ПроКредит Банка, во партнерство со Европската банка за обнова и развој (ЕБОР), го започна серијалот на работилници за градење вештини за жени претприемачи со темата „Ефикасно одредување цени и прилагодување на цените на производите и услугите“. Настанот, кој се одржа во просториите на банката, беше организиран како дел од програмата „Жени во бизнис“, која има за цел да ги поддржи жените претприемачи во Македонија, не само преку понуда на финансиски услуги, туку и преку едукативни и консултативни активности.

Преку интерактивното предавање на Гојко Вучиниќ, виш финансиски експерт од Frankfurt School of Finance and Management, учесниците се запознаа со практични и корисни совети за управување со цените како еден од клучените фактори за одржливост и конкурентност на бизнисите. Учесничките имаа можност да научат за различни методи на одредување цени, анализа на деловни и ценовни стратегии, како и техники за адаптирање на цените во зависност од пазарните услови.

Дополнително, учесниците имаа можност да слушнат инспиративна претприемничка приказна од Загорка Блажевска, сопственичка на „Вита Нова“, која го сподели својот пат од идеја до успешен бизнис.

„Финансиската едукација е клучен фактор за развојот на претприемачките капацитети на жените во Македонија. Програмата Жени во бизнис и иницијативи како оваа работилница се само дел од палетата нефинансиски услуги кои ги нудиме на нашите клиенти, а  кои  заедно со финансирањето се клучни за градење стабилни и конкурентни бизниси кои ќе го поттикнат економскиот раст“, изјави Ана Николова, Директор на сектор за мали претпријатија во ПроКредит Банка.

Свое обраќање имаше и Маја Столевска Костадинова, Менаџер на националната програма за советување на бизниси при ЕБОР, која ја потенцираше стратешката поддршка која Европската Банка за обнова и развој ја дава на локалната економија преку систематизирани иницијативи за помош на локалните бизниси за дигитализација, инклузија и зелени инвестиции.

Програмата Women in Business нуди целосен пакет на финансиски услуги прилагодени на потребите на жените претприемачи, вклучувајќи олеснет пристап до финансии без потреба од колатерал, консултативна поддршка од личен банкарски советник, комплетни решенија за дигитално банкарство и дополнителни бенефити за бизнисот и вработените. Покрај финансиските услуги, програмата нуди и нефинансиски услуги како едукативни работилници, менторства и настани за вмрежување. Овие активности им овозможуваат на жените претприемачи да се поврзат со истомисленици и да ги прошират своите професионални мрежи.

Семинарот претставува уште еден чекор кон зајакнување на улогата на жените во деловниот свет, а ПроКредит Банка и ЕБОР повторно ја покажаа својата посветеност на создавање на подобри услови за претприемачките во нашата држава.

За повеќе информации за програмата „Жени во бизнис“ посетете ја веб-страницата на ПроКредит Банка.

Банкарските системи во регионот успешно се справија со кризата, а нивната отпорност дополнително беше зајакната, обезбедувајќи им финансиска поддршка на економиите. Во однос на македонскиот банкарски систем, и покрај кризите адекватноста на капиталот беше зајакната, нефункционалните кредити се намалија на историски ниски нивоа, ликвидноста и натаму е солидна и стабилна, а кредитирањето е на солидно ниво. Ова покажува главно дека банкарскиот систем има капацитет да обезбеди поддршка за економскиот раст, особено за инвестициите. Сепак, пристапот до финансии треба уште да се подобрува, а нивото на кредитната активност треба и натаму да се зголемува. Во регионот на Западен Балкан учеството на кредитите во БДП е во распон од 45 до 55% од БДП, а во ЕУ над 80% од БДП. Ова го посочи гувернерката на Народната банка, Анита Ангеловска-Бежоска на панел-дискусијата на гувернерите којашто се одржа во рамките на Банкарскиот самит, организиран од Здружението на банки на Србија во Белград. На панел-дискусијата покрај гувернерката учествуваа и нејзините колеги од регионот, гувернерката на Србија Јоргованка Табаковиќ, гувернерот на Хрватска, Борис Вујчиќ, како и вицегувернерот на Црна Гора, Никола Фабрис и вицегувернерот на Босна и Херцеговина, Марко Видаковиќ.

На панел-дискусијата беше посочено дека и покрај последователните кризи, и натаму има конвергенција на земјите од регионот кон ЕУ, но побавна. Гувернерката Ангеловска-Бежоска укажа на значителните економски загуби од кризите коишто се случија изминатите години, при што симулациите покажуваат дека доколку не се случеа, конвергенцијата би била повисока за 5 процентни поени, додека нивото на бруто домашниот производ би било повисоко за 8% на крајот на 2024 година. Притоа, доколку македонската економија и натаму расте со просечната историска стапка на БДП по глава на жител, ќе бидат потребни 40 години за да се достигне нивото на доход на ЕУ, што само укажува на важноста од што побрзо надминување на постојните структурни пречки за економскиот раст, за што ќе биде неопходно и соодветно финансирање.

Оттука, несомнено еден од факторите за забрзување на конвергенцијата, покрај продуктивноста и работната сила, е и пристапот до финансии. На панел-дискусијата, гувернерката Ангеловска-Бежоска истакна дека според анкетата на ОЕЦД за напредокот во конвергенцијата, пристапот до финансии сѐ уште е предизвик за регионот, особено пристапот до алтернативни извори за финансирање. Индексот на ММФ којшто го мери не само квантитетот, туку и софистицираноста на финансиското посредување, покажува дека регионот е значително зад ЕУ. Оттаму, понатамошното унапредување на финансиското посредување во регионот ќе биде помеѓу приоритетите за забрзување на конвергенцијата и во иднина.

Гувернерката Ангеловска-Бежоска посочи дека понатамошното унапредување на финансиското посредување во регионот може да се постигне преку поттикнување на домашното штедење, насочување на дел од готовинските заштеди во евра во финансискиот систем, зголемување на пристапот до надворешните извори на финансирање преку привлекување странски директни инвестиции во финансискиот систем, зголемување на конкурентноста, дигитализацијата и вклученоста, диверзификација на изворите за финансирање и понатамошна интеграција во европските финансиски системи, вклучително и преку пристапувањето во СЕПА, за што нашата држава веќе поднесе барање и наскоро очекува позитивен одговор од релевантните европски институции.

НЛБ Банка АД Скопје ги известува своите почитувани клиенти дека на социјалните мрежи се појави видео во кое се прикажуваат лични податоци кои се поврзуваат со НЛБ Банка.

По направената темелна анализа, се утврди дека овие податоци не потекнуваат од системите на Банката и нема нарушување на безбедноста на сервисите на Банката. Случајот е пријавен до сите надлежни институции за преземање на соодветни мерки.

Заштитата на информациите и средствата на клиентите е највисок приоритет на НЛБ Банка.

„Ги уверуваме нашите клиенти дека системите на Банката работат според најнапредните безбедносни стандарди и дека нивните податоци и финансиски средства се безбедни“, велат од НЛБ Банка.