Институтот на овластени ревизори годинава одбележува две децении од своето основање, јубилеј што претставува значаен момент за развојот на ревизорската професија и финансиската транспарентност во Македонија. По тој повод, Ненад Тортевски во видео интервју за Bankarstvo.mk и FinSight зборува за состојбите на ревизорскиот пазар, улогата на ревизијата во современиот бизнис и предизвиците што ги носи новото време.

Во разговорот, Тортевски објаснува што всушност претставува ревизијата и колку е важна нејзината улога во создавање доверба во финансиските извештаи и корпоративното работење. Се осврнува и на развојот на професијата во Македонија, улогата на Институтот на овластени ревизори, како и на односот помеѓу глобалните ревизорски компании и домашните ревизорски друштва.

Интервјуто отвора и актуелни теми поврзани со иднината на професијата, интересот кај младите за кариера во ревизијата, процесот за стекнување лиценца, но и влијанието на вештачката интелигенција врз ревизорските услуги и професионалните стандарди.

Во услови кога финансиската отчетност и транспарентност добиваат сè поголемо значење, ревизијата останува еден од клучните столбови за доверба во бизнисот и финансискиот систем.

Целосното интервју со Ненад Тортевски е достапно на YouTube каналот на Bankarstvo.mk.

Новинар: Наташа Мерсовска

Разговараме со Снежана Станковиќ, претседателка на Управниот одбор на Сава пензиско друштво, за мерките што компанијата ги воведува со цел подобра поддршка на вработените и нивниот семеен живот.

Според неа, една од клучните политики на ниво на целата Сава осигурителна групација е токму поддршката на родителството и балансирањето помеѓу приватниот и професионалниот живот.

„Една од главните мерки што ги преземаме е заштитата на родителството преку правото на работа од дома“, вели Станковиќ.

Таа објаснува дека вработените имаат значителна флексибилност кога станува збор за организацијата на работата.

„Вработените имаат право 25 дена во еден квартал да работат од дома“, посочува таа.

Дополнително, компанијата овозможува и продолжување на ова право во ситуации кога е потребна поголема семејна поддршка.

„Постои можност за продолжување кога причината е родителство, грижа за мало дете или присуство дома поради потесното семејство“, објаснува Станковиќ.

Според неа, ваквите политики не се само бенефит за вработените, туку и важен чекор кон создавање поздрава и поодржлива работна средина.

„Поддршката на семејството и родителството денес е суштински дел од модерното корпоративно работење“, нагласува Станковиќ во разговорот за FinSight.

Разговараме со Снежана Станковиќ, претседателка на Управниот одбор на Сава пензиско друштво, за предизвиците со кои се соочува пензискиот систем и демографските трендови кои влијаат врз неговата одржливост.

Според неа, бројките јасно покажуваат дека традиционалниот модел на финансирање на пензиите станува сè потешко одржлив.

„Првиот столб повеќе не може целосно да ја исполни својата обврска. Тоа значи дека сите ние како граѓани сме загрозени во периодот кога нема да бидеме работно активни“, вели Станковиќ.

Таа потсетува дека во минатото системот функционирал во сосема поинакви економски и демографски услови.

„Во времето кога првиот столб бил функционален, три до четири вработени ‘издржувале’ еден пензионер“, објаснува таа.

Но денес, додава Станковиќ, реалноста е значително променета.

„Во Македонија денес имаме сооднос од околу 1,7 вработен на еден пензионер“, посочува таа.

Според неа, овие податоци не бараат сложени анализи – статистиката сама по себе го покажува притисокот врз системот.

„Зборуваме за бројки што јасно ја покажуваат насоката во која се движи општеството“, вели Станковиќ.

Слични трендови, нагласува таа, се присутни и на европско ниво.

„Проценките биле дека во Европа во 2040 година двајца вработени ќе издржуваат еден пензионер, но денес тој сооднос веќе е околу 1,5 спрема 1“, објаснува таа.

Прогнозите за следните децении се уште позагрижувачки.

„Во 2050 година се очекува само 1,17 вработени да издржуваат еден пензионер“, предупредува Станковиќ во разговорот за FinSight.

Според неа, токму овие демографски промени ја отвораат потребата од нови модели на штедење, инвестирање и долгорочно планирање на пензиската сигурност.