Азиските берзи забележаа раст во четврток, поттикнати од силниот инвестициски ентузијазам околу секторот за вештачка интелигенција, додека глобалните пазари внимателно го следат самитот меѓу американскиот претседател Доналд Трамп и кинескиот претседател Си Џинпинг во Пекинг.

Инвеститорите позитивно реагираа на отсуството на нови трговски или геополитички тензии, што дополнително ги поддржа технолошките акции. Јапонскиот индекс „Nikkei 225“ достигна ново рекордно ниво, додека јужнокорејскиот „SK Hynix“, еден од милениците на вештачката интелигенција во Азија, продолжи со силниот раст, поддржан од глобалната побарувачка поврзана со вештачката интелигенција. „SK Hynix“ е на работ да достигне пазарна капитализација од 1 трилион долари, станувајќи втора јужнокорејска фирма по „Samsung“ што се пробива во клубот од трилиони долари. Акциите на „SK Hynix“ пораснаа за над 200% оваа година.

Европските фјучерси укажуваа на силно отворање, додека фјучерси за американските акции пораснаа за 0,13%.

На девизните пазари, кинескиот јуан се искачи на највисоко ниво во последните три години во однос на доларот, додека аналитичарите оценуваат дека стабилните односи меѓу САД и Кина засега го намалуваат ризикот за пазарите.

Сепак, инвеститорите остануваат претпазливи поради геополитичките тензии на Блискиот Исток и високите цени на енергенсите, кои повторно ги отвораат прашањата за инфлацијата и идните потези на централните банки.

Во меѓувреме, фјучерсите за суровата нафта „Брент“ беа малку повисоки на 105,89 долари за барел, додека фјучерсите за американската нафта „WTI“ достигнаа 101,33 долари за барел , далеку над нивоата пред војната.

Цените на нафтата забележаа пад во средата, прекинувајќи го тридневниот раст, додека инвеститорите внимателно ги следат случувањата околу нестабилното примирје на Блискиот Исток и најавената средба меѓу американскиот претседател Доналд Трамп и кинескиот претседател Си Џипинг во Пекинг.

Фјучерсите на суровата нафта од типот „Брент“ се намалија за 1,1% на 106,55 долари за барел, додека американската „WTI“ нафта падна на 101,02 долари за барел. И покрај корекцијата, цените остануваат на високо ниво поради стравувањата од прекин во снабдувањето и неизвесноста околу Ормутскиот теснец, низ кој поминува значителен дел од глобалната трговија со нафта и течен природен гас.

Аналитичарите оценуваат дека пазарот останува исклучително чувствителен на геополитичките случувања, а секоја нова ескалација би можела повторно да ги турне цените нагоре.

Во меѓувреме, повисоките цени на енергенсите дополнително ја засилуваат инфлацијата во САД, што ги поддржува очекувањата дека Федералните резерви ќе ги задржи или дополнително ќе ги зголеми каматните стапки подолг период.

Дополнителен притисок врз пазарите создава и падот на американските залихи на сурова нафта, што укажува на продолжени тензии во глобалното снабдување со енергенси.

Цената на златото забележа пад во средата, под притисок на посилните од очекуваните инфлациски податоци од САД, кои дополнително ги намалија очекувањата за намалување на каматните стапки од страна на ФЕД.

Спот цената на златото се намали за 0,3% и изнесуваше 4.702 долари за унца, повлекувајќи се од највисокото ниво во последните три недели. Аналитичарите оценуваат дека растот на инфлацијата ги менува очекувањата на инвеститорите, при што сè повеќе се отвора можноста за задржување, па дури и дополнително зголемување на каматните стапки до крајот на годината.

Според „FedWatch“ алатката на CME Group, пазарите веќе пресметуваат 30% веројатност за ново зголемување на каматите до декември.

Инвеститорите со нетрпение го очекуваат Индексот на цените на производителите, закажан за објавување подоцна во текот на денот. Дополнителна неизвесност на пазарите внесуваат и геополитичките тензии на Блискиот Исток, како и најавениот состанок меѓу американскиот претседател Доналд Трамп и кинескиот претседател Си Џипинг во Пекинг, закажан да се одржи од четврток до петок.

Во меѓувреме, индиските фјучерси за злато и сребро скокнаа откако Њу Делхи ги зголеми увозните тарифи за металите на 15% од 6%, како дел од напорите за ограничување на купувањата во странство и намалување на притисокот врз девизните резерви на земјата.

Спот цената на среброто се зголеми за 0,2% на 86,68 долари за унца, откако го достигна највисокото ниво од 11 март претходно во текот на сесијата. Платината се намали за 1% на 2.106 долари, а паладиумот остана стабилен на 1.490,86 долари.