Цената на златото во последните тргувања покажува мешани сигнали, додека инвеститорите внимателно ги следат техничките показатели и глобалните економски движења.

Според анализата на „Economies.com“, златото забележало раст во текот на последните внатредневни тргувања, поттикнато од формирање позитивна дивергенција кај индикаторите за релативна сила, откако цената претходно падна на нивоа што се сметаат за препродадени. Ова придонело за подобрување на моментумот и создавање позитивни сигнали кои ја поддржуваат тековната фаза на закрепнување.

Сепак, и покрај растот, златото се соочува со силен отпор кај 50-дневниот експоненцијален подвижен просек (EMA50), што засега го ограничува понатамошниот пораст. Во исто време, цената продолжува да се движи во рамки на краткорочен надолен тренд, што ја прави техничката слика неизвесна.

Аналитичарите оценуваат дека ќе бидат потребни посилни сигнали за да се потврди следниот правец на движење на златото, особено во услови на нестабилни глобални пазари и внимателно следење на монетарните политики на централните банки.

Во меѓувреме, позитивни сигнали се забележуваат и на девизниот пазар. Валутниот пар евро/долар (EUR/USD) доби поддршка од EMA50 и продолжи со краткорочниот раст. Техничките показатели покажуваат подобрување на позитивниот моментум, а аналитичарите сметаат дека следната важна цел за еврото е нивото од 1,1660 долари.

Паралелно со тоа, и биткоинот бележи зголемена нестабилност. Најголемата криптовалута се движи околу клучното ниво на отпор од 77.500 долари, при што пазарот се обидува да собере доволно позитивен моментум за пробивање на оваа граница.

Според техничката анализа, биткоинот дополнително добива поддршка од EMA50 и од пробивањето на краткорочната корективна надолна тренд линија. Индикаторите за релативна сила исто така покажуваат можност за формирање позитивна дивергенција, што кај дел од инвеститорите ги зголемува очекувањата за продолжување на растот.

Аналитичарите предупредуваат дека пазарите и натаму остануваат чувствителни на економските податоци, каматните стапки и глобалните геополитички ризици, што може брзо да го промени расположението кај инвеститорите.

Еврозоната би можела да се соочи со изолирани жаришта на финансиски стрес поради потресите на пазарите на кредити што ги одобруваат „нетрадиционални“ финансиски компании, но не и со системски ризик, оцени во вторникот Европската Централна Банка.

Одделни делови од американскиот пазар на кредити што ги одобруваат финансиски компании надвор од банкарскиот сектор во последно време покажале знаци на стрес, поради стравувањата од прекумерна изложеност кон софтверскиот сектор, се наведува во извештајот на ЕЦБ.

Неколку „многу видливи“ случаи на неисполнување на финансиските обврски ги нагласиле „слабите гаранциски стандарди“ во тој сектор, како и нетранспарентноста што може да ги прошири загубите и врз други учесници во традиционалниот банкарски систем.

Стресот на овие пазари би можел да претставува ризик за финансиската стабилност поради често нетранспарентната поврзаност на овие финансиски компании со традиционалните банки и друштвата за управување со средства.

Таквите пазари во еврозоната сè уште се помали отколку во САД, но во изминатите години бележеле силен раст, предупредуваат авторите на извештајот на ЕЦБ.

Сепак, се чини дека финансиските институции во еврозоната засега имаат ограничена директна изложеност на таквите кредити, па е малку веројатно тие сами по себе во моментов да претставуваат извор на системска финансиска нестабилност.

Одредени сектори би можеле индиректно да бидат изложени на стрес, предупредуваат авторите, посочувајќи на недоволно јасни показатели за висината и концентрацијата на изложеноста.

Неколку делови од финансискиот систем на еврозоната се изложени на ризик и одредени тензии можеби веќе се насетуваат, се наведува во извештајот.

Осигурителните компании и пензиските фондови би можеле, во неповолно сценарио, да претрпат поголеми загуби поради пошироко прелевање на ризикот врз кредитите со висок удел на долг, високоприносните обврзници и акциите, додава ЕЦБ.

Иако вкупната изложеност на еврозоната е мала, таа е концентрирана кај неколку големи играчи, се заклучува во извештајот.

Изложеноста на осигурителните компании е проценета на 211 милијарди евра, додека изложеноста на пензиските фондови изнесува 52 милијарди евра.

ЕЦБ исто така укажува на влошени изгледи кај одредени компании што се потпираат на кредити од „нетрадиционални“ финансиски компании, нагласувајќи дека ваков вид финансирање најчесто користат средни компании чиј долг не е оценет од независни агенции.

Често станува збор за компании кои и претходно имале проблеми со враќањето на долговите, а сега би можеле дополнително да бидат погодени во случај на забавување на економската активност.

Способноста на компаниите во еврозоната што се потпираат на кредити од „нетрадиционалниот“ сектор да ги сервисираат каматите од оперативните парични текови се влошила во последните години, предупредува ЕЦБ.

Тој тренд е забележлив и кај компаниите што се финансираат преку пошироките пазари на заеми со висок удел на долг и високоприносни обврзници, додека не е присутен кај компаниите што се потпираат на банкарски кредити.

Американскиот пазар на акции достигна размери без преседан во финансиската историја.

Според податоците од април 2026 година, вкупната пазарна вредност на компаниите котирани во САД изнесува повеќе од 75 билиони долари, што ја надминува комбинираната вредност на следните девет најголеми пазари на акции во светот.

Овие податоци се засноваат на пресметките на Блумберг за домашно котираните компании на главните берзи во секоја држава.

Американскиот пазар на капитал во последната деценија дополнително ја зацврсти својата доминација, пред сè благодарение на технолошките гиганти кои привлекуваат сè поголем дел од глобалниот инвестициски капитал.

Компании како Епл, Мајкрософт, Нвидија, Амазон и Алфабет денес се меѓу највредните компании во историјата. Нивните акции главно се тргуваат на Њујоршката берза и Насдак во Њујорк.

Најголемите пазари на акции во светот според вкупната пазарна вредност во април 2026 година се:

1. САД – 75,04 билиони долари
2. Кина – 14,84 билиони долари
3. Јапонија – 8,19 билиони долари
4. Хонгконг – 7,41 билиони долари
5. Индија – 4,97 билиони долари
6. Канада – 4,49 билиони долари
7. Тајван – 4,48 билиони долари
8. Јужна Кореја – 4,04 билиони долари
9. Обединето Кралство – 3,99 билиони долари
10. Франција – 3,45 билиони долари

Второпласираната Кина, со 14,84 билиони долари, располага со големи берзи во Шангај и Шенжен, додека петтопласираната Индија, со 4,97 билиони долари, главно се потпира на Бомбајската берза и Националната берза во Мумбаи.

Заедно, десетте најголеми пазари на акции претставуваат убедливо најголем дел од глобалната вредност на јавните пазари, што покажува колку инвестицискиот капитал е концентриран во мал број држави.

По САД и Кина следува Јапонија, со 8,19 билиони долари. Меѓу најголемите јавно котирани компании во оваа источноазиска земја се Тојота, Мицубиши и СофтБанк, кои се дел од индексот Никеи 225 на Токиската берза.

Зад Јапонија се наоѓа Хонгконг, со 7,41 билиони долари, кој долго време важи за финансиски центар на Источна Азија, особено како врска меѓу меѓународните инвеститори и компаниите од континентална Кина.

Во меѓувреме, вкупната пазарна вредност на Канада од 4,49 билиони долари во голема мера е концентрирана на Берзата во Торонто, третата најголема берза во Северна Америка.

Во последните години, бумот на вештачката интелигенција и поврзаните индустрии дополнително ја зајакна позицијата на земјите тесно поврзани со производството на полупроводници, особено Тајван, со 4,48 билиони долари, и Јужна Кореја, со 4,04 билиони долари.

Присуството на локалните гиганти ТСМЦ и Самсунг им помогна на овие земји да привлечат огромно внимание од глобалните инвеститори, што доведе до поголем прилив на капитал и побрз раст на пазарната вредност во споредба со земјите кои се помалку изложени на инфраструктурата за вештачка интелигенција.

Побарувачката поврзана со вештачката интелигенција веќе го преобликува глобалниот берзански поредок. Тајван и Јужна Кореја ги надминаа традиционалните финансиски сили како Обединетото Кралство, додека инвеститорите сè повеќе вложуваат капитал во производство на чипови и инфраструктура за вештачка интелигенција.