Банки
Добивката на ТТК Банка порасна за 2,9% и дојде до 1,76 милиони евра во 2024 година

Во периодот од 1 јануари до 31 декември 2024 година, ТТК Банка АД Скопје ја реализираше својата стратегија, работејќи во согласност со клучните цели и задачи утврдени во Деловната политика и во Финансискиот план за 2024 година.
Во текот на 2024 година, ТТК Банка АД Скопје успешно ги усогласи своите стратешки цели со променливите макроекономски услови, што доведе до зголемување на профитабилноста и обезбеди стабилна и континуирана вредност за сите засегнати страни – клиентите, вработените и акционерите.
Заклучно со 31 декември 2024 година, Банката забележа позитивен финансиски резултат од 108,3 милиони денари, што претставува пораст од 2,9% во споредба со истиот период минатата година. Овој успех е резултат на зголемените оперативни приходи од 3,6%, при што истовремено беа контролиран и расходите, кои пораснаа за 8,0%. Дополнително, исправките на вредноста на финансиските средства на нетооснова достигнаа 37,4 милиони денари, што ја потврдува финансиската стабилност на Банката и нејзината подготвеност да се справи со динамичните пазарни услови.
Финансиски остварувања на ТТК Банка
Во 2024 година, билансната сума на Банката достигна ниво од 11.015 милиони денари, што претставува значителен раст од 9,1% во споредба со претходната година. Планот е остварен со 105,5%.
Заклучно со 31.12.2024 година, евидентиран е пораст на кредитите и побарувања од други комитенти за 9,9% во однос на 31.12.2023 година. Порастот во најголем дел произлегува од зголемувањето на кредитирањето на физички лица за 13,1%, преку зголемени пласмани на потрошувачки и на станбените кредити. Планот за овој период е исполнет со 104,0%.
Депозитите на други комитенти изнесуваат 9.466 милиони денари и бележат пораст во однос на минатата година од 11,4%, што се должи на зголемувањето на депозитите по видување и на орочените депозити кај физичките лица за 13,8% и на зголемувањето на орочени депозити на финансиски друштва за 90,5%. Во однос на планот се остварени со 107,1%.
Нето-приходите од камати претставуваат основна компонента во формирањето на вкупните приходи од работењето на Банката. Остварените нето-приходи од камати во периодот од 1.1.2024 до 31.12.2024 година изнесуваат 344,9 милиони денари и во однос на планот се остварени со 101,4%. Во однос на истиот период минатата година, зголемени се за 37,4 мил. денари или 12,2%. Порастот, во најголем дел, се должи на зголемените каматни приходи од секторот Банки и Финансиски институции, како резултат на повисоките каматни стапки поставени од монетарната политика на Централната банка при остварен раст и на приходите од камати од секторите стопанство и домаќинства.
Нето-приходите од провизии и надоместоци за услуги во тековниот период изнесуваат 166,9 милиони денари. Најголемо учество во генерирањето на приходите од провизии имаат провизиите од домашниот платен промет, како и провизиите од картично работење. Приходите од провизија бележат годишен раст од 2,5%. Нето-приходите од провизии и надоместоци за услуги во однос на планот за овој период се остварени со 84,8%.
Нето-приходите од курсни разлики изнесуваат 15,7 милиони денари и бележат годишен раст од 1,1% како резултат на зголемениот обем на тргувања на девизниот и на менувачкиот пазар. Во однос на планот се остварени со 96,8%.
Останатите приходи од работењето на Банката изнесуваат 26,1 милиони денари и се пониски за 53,9% во однос на минатата година, како резултат, во најголем дел, од понискиот износ на приходи од капитална добивка од продажба на преземени средства во тековната година. Во однос на планот се остварени со 48,5%.
Вкупните оперативни трошоци во анализираниот период изнесуваат 417,6 милиони денари и се за 8,0% повисоки во однос на истиот период минатата година, како резултат на зголемените трошоци за плати и вработени, што ја одразува стратегијата на Банката за континуирано инвестирање во човечките ресурси и задржување на квалификуваниот персонал, како и на повисоките трошоци за амортизација, кои се резултат на инвестиции во инфраструктурата и технологијата. Во однос на планот се остварени со 99,6%.
Во споменатиов период, исправката на вредноста на финансиските средства и на посебната резерва за вонбилансна изложеност на нето-основа изнесува 37,4 милиони денари и таа соодветствува со обемот, структурата и квалитетот на пласманите на Банката. Во споредба со истиот период од претходната година, овој износ е на пониско ниво за 10 милиони денари, што претставува намалување од 21,3%, што е резултат на засилените активности на Банката во наплатата на кредитните пласмани.
Во текот на 2024 година прокнижена е загуба заради оштетување на нефинансиските средства во износ од 1,1 милиони денари.
Очекувања за претстојниот период
Најновите услови во економијата овозможуваат да се продолжи со претпазливо нормализирање на поставеноста на монетарната политика. Оттука, централните банки почнаа да ги олабавуваат затегнатите монетарни политики, што сигнализира дека каматните стапки ќе продолжат постепено да се намалуваат и во претстојниот период. И натаму треба да се следат ризиците поврзани со надворешното окружување, пред сè, цените на примарните производи, коишто сè уште се под влијание на нестабилниот геополитички контекст и климатските промени, а треба да се внимава и на ризиците од домашните фактори коишто можат да влијаат врз побарувачката и цените во следниот период.
Сегашната клима сугерира дека и во следниот период Банката и понатаму внимателно ќе ги анализира тековните макроекономски параметри, ќе ги следи мерките, активностите и предвидувањата на економските авторитети и на носителите на економските политики и на операторите, ќе ги усогласува интерните индикатори и ќе го приспособува нејзиното работење на пазарните услови, со фокус кон одржување на ликвидноста и на долгорочната стабилност.
Банката ќе продолжи да дејствува проактивно, фокусирајќи се кон стабилно и профитабилно оперативно работење врз основа на реални и на предвидливи очекувања. Кредитната активност се очекува да продолжи да се реализира преку работата со населението и со малите и средни претпријатија, паралелно со севкупното зајакнување на економската активност и на зголемената побарувачка за кредити. Притоа, Банката ќе ги презема сите неопходни активности за одржување на квалитетот на портфолиото, конкурентноста и развојот на понудата на производи и услуги, како и изнаоѓање флексибилни решенија приспособени на потребите на клиентите.
Креирањето одржливи и ефикасни процеси, посветеноста кон зголемување на квалитетот и ефикасноста во клиентската услуга и зголеменото клиентско задоволство, реализацијата на планираниот обем на активности предвидени со деловната политика, понудата на зелени кредитни производи приспособени на потребите на клиентите, натамошниот развој на дигитализација на процесите, надградбата на производите и услугите достапни преку дигиталните канали како и потпирањето на сопствените извори на финансирање и понатаму ќе претставуваат основа на деловната стратегија на Банката за 2025 година, при што и натаму депозитите од секторот население остануваат со доминантно учество во вкупните извори на средства.
Банки
Штип добива нова, модернизирана услужна единица на ПроКредит Банка

ПроКредит Банка и оваа година ја продолжува својата стратегија за модернизација, подобрување и ширење на својата мрежа низ Македонија, повторно отворајќи ја реновираната услужна единица во Штип. Лоцирана на ул. Тоше Арсов бр. 46, во централното подрачје на градот, оваа услужна единица нуди современо банкарско искуство и повисоко ниво на услуги за клиентите.
Реновираната услужна единица се одликува со модерен дизајн и функционалност, прилагодена на потребите на клиентите. Оваа локација е опремена со Зона 24/7, со современи банкомати кои им овозможуваат на клиентите самостојно да вршат банкарски трансакции во кое било време од денот, без разлика дали е викенд, празник или останати неработни денови. Клиентите можат да вршат уплата и исплата на денари и евра, внесување на дневен промет и користење на drop box сеф за депонирање поголеми суми на средства.

Покрај дигиталните поволности, клиентите имаат пристап и до стручниот тим на ПроКредит Банка, кој е достапен за консултации и поддршка секој работен ден од 08:30 до 16:30 часот.
„Реновирањето на нашата услужна единица во Штип е дел од нашата долгорочна стратегија за унапредување на банкарските услуги и зајакнување на односите со нашите клиенти, создавајќи простор кој овозможува поголема ефикасност, флексибилност и сигурност. Веруваме дека овие промени ќе придонесат за поголема практичност во банкарските операции кај граѓаните и продлабочување на соработката со компаниите од Штип,“ изјавија од ПроКредит Банка.
Банката останува посветена на својата мисија за овозможување на лесни и практични банкарски услуги за сите клиенти, истовремено вложувајќи во модернизација на своите физички објекти.

Повеќе информации за локациите на ПроКредит Банка можете да најдете на веб страницата ProCredit Bank – Експозитури и Банкомати
Банки
УНИБанка АД Скопје и Развојна банка на Р.С. Македонија потпишаа Рамковен договор за учество во кредитната линија за финансирање на инвестиции и развој на приватни трговски друштва, т.н. Унгарска кредитна линија

УНИБанка АД Скопје е една од банките во земјата преку која клиентите, правни лица, ќе може да аплицираат за поволен кредит за финансирање на инвестиции и развој на приватни трговски друштва.
Сметаме дека оваа кредитна линија има силна развојна и инвестициска компонента, и ќе допринесе за поттикнување на нови инвестиции во основни средства и поддршка на економскиот развој, иновации и инвестиции. Истите позитивно ќе влијаат врз економијата и ќе донесат нови вработувања, раст на БДП и сеопфатен економски раст и развој во државата.
Договорот потпишан со Развојна банка на Р.С. Македонија ќе ни овозможи пласман на кредитната линија согласно дефинираните критериуми на Владата.
Нашата соработка со Развојна банка на Р.С. Македонија, со оваа, како и со претходни кредитни линии, секогаш е во насока на зајакнување на македонската економија.
“Со кредитната поддршка на нови инвестиции во основни средства преку оваа линија придонесуваме кон јакнење на капацитетот на домашните субјекти, кон зголемување на позитивните ефекти од нивното работење, создавајќи долгорочен придонес за економски развој на земјата.
Целта е подобрување на вкупните перформанси, зголемена економска продуктивност и поголема конкурентност на претпријатијата. Веруваме дека во земјава има компании со голем економски потенцијал, со проекти кои можат да бидат конкурентни на светскиот пазар”, истакна Милка Тодорова, Претседател на Управен Одбор на УНИБанка АД Скопје.
Кредитот е со намена за нови инвестиции во основни средства, со фиксна каматна стапка од 1,95%, а максималниот износ на кредит изнесува 615.000.000 МКД при што се зема предвид и изложеноста кон поврзани лица. Кредитот е со максимален рок до 15 години, со вклучен грејс период до 3 години, без надомест за одобрување, управување и предвремена отплата.
ПР објава
Банки
Народната банка продолжува со финансиската едукација преку нов циклус предавања

Со почетокот на второто полугодие од учебната година, започнува и новиот циклус предавања на Народната банка од областа на финансиската едукација. Во современите услови на динамичен финансиски систем, финансиската едукација станува сѐ попотребна за сите граѓани. Токму затоа, финансиската едукација е дел од стратегиските цели на Народната банка, којашто преку обезбедување непрекинатост во процесот и постојано зголемување на опфатот на населението од различни целни групи, цели кон унапредување на финансиската писменост во земјава.
Во изминатите години, Народната банка преку активностите за унапредување на финансиската писменост, има одржано едукативни предавања за над 25.550 граѓани, од различни возрасти и образование, а исто така има изработено и голем број едукативни материјали во печатена и електронска форма, игра, квизови, инфографики и др. Интересот кај учениците за посета на Народната банка од година в година бележи раст, а се зголемува интересот и кај повозрасните граѓани за финансиска едукација.
За закажување предавање во делот на финансиската едукација, наставниците и професорите од основните и средните училишта и од факултетите треба да го пополнат формуларот којшто може да го најдат на страницата за финансиска едукација на Народната банка https://www.nbrm.mk/finansiska-edukacija.nspx и да го достават на е-адресата [email protected] , по што ќе бидат побарани за организација на предавањето. Предавањата се изведуваат на македонски, албански и на англиски јазик.
- Банкипред 2 недели
Комерцијална банка: Исплатата на пензиите за јануари започнува на 31 јануари
- Business Womanпред 2 месеци
Празничен оптимизам во пресрет на новите предизвици преку здрав раст, етичко и одговорно работење
- Банкипред 1 месец
Даниела Ѓоршевска нов член на Управниот одбор на Стопанска банка а.д. Битола
- Банкипред 2 недели
КОМЕРЦИЈАЛНА БАНКА ЈА ЗГОЛЕМИ ДОБИВКАТА ЗА НЕВЕРОЈАТНИ 40% – во 2024 година оствари добивка од рекордни 80,7 милиони евра!
- Банкипред 2 месеци
Континуиран растечки тренд на користењето на дигиталните канали за извршување на електронските плаќања
- Банкипред 2 недели
Халкбанк АД Скопје: Јануарските пензии се веќе исплатени!
- Банкипред 2 месеци
Дигитална зона 24/7 и нов современ изглед доби Филијалата на Комерцијална банка во Струмица
- Банкипред 2 месеци
Halk EZ Cashback за младите со динамичен стил на живот