Комисијата за хартии од вредност на последната седница одржана на 4 октомври, донесе Решение со кое на Друштвото за управување со отворени и затворени инвестициски фондови НЛБ Фондови АД Скопје му даде одобрение за организирање на отворен инвестициски фонд „НЛБ Обврзници“.

„Сопственици на удели во новиот фонд можат да бидат домашни и странски институционални и индивидуални инвеститори, кои сакаат да вложат средства на период до 3 години  во инструменти со фиксен доход (државни и корпоративни обврзници) и да остварат атрактивен принос. Средствата на фондот ќе бидат инвестирани во депозити во овластени банки во земјава кои достасуваат во рок кој не е подолг од една година, краткорочни и долгорочни должнички хартии од вредност, државни и корпоративни обврзници, обврзници на издавачи (80% – 100%), удели во други отворени инвестициски фондови регистрирани во Република Северна Македонија или држави  кои се членки или не се членки на ЕУ и на ОЕЦД, под услов надоместокот за управување да не надминува 1% од нето вредноста на имотот на тој фонд на годишно ниво (0% -10%)  и пари на сметка (0% – 20%)“, се вели во соопштението од 46-та седница на КХВ.

Депозитарна банка на отворениот инвестициски фонд „НЛБ Обврзници“ е НЛБ Банка АД Скопје.

Генерали Инвестментс АД Скопје стана дел од NLB Групацијата, а во рамките на тоа и дел од семејството на друштвото за управување NLB Skladi.

“Со гордост истакнуваме дека станавме дел од тим со исклучителен успех. NLB Skladi е најголемата компанија за управување со фондови во Словенија и лидер на пазарот според вкупните средства под управување. Со ова, Вие добивате поддршка од регионален гигант во финансискиот сектор.

Професионалниот тим што Ви стои на располагање останува ист. Придобивките што ги уживавте досега остануваат непроменети, а дополнително добивате пристап до широк спектар на услуги што ги нуди една од водечките финансиски институции во регионот.” – се вели во соопштението од компанијата.

Новото име на компанијата е Друштво за управување со отворени и затворени инвестициски фондови НЛБ Фондови АД Скопје. Компанијата има ново лого и веб-страница www.nlbfondovi.mk.

Генерали инвестментс АД Скопје е трето по големина друштво за управување со инвестициски фондови на македонскиот пазар, со пазарен удел од околу 18%. Компанијата управува со приближно 37 милиони евра средства на клиентите во 4 различни инвестициски фондови (два акциски, еден паричен и еден комбиниран).

Откако претходната година беше објавена информација дека НЛБ Склади, управување со средства д.о.о. склучи купопродажен договор со компанијата Генерали инвестментс за купување на мнозинската сопственост на компанијата Генерали инвестментс АД Скопје беше јасно дека по комплетирање на трансакцијата ќе следува и промена на називот на Друштвото.

По добивање на Решението од Комисијата за хартии од вредност за измена на називот на фирмата и Статутот на Друштвото Генерали Инвестментс АД Скопје сега веќе официјално започна со работа НЛБ Фондови АД Скопје.

“Во однос на обврската за известување од член 166-б, став 1 од Законот за хартии од вредност, Ве известуваме дека врз основа на Решението од Комисија за хартии од вредност на Република Северна Македонија број УП1 08-60 на ден 22 јули 2024 година се дава согласност за измена на назив на фирма и измени на Статут на Друштвото за управување со отворени и затворени инвестициски фондови Генерали Инвестментс АД Скопје. Новиот назив на Друштвото гласи: Друштвото за управување со отворени и затворени инвестициски фондови НЛБ Фондови АД Скопје, а скратениот назив на Друштвото гласи: НЛБ Фондови АД Скопје”, се вели во соопштението објавено на Македонска берза.