. Со изминатите настани многу бргу воочивме дека потребата за иницијатива како што е „Finance Talks“ е навистина голема на пазарот. Добивме огромна поддршка од финансиските институции и друштва, од професионалците во областа, од медиумите, компаниите, како и од самата јавност. 

Банкарство: ЕОS како групација спроведува интересни и корисни истражувања како на пример истражувањето „Европски платежни навики 2022“, и студијата на EOS „Граѓаните на Европа соочени со финансиски потешкотии?“ која ја презентиравте оваа прилет. Каде е Северна Македонија во однос на европските состојби?

Д-р Катерина Бошевска: Клучните факти и бројки на истражувањето Европски Платежни Навики покажуваат дека ситуацијата во Европа се влошува и овој тренд не се очекува да запре. Севкупно, навиките за плаќање во поглед на трансакциите меѓу деловните субјекти и потрошувачите и меѓу деловните субјекти во Европа значително се влошија во последните неколку години. Во моментов, секоја петта фактура во Западна Европа и секоја четврта фактура во Источна Европа или се плаќа доцна или воопшто не се плаќа. Главните последици од овие доцнења и заостанати плаќања се тоа што компаниите мораат да се справуваат со сопствените проблеми со ликвидноста (42 проценти) и намалувањето на добивката (51 проценти). За да компензираат, околу една третина од компаниите мораа да ги намалат инвестициите и да ги зголемат цените. Додека во 2019 година, 22 проценти од испитаниците во истражувањето сè уште претпоставуваа дека навиките за плаќање ќе се подобрат, 24 проценти од сегашните испитаници сметаат дека навиките ќе станат уште полоши. Локален осврт на компаниите во земјата обезбедивме на последниот настан во рамки на платформата за која зборувавме предмалку – „Разговори за финансиите“ („Finance Talks“) каде ЕОЅ Матрих претстави анализа според која  има влошување на ликвидноста од 2020 кон 2022 година. Очекувањата се дека ќе има дополнително влошување на ликвидноста и ќе се зголемат деновите за исплата на обврските спрема кредити што ги имаат компаниите. 

Последно актуелно истражување на Групацијата ЕОС беше на тема „Дали граѓаните на Европа имаат финансиски проблеми?“ и тоа има за цел да ја претстави финансиската состојба на потрошувачите ширум Европа и да покаже што компаниите и банките  треба да знаат за оптоварувањето на потрошувачите. Во истото беа анкетирани 7.700 потрошувачи во 13 европски земји. Некои од фактите кои би сакала да ги споделам овде се дека околу една петтина од луѓето се задолжиле во изминатите шест месеци, при што инфлацијата и трошоците за енергија се главните причини за новите задолжувања. Мнозинството граѓани на Европа се загрижени за својата финансиска иднина и како резултат на зголемените стапки на инфлација како и енергетската криза тие се сега далеку посвесни за цените во моментот на пазарење. Она што особено не’ прави горди на ова последно истражување е дека и нашата земја се најде во групата на 13 европски земји каде се спроведе истото. За повеќе детали и факти ве упатувам на нашите страници затоа што има многу што да се каже и многу паралели, а овде просторот не ни дозволува да опфатиме деталните резултати од истражувањето.

Секако, сите увиди од нашите истражувања ни помагаат подобро да ги предвидиме состојбите на пазарот и да понудиме иновативни решенија кои најдобро одговараат на моменталните потреби на пазарот. 

Банкарство: Кои се најголемите предизвици со кои се соочи финансискиот сектор во земјава во изминатиот период, па и ќе се соочи во следниот период? Кои се, во тој контекст, и предизвиците и плановите на компанијата EOS Matrix Macedonia? 

Д-р Катерина Бошевска: Во овој момент инфлацијата претставува најголемата грижа за иднината. За жал, борбата со инфлацијата не е воопшто при крај иако можеби навидум така изгледа. Мерките за соочување со зголемените цени за енергијата кои значеа контролирање на потрошувачката за овој ресурс не се баш најсоодветни кога станува збор за одговор на инфлација создадена од кусоци на понуда на многу други потрошувачки добра освен енергија. Се чини дека е потребна нова монетарна политика која ќе ја ограничи потрошувачката. Во финансискиот сектор, вистинската загриженост е што ќе се случи кога инфлацијата ќе предизвика забавување на економскиот раст, што и природно следи по инфлација, време кога сите нејзини ефекти ќе станат очигледни. Од оваа перспектива, можни се три последици: забавување на растот на обемот, повеќе трошоци и поголема застареност на пласираните побарување. 

Банките како главни чинители на финансискиот сектор исто како и компаниите ќе се соочат со зголемени трошоци и нивното влијание на профитот ќе зависи од степенот до кој тие тоа ќе можат да го пренесат кон своите клиенти. Затоа се очекува дека услугите на банките ќе поскапат, каматните стапки ќе продолжат да растат и во една таква околност банките нема да бидат особено мотивирани да ја привлечат вишокот парична маса преку депозити, а населението ќе се ориентира кон зголемен обем на готовински трансакции, што на некој начин и се потврди во нашето истражување Европски платежни навики. Ваквата ситуација може да доведе до зголемена сива економија и на тој начин дерогирање на една фискална политика која пак е пресудна за стабилно и мирно функционирање на економскиот систем. Од тука, главниот предизвик според мене би бил да се исконтролира потрошувачката и тоа преку насочување на понудата и зачувување на протокот на парична маса низ поставениот фискален систем.

На ниво на компанијата ЕОS, главниот предизвик ни се околностите, условите во кои функционираме. Нашата компанија спроведува специфична дејност која е потребна на високоразвиените економии каде сите се претежно специјализирани во својата работа и не се фокусираат на споредни активности и операции, што за жал не е така кај нас. 

Во нашата економија се уште сметаме дека со популистички мерки ќе се држи задоволено населението без при тоа да водиме сметка за штетноста на таквите политики или дали тие ќе предизвикаат однесување на населението кое може да доведе до хаос и безредие. Од тој контекст сметам дека ни е потребно приоритетно усогласување на нашата финансиска регулатива со законската рамка на ЕУ и доследно нејзино применување. Впрочем, тоа и нам како европска компанија ни е потребно за да понудиме решенија, и нови продукти кои посеопфатно ќе придонесат кон решавање на кредитниот ризик на финансиските чинители. 

Слични Теми:

Интервјуа

Интервју | АНТОНИО АРГИР: Групацијата НЛБ прерасна во регионален пионер во областа на напредните дигитални плаќања

Објавено

пред 1 месец

на

Во денешниот дигитален пејзаж кој брзо се развива, точката во која се вкрстуваат финансиите и технологијата го обликува начинот на кој спроведуваме трансакции. Еден од пионерите во оваа област е г-дин Антонио Аргир, искусен експерт со длабоко разбирање на дигиталните платежни системи.

Со фокус на теми како што се Apple Pay, Google Pay, NLB Smart POS и поширокиот спектар на дигитализација, Аргир носи богатство на знаење и детален увид во овие дејности.

Во ова ексклузивно интервју, навлеговме во нијансите на овие трансформативни технологии, истражувајќи го нивното влијание врз потрошувачите, бизнисите и иднината на финансиските екосистеми.

Во продолжение разговараме со г-дин Антонио Аргир, член на УО на НЛБ Групација, одговорен за управување со групацијата, плаќања и иновации.

Банкарство: Неодамна НЛБ го имплементираше Apple Pay во Словенија. Кажете ни малку повеќе за опциите што Apple Pay им ги нуди на клиентите? 

Антонио Аргир: Така е, ние сме исклучително горди што на крајот на февруари во Словенија ја овозможивме услугата Apple Pay за корисниците на НЛБ. Реакциите кои ги добиваме од клиентите се многу позитивни, бидејќи клиентите навистина со нетрпение ја очекуваа оваа услуга. Со овозможувањето на Apple Pay, НЛБ дополнително ја зајакна својата позиција како дигитално напредна банка. Сепак, ова не е единствената иновација што ја воведовме во НЛБ Групацијата во последната година. 

Дефинитивно би го споменал и воведувањето на услугата Google Pay, воведувањето на новата повеќеканална дигитална банка Клик која овозможува исто корисничко искуство на сите уреди, односно и на паметните телефони и на компјутерите, и последно, но не и најмалку важно, лансирањето на NLB Smart POS решението кое овозможува паметно користење на телефоните и како ПОС терминал. Со сите решенија што ги нудиме, клиентите секогаш ги имаме во нашиот фокус. На нашите клиенти сакаме да им го понудиме најдоброто корисничко искуство кое можат да го добијат на пазарот. 

Оценувам дека НЛБ Групацијата во последниот период навистина презеде решителни чекори на патот кон обезбедување на најдобро корисничко искуство за своите клиенти на сите пазари каде што работи, вклучително и во Македонија. Амбицијата на НЛБ е секако многу поголема и поширока. Сакаме што поскоро да ја овозможиме услугата Apple Pay и на другите пазари, секако и во Македонија. Желбата е слична како во случајот со услугата Google Pay, кога практично НЛБ Групацијата прва ја донесе глобално популарната услуга на пазарите во Северна Македонија, Црна Гора и Босна и Херцеговина. 

Со Google Pay докажавме колку е значајна улогата на НЛБ Групацијата и каква системска позиција имаме во однос на глобалните технолошки компании, како и на локалните пазари каде што работиме. Така, слично на Google Pay, сакаме да ја направиме услугата Apple Pay достапна за сите наши клиенти во регионот кој го нарекуваме наш дом. НЛБ Групацијата сака на клиентите да им ги понуди најнапредни решенија за дигитално банкарство, а во исто време да обезбеди најдобро корисничко искуство, кое е безбедно и доверливо. 

Apple Pay е чекор на овој пат, бидејќи со услугата Apple Pay можете брзо, лесно и безбедно да плаќате со НЛБ картичките директно со вашиот iPhone или други уреди на Apple. Можете да плаќате и на ПОС терминали и онлајн. Користењето на Apple Pay е многу лесно, бидејќи клиентите едноставно го доближуваат својот iPhone или Apple Watch поблиску до терминалот за плаќање. Кога плаќате онлајн и преку апликации, информациите како што се вашето име и презиме и адреса се пополнуваат автоматски. Apple Pay користи безбедносни карактеристики вградени во вашиот Apple уред, вклучувајќи Face ID и Touch ID, кои се дизајнирани така што само вие можете да одобрувате плаќања.

Банкарство: Дали е достапна дигитализацијата на платежните картички за сите брендови (Mastercard/Visa) и дали крајниот корисник има некакви почетни трошоци, т.е. цена по трансакција? 

Антонио Аргир: Во Словенија, НЛБ Групацијата обезбедува Apple Pay услуги и за Visa и за Mastercard картички. Истата амбиција ја имаме и за останатите пазари каде што работи НЛБ Групацијата. Apple Pay е достапен бесплатно за нашите клиенти, нема дополнителни трошоци за клиентите кои користат ја користат оваа услуга. 

Банкарство: Кога реално може да очекуваме Apple Pay во Македонија? Дали Apple Pay моментално се имплементира во НЛБ Банка Скопје? 

Антонио Аргир: Имплементацијата на услугата Apple Pay се одвива истовремено за останатите членки на НЛБ Групацијата. Се надеваме дека и другите банки од нашата Групација, за кои Банкарт обезбедува услуги за обработка на картички и банкомати, ќе можат да воведат Apple Pay за релативно краток временски период. Услов за имплементација на услугата е секако присуството на Apple Pay на секој пазар, што е исклучиво одговорност на Apple. Apple Pay сè уште не е достапен на пазарите во Северна Македонија, Босна и Херцеговина и Косово, па НЛБ Групацијата води интензивни разговори со Apple со цел што поскоро да ги отвори овие пазари за нивните производи. Врз основа на успешната имплементација во Словенија, сметам дека сме на добар пат да го донесеме Apple Pay и во Македонија.

Банкарство: Дали мислите дека имаме потенцијал да го користиме овој паричник во Македонија? Колку корисници со iPhone реално може да се очекува да ги дигитализираат своите картички преку Apple Pay, имајќи предвид дека во Македонија во септември 2023 година се дигитализирани само 29.000 дебитни и 14.000 кредитни картички? 

Антонио Аргир: Групацијата НЛБ е регионален пионер во областа на напредните дигитални плаќања. Уверен сум дека има голем потенцијал за раст на мобилните плаќања како на македонскиот, така и на другите регионални пазари. Овој вид на плаќање носи многу предности за клиентите, но и за продавачите и последно, но не и најмалку важно за државата, бидејќи го намалува уделот на сивата економија.

Токму поради ова, сметам дека земјите исто така треба да преземат поактивен пристап кон промовирање на дигиталните и безготовински плаќања, бидејќи уделот на овие плаќања во регионот е далеку под европскиот просек. По воведувањето на услугата Google Pay, а сега и услугата Apple Pay и со тоа подобреното корисничко искуство, бројот на дигитализирани картички меѓу корисниците на НЛБ во Словенија расте исклучително брзо. Од воведувањето на Google Pay минатиот јуни, бројот на дигитализирани картички меѓу корисниците на НЛБ во Словенија се зголеми за повеќе од четири пати до крајот на 2023 година, а тој број сè уште расте. 

Податоците за Apple Pay се уште поимпресивни, бидејќи корисниците на НЛБ дигитализираа повеќе од 30.000 картички само во првата недела. Подобреното корисничко искуство и популарноста на Google Pay меѓу корисниците на НЛБ во Словенија се докажува со фактот дека уделот на бесконтактните плаќања со мобилни и паметни часовници е двојно поголем од минатогодишниот просек. Сè уште немаме податоци по воведувањето на Apple Pay, но врз основа на бројот на дигитализирани картички, претпоставуваме дека процентот на плаќање преку мобилен и паметен часовник значително ќе се зголеми. Истовремено, неопходно е да се истакне и фактот дека во овој период обемот (износот) на трансакциите на клиентите на НЛБ направени со паметен телефон или паметен часовник исто така е повеќе од двојно зголемен. Сигурни сме дека ќе бидеме сведоци и на сличен тренд на брз раст на дигитализираните картички и трансакциите направени со овие картички и во Македонија.

Банкарство: Имајќи предвид дека ова интервју го спроведовме партнерски со АЕТМ Скопје, следното прашање е поврзано со нивното делување. Асоцијацијата за е-трговија преку своето делување се стреми да ги едуцира клиентите за бенефитите кои ги нуди е-плаќањето и дигитализацијата. Како ја оценувате работата на АЕТМ кога е во прашање овој сегмент на плаќања?

Антонио Аргир: Да потсетам дека НЛБ Банка Скопје е прва банка која на македонскиот пазар овозможи процесирање на плаќањата преку електронска трговија, практично уште во 2008 година, а денес банката има преку 50% пазарно учество во остварен волумен кога станува збор за онлајн плаќањата. На клиентите Банката им нуди стабилен, 24/7 достапен сервис за плаќање, но и низа дополнителни алатки и функционалности со цел корисниците да ги спроведат плаќањата на брз, едноставен и безбеден начин. 

За работата на Асоцијацијата, можам да дадам само позитивни оценки. Навистина сметам дека оваа организација, од нејзиното основање во 2017 година, е непоколеблива во своите напори да го катализира растот и напредокот на секторот за е-трговија. Би рекол, слично како што НЛБ е пионер во обогатување на финансискиот пејзаж со иновативни услуги и трансформација на традиционалното банкарство, така и Асоцијацијата за е-трговија е пионер во визионерски иницијативи и постојана потрага по иновации кои имаат трансформативно влијание на дигиталната трговија.

Преку регионалната улога која во моментов ја имам во нашата НЛБ Групација, имајќи подобар поглед и знаења за регионот, можам да кажам дека стратешките иницијативи на Македонската Асоцијација за е-трговија не само што ја поттикнаа индустријата напред, туку и поставија „златен стандард“ за сличните организации во регионот. 

Преку своите иновативни програми и посветеност кон извонредност, тие постојано демонстрираат длабоко разбирање на динамиката на пазарот, градејќи поволна средина за раст на овој сегмент, но и на сите останати чинители кои учествуваат во процесот на е-трговија, практично поттикнувајќи еден просперитетен екосистем кој придонесува за деловен успех.

Продолжи со читање

Интервјуа

Очекувања 2024 година | Д-Р ДРАГОЉУБ АРСОВСКИ, ТТК БАНКА АД СКОПЈЕ

Објавено

пред 3 месеци

на

На почетокот на тековната 2024 година, се обраќаме до банките во Република Северна Македонија со цел објавување на очекувањата на водечките банкари во нашата земја од аспект на предизвиците со кои ќе се соочат Банките во периодот што следи.

За таа цел во целост ги пренесуваме ставовите и очекувањата на д-р Драгољуб Арсовски, Претседател на Управниот одбор на ТТК Банка АД Скопје.

Банкарство: Кратка ретроспектива на изминатата 2023 година. Кои настани ја одбележаа годината, дали истата беше успешна за Вас и кои поуки ги извлековте?

д-р Драгољуб Арсовски: На почетокот на 2024 година размислуваме за изминатата година и како и секогаш, со голем ентузијазам гледаме кон иднината.

Предизвиците беа секојдневни, за жал, но ние, како мала Банка, успеавме да покажеме видлива финансиска отпорност, да напредуваме и да се бориме со нашата посветеност, со конкурентноста и со ефикасноста.

ТТК Банка ги приспособи своите стратешки и финансиски цели кон макроекономското окружување. Тоа доведе до зголемување на профитабилноста, надминувајќи ги очекувањата за раст и обезбедувајќи конзистентна вредност за нашите клиенти, вработени и акционери.

Со еден збор, 2023 година беше година на силни финансиски перформанси!

Како активен, стабилен и етаблиран учесник на македонскиот финансиски пазар, ТТК Банка успешно го заврши процесот на зголемување на основната главнина преку скрип емисија на нови акции по пат на приватна понуда, а истовремено Банката се посвети на обезбедување различни иновативни решенија кои носат корист за Банката на долг рок.

Во 2023 година депозитите од комитенти пораснаа за 18,8 %. Тоа е резултат на изградениот имиџ за нас како стабилен, доверлив и сигурен партнер. Изворите на средства и вкупната актива на Банката бележат пораст од 15,6 % при што e задржан и високиот квалитет на кредитното портфолио.

Напорите за подобрување на достапноста резултираа со двојно зголемена мрежа од над 80 банкомати, отворање две нови експозитури во Скопје и во Гевгелија, како и неколку релокации во рамките на мрежата којашто брои вкупно 7 филијали и 24 експозитури.

Без разлика дали сте во срцето на градот или на пооддалечена локација, ние ги покриваме вашите банкарски потреби.

Во условите во кои стопанисуваме, за ТТК Банка стабилноста има посебно внимание и приоритет. За нас тоа е содржано во нашето знаење и особената посветеност на тимот кој веќе долги години ефикасно функционира во иста насока.

Банката започна да ја зајакнува посветеноста кон начелата на ESG, преку интегрирање на концептот на одржливост во деловните процеси и производи. Воведовме наменски ЕКО-кредитни производи за физичките лица со цел да понудиме поддршка за полесна реализација на инвестициите за подобрување на енергетската ефикасност на нивните домови, за купување енергетски ефикасни производи и за купување еколошки превозни средства. Тоа долгорочно би придонело за намалување на емисиите на штетни гасови, за еколошки одржливи подобрувања на условите за живеење, заштеда на енергија, заштеда на трошоци и намалување на загадувањето.

Посветеноста на ТТК Банка кон достојно спроведување на стратегијата за општествена одговорност придонесе кон остварување многубројни позитивни придобивки за заедницата. Изминатата година исто така реализиравме повеќе работилници за финансиска едукација за околу 600 деца од повеќе градови коишто имаа за цел да ја подигнат свеста за значењето на финансиската писменост, да ги збогатат знаењата за финансиските производи и услуги и да влијаат на создавање здрави финансиски навики.

Банкарство: Краток коментар околу очекувањата за движењето на каматните стапки на кредитните/депозитните производи во 2024 година.

д-р Драгољуб Арсовски: Каматните стапки се секогаш под влијание на пошироките економски услови, вклучувајќи ги стапките на инфлација, политиките на централната банка и целокупното економско здравје.

Секоја финансиска институција поставува сопствена кредитна политика и ги одредува каматните стапки врз основа на каматната стапка на изворите на средства, регулаторните и оперативните трошоци, трошоците кои произлегуваат од изложеноста на ризик и очекуваната стапка на добивка.

Во основата на нашето постоење е нашата посветеност кон обезбедување разновидно и сеопфатно портфолио на производи со високо конкурентни услови. Разбираме дека нашите клиенти имаат уникатни финансиски потреби и веруваме во понудата на низа решенија кои ги задоволуваат тие различни барања.

Можеме да кажеме дека и во 2024 година ќе продолжи понудата на поволни и атрактивни каматни стапки.

Банкарство: Колку домашните банки се дигитализирани и дали заостануваат во овој процес во однос на банките од регионот/Европа?

д-р Драгољуб Арсовски: Банкарската индустрија претрпува значителна трансформација заради брзиот технолошки напредок и развојните очекувања на клиентите. Приспособувањето на идните банкарски трендови станува клучно за банките да ја одржат конкурентноста и да ги задоволат постојано променливите потреби на нивните клиенти.

Споредено со другите банки во регионот и во Европа, домашните банки се блиску до просекот во Европа, но сепак имаат простор за подобрување и, исто така, и тие би можеле да имаат корист од понатамошните инвестиции во технологијата, инфраструктурата и градењето свесност за клиентите.

Условите на локалниот пазар, регулаторните рамки и технолошката инфраструктура влијаат на темпото и природата на дигиталната трансформација во банкарскиот сектор.

Нашите онлајн платформи (електронското банкарство ТТК е-bank и мобилната апликација ТТК m-bank) обезбедуваат беспрекорно и безбедно банкарско искуство за нашите клиенти и ја зацврстија нашата позиција како банка којашто е силно посветена да понуди најповолни услови во дигиталното банкарство, сè уште без трошоци за активирање и за користење. Промовираме подобрено и ново ниво на искуство за нашите корисници, без временски и просторни ограничувања. Корисниците на ТТК Банка веќе имаат можност за тековен увид во состојбата на сметките, имаат можност да вршат плаќања со поголема брзина и со пониски трошоци и да орочуваат средства без доаѓање во банка.

ТТК Банка останува отворена и ќе продолжи да инвестира во новите технологии за дополнително подобрување на безбедноста и пристапноста за нашите ценети клиенти.

Континуираното иновирање и развојот на дигиталното банкарство, подобрувањето на квалитетот на услугата и искуството на корисниците остануваат императив со фокус на унапредување на продуктивноста и контролата на трошоците.

Банкарство: Наведете еден новитет што ТТК Банка АД Скопје ќе го имплементира во 2024 година и што очекувате од имплементација на истиот? Што можеме да очекуваме од ТТК Банка во 2024 година?

д-р Драгољуб Арсовски: ТТК Банка останува посветена на приспособување на динамиката на пазарот и развојните потреби на клиентите. Во таа насока продолжуваме со активно унапредување на понудата на производи и услуги со фокус на проширување на поволностите на понудата на кредитните производи за физички лица, платежните картички, осигурителните производи и пакетите производи со атрактивни, конкурентни и поволни услови дизајнирани да ја подобрат финансиската благосостојба и да ги поттикнат поединците да ги постигнат своите финансиски цели.

Иднината на банкарството е дигитална и ТТК Банка е целосно посветена да ја води оваа трансформација во насока на остварување на целите за развој на пристапи во продажбата, развој на производи и услуги и развој на дистрибутивните канали. Целиме кон беспрекорно, интуитивно и безбедно искуство преку развој на дигиталните канали што одговара на барањата на современиот клиент.

Согледувајќи ги околностите, ние веќе се позиционираме проактивно. Се фокусираме кон стабилно и профитабилно оперативно работење. Предвидуваме реален и остварлив раст во сите сегменти на работењето.

Зголемувањето на кредитното портфолио преку квалитетни пласмани е една од стратешките цели на ТТК Банка па оттука предност имаат клиентите со добар бонитет и квалитетни претприемнички идеи сo развоен потенцијал. Банката е секогаш подготвена да ја поддржи нивната ефикасност и успешност преку понуда на соодветни индивидуални решенија и производи, а сè со цел создавање стабилно и долгорочно партнерство.

2024 година ја започнавме со неколку активни промоции за кредитни производи за физички лица: атрактивните потрошувачки кредити со ниска фиксна каматна стапка во првите две години почнувајќи од 4,80% годишно, хипотекарните кредити со фиксна каматна стапка во првите три години од 4,00% годишно, супер станбениот кредит со фиксна каматна стапка во првите пет години од 3,20% годишно, односно со фиксна каматна стапка во првите десет години од 3,70% годишно без трошоци за одобрување и останати поволности.

Банката останува посветена и на иницијативите на одржливост и понудата на еколошки производи и одржливи банкарски решенија во согласност со нашата посветеност кон одговорноста за животната средина. Зелените опции за финансирање и еколошките дигитални иницијативи ќе бидат составен дел од нашата банкарска понуда.

Активно продолжуваме да ја спроведуваме стратегијата на општествено одговорна компанија преку реализација на спонзорства, донации како и организирање и поддршка на настани и проекти кои ќе придонесат за развој на посреќна и поуспешна заедница.

Продолжи со читање

Интервјуа

Очекувања 2024 година | МИЛКА ТОДОРОВА, УНИБАНКА АД СКОПЈЕ

Објавено

пред 3 месеци

на

На почетокот на тековната 2024 година, се обраќаме до банките во Република Северна Македонија со цел објавување на очекувањата на водечките банкари во нашата земја од аспект на предизвиците со кои ќе се соочат Банките во периодот што следи.

За таа цел во целост ги пренесуваме ставовите и очекувањата на Милка Тодорова, Претседател на Управниот одбор на УНИБанка АД Скопје.

Банкарство: Кратка ретроспектива на изминатата 2023 година. Кои настани ја одбележаа годината, дали истата беше успешна за Вас и кои поуки ги извлековте?

Милка Тодорова: Оваа година УНИБанка заокружи 30 години постоење на македонскиот банкарски пазар. Jубилеjната 2023 е уште една многу успешна година – jа завршивме со одлични резултати, наjдобрата година во историjата на банката. Како и во претходните години, бележиме пораст на активата како и на и добивката на Банката, која е исто така на досегашно рекордно ниво. Цената на акциjата на УНИБанка годинава се зголеми за 41%.

Во 2023 година УНИБанка е вклучена во MBI 10 на Македонската берза – една од 10-те компании што го формират индексот на берзата. И оваа година jа продолживме тенденцијата за доделување на дивиденда на акционерите – исплативме дивиденда од 282,97 МКД бруто по акциjа што претставува дивиденден тековен принос од 5,44 %.Издадовме нова, трета по ред, перпетуална обврзница во вкупен износ од 1.350.000 € -дополнителен капитал, наменет за одржување на нашите стратешки цели.

Успешната 2023 година и доброто работење на УНИБанка години наназад, одличниот имиџ и репутација кои ги ужива во јавноста и во деловното опкружување , придонесоа Банката да биде добитник на две значајни признанија од Македонска берза за 2023 година.

Првата награда е во категорија „Акција со најголем промет во 2023 година“, а втората за „Акција со најголем пораст на цената во 2023 година“ и двете во сегментот акционерски друштва под 50 милиони евра пазарна капитализација.

Во 2023 година продолживме континуирано да ги подобруваме услугите за нашите клиенти и корисничкото искуство:

  • Имаме нова, модерна веб страна, која сите продукти и услуги ќе ги направи уште поблиски и подостапни до потенцијалните клиенти;
  • Годинава целосно се заменети банкоматите на банката со нови, модерни и сите со функцијата chash–in – што овозможува 24/7 внес и изнес на готовина.
  • Воведени се нови функционалности на мобилното банкарство:
  • Моj Буџет, што го олеснува финансиското планирање на граѓаните;
  • Моментални плаќања во реално време со функциjата Плати на приjател;
  • Далечинска идентификација на нови и постоечки клиенти и користење на сите наши продукти и услуги – отворање сметка, кредити, депозити и др., без потреба од посета во експозитура, вклучувајќи и од странство.

Дополнително ја подобривме и ефикасноста на банката со воведување на неколку нови софтвери -за олеснување на комуникациjата со клиентите преку сите продажни канали и систем за оптимизациjа на работата со документи во банката.

Банкарство: Кои ќе бидат нови трендови во банкарскиот сектор во 2024 година во Македонија?

Милка Тодорова: Главните трендови во банкарскиот сектор за 2024 година ќе бидат поддршката и подготовката на економијата и граѓаните за подигитална и позелена иднина.

Дигитализацијата е тренд коj веќе неколку години е се посилно застапен – речиси сите банки овожможуват користење на своите продукти и услуги преку електронските канали 24/7 и овој тренд е веќе стандард во банкарското работење. Очекувам и во 2024 година да продолжат да се зголемуваат можностите за дигитален онбординг на клиенти, електронско аплицирање за кредитни продукти, моментални плаќања /плати на приjател/, депонирање готовина преку банкомат, плаќања со телефон, часовник и сл.

Следењето на принципите на еколошко, социјално и добро корпоративно управување (ESG), бара од банките уште поголем напредок во вклучувањето на климатските,еколошките и социјалните ризици во нашите постоечки стратегии и процеси за управување со ризик. Ние, банките, како и секоја компанија, мораме да се грижиме повеќе за планетата преку контролирање на нашето влијание врз животната средина и намалување на штетните емисии, со цел подобрување на здравјето и безбедноста на нашите клиенти, добавувачи и вработени.

Банкарство: Краток коментар околу очекувањата за движењето на каматните стапки на кредитните/депозитните производи во 2024 година.

Милка Тодорова: Позитивните сигнали за закрепнување на глобалните економски процеси и најавата за започнување на циклус на намалување на основните референтни каматни стапки на Американскиот Долар и Еврото од страна на Федералните Резерви во САД и ЕЦБ во ЕУ, креираат очекување кај мнозинството на економски аналитичари за почеток на процес на намалување на референтните камати во првата половина на 2024-та година.

Во таа насока на последна аукција за државни записи понудена е намалена каматна стапка кај краткорочните и долгорочните хартии од вредност за 0,15%. Ова исто така е сигнал дека во 2024-та чекориме во многу постабилна макроекономска состојба пред сè како резултат на намалена инфлација и позитивните макроекономски трендови кај девизните резерви и девизниот пазар.

Во моментот можеме да констатираме дека трендот на натамошно зголемување на основните каматни стапки е прекинат и доколку не се појават поголеми ризици, каматните стапки постепено би се намалувале на среден рок не само како резултат на монетарните каматни политики на централните банки,туку и како резултат на конкурецијата помеѓу банките за привлекување на квалитетни клиенти и градење на долгорочно депозитно јадро и квалитетно кредитно портфолио.

Од друга страна, сеуште сме сведоци на глобални воено-политички нестабилности, турбуленции на светските берзи, прекинати дистрибутивни канали за главните енергетски ресурси и храната, кои креираат ризици, што може да доведе до повторен процес на раст на инфлацијата и зголемување на каматните стапки.

Во таа насока, во 2024-та година банките како економски субјекти врз чие работење најмногу влијае каматната политика, можат да планираат благо релаксирање на каматните стапки согласно пазарните информации и континуирано да ги следат економските индикатори, заради потврда на стабилизарачкото движење на клучните економски индикатори, како и следење на можно повторно појавување на евентуалните ризици.

Банкарство: Колку домашните банки се дигитализирани и дали заостануваат во овој процес во однос на банките од Регионот/Европа?

Милка Тодорова: Домашните банки го следат чекорот со банките од регионот во делот на дигитализација, односно на нудење на своите услуги преку дигиталните канали.

Сепак, во споредба со Европа и регионот, домашните банки заостануваат во трендовите во иновациите во платежните услуги, пред сè поради недостаток на сервиси за брзи плаќања помеѓу домашните банки, а и користење на платежниот сервис СЕПА во рамките на Европа, со кој би се овозможила поголема брзина и ефикасност на плаќањата и овозможување на поголема конкуренција и фокус кон иновации.

Дополнителен предизвик на домашните банки е развојот и користењето на вештачка интелегенција (Artificial intelligence), како во делот на креирање на нови поволности за клиентите, така и во делот на унапредување на банкарските процеси. Користењето на вештачка интелегенција во домашните банки е на самиот почеток, но со оглед на стратегиските планови, се очекува застапеноста на истата во следниот период да се приближи до банките во регионот и Европа.

Банкарство: Наведете еден новитет што УНИБанка АД Скопје ќе го имплементира во 2024 година и што очекувате од имплементација на истиот?

Милка Тодорова: Оваа година, УНИ Банка со задоволство објавува успешна имплементација надоградување на мобилната банкарска апликација со алатката “Мој Буџет”.

Станува збор за ново, едноставно и ефикасно банкарско искуство за клиентите, кое има за цел да помогне во креирање на позитивни финансиски навики.

Како одличен финансиски советник “Moj Буџет” комуницира со клиентите преку персонализирани нотификации и совети кои помагаат за подобар увид и контрола на трошењето на личните средства и соодветно остварување на месечна заштеда.

Услугата е намената за секој поединец кој ги препознава бенефитите од новите технологии исака да има контрола врз трошењето, а истовремено да планира распределба и заштеда на личните средства, да има увид во своите навики на трошење и штедење и да ги менува кон подобро.

“Мој Буџет” е веќе достапна за секој корисник на мобилното банкарство на УНИБанка, преку најновата верзија на мобилната апликација.

Продолжи со читање

Популарно