Трите најголеми македонски банки ја завршија 2025 година со висока профитабилност и покрај сложеното макроекономско опкружување обележано со геополитички тензии, инфлациски притисоци и рестриктивна монетарна политика.

Комерцијална банка, НЛБ Банка и Стопанска банка АД Скопје покажуваат голема отпорност кон случувањата, ризиците и неизвесностите кои се забележливи и на глобално и на локално ниво. Геополитички тензии, инфлациски притисоци и рестриктивна монетарна политика не успеаја да ја разнишат позицијата на овие три финансиски институции.

Сепак, и покрај високата профитабилност под површината на апсолутните резултати се кријат различни стратегии за раст, управување со ризици и позиционирање на пазарот.

Комерцијална банка: конзистентна добивка и прецизна стратегија

Комерцијална банка АД Скопје ја потврди позицијата на најпрофитабилна банка во Македонија, со нето-добивка од 5,08 милијарди денари, што претставува раст од 3,1% во однос на 2024 година. Добивката пред оданочување од 5,63 милијарди денари е повеќе од 9% над планираното, што укажува на прецизно поставени проекции и силна оперативна дисциплина.

Остварениот резултат е особено значаен ако се земе предвид нестабилната глобална средина и внимателниот пристап на Народната банка. Комерцијална банка успеа да одржи високо ниво на профитабилност без агресивно зголемување на ризикот, што ја позиционира како банка со највисок степен на предвидливост и стабилност.

НЛБ Банка: профитабилен раст преку експанзија и пазарен удел

НЛБ Банка во 2025 година оствари нето-добивка од 4,88 милијарди денари, приближувајќи се до водечката позиција по профит, но со значително поразлична стратегија.

НЛБ Банка бележи силен органски раст, со зголемување на вкупната актива од 19,6%, кредитите од 21,9% и депозитите од 13,8%. Главен двигател на профитот е експанзијата на кредитната активност, особено кај населението, каде што Банката достигна доминантен пазарен удел – една од клучните цели во рамки на „Стратегијата 2030“.

Овој модел носи поголем потенцијал за идни приходи, но и повисока чувствителност на економските циклуси, што ја прави НЛБ Банка најдинамичниот играч меѓу трите водечки банки.

Стопанска банка АД Скопје: конзервативен пристап со фокус на отпорност и силна заштита

Стопанска банка АД Скопје ја заврши 2025 година со нето-добивка од 3,34 милијарди денари, што претставува намалување од 6,1% во однос на 2024 година. Издвоените 1,49 милијарди денари за резервации, се зголемени за 27% во однос на 2024 година и укажуваат на изразено конзервативен пристап во управувањето со ризиците.

Иако ова директно ја намали краткорочната профитабилност, стратегијата ја зајакнува отпорноста на Стопанска банка во потенцијално понестабилни идни услови.

Истовремено, растот на вкупната актива од 9% и пренасочувањето на средствата кон попрофитабилни пласмани и хартии од вредност укажуваат на активно управување со билансот и фокус на оптимизирање на приносот.

Каматите како најголем и најважен извор на профитот

Најважниот извор за банкарските приходи, врз кои најмногу се потпира и добивката, се каматите. Нето-приходите од камата, кај Комерцијална банка се зголемени за минимален 1 отсто и достигнуваат 6,03 милијарди денари, но нето-каматната маржа се намали на 3,55% во споредба со 3,85% една година претходно. Раст е евидентиран и во НЛБ банка, нето-каматните приходи на Банката забележаа раст за 6,6% споредено со претходната година и достигнуваат 4,95 милијарди денари. Приходите од камати се повисоки во однос на претходната година како резултат на зголемената кредитна активност на Банката во двата сегменти – правни лица и население.

Само кај Стопанска банка Скопје, која ја дава и најголемата кредитна поддршка, има пад од 13%, на 5,35 милијарди денари, како резултат на намалување на каматните стапки, зголемени трошоци за камати по депозити и трансфер на средства од сметки по видување кон орочени депозити.

Приходи од провизии

Од пресметаните и наплатени приходи од провизии кај трите најголеми македонски банки се слеале вкупно 3,75 милијарди денари (лани во истиот перод – 3,69 милијарди денари). Раст во овој сегмент има кај НЛБ банка за 6,6% споредено со претходната година, како и кај Комерцијална банка која евидентирала раст од 2,7%, и покрај значајното намалување на надоместоците за платежни услуги што банката ги спроведе во текот на годината.

Кај Стопанска банка АД Скопје се забележува големо намалување на нето-приходите од провизии, кои се пониски за 14 проценти, главно поради повисоки трошоци кон картичните процесори и намалени тарифи за дел од услугите во корист на клиентите.

Збирот од профитите на овие три банки за минатата година изнесува фантастични 13,35 милијарди денари или 217,1 милиони евра и бележат раст во однос на 2024 година за 13,06 отсто.

Трите најголеми банки во Македонија покажуваат различни модели на успех: Комерцијална банка е модел на стабилност и прецизност, НЛБ Банка се истакнува со динамичен раст и проширување на пазарот, а Стопанска банка гради отпорност преку конзервативно управување со ризиците. За инвеститорите и клиентите, ова значи дека македонскиот банкарски сектор останува стабилен, со различни стратегии за профит и раст, подготвен да се соочи со предизвиците на 2026 година.

Според податоците презентирани во Прегледот на Е-трговијата во Западен Балкан, 2025 година, изработен од страна на Асоцијацијата за е-трговија, 63.2% од интернет корисниците во земјата купувале онлајн во 2024 година, што ја позиционира Македонија меѓу водечките пазари во регионот по учество на онлајн купувачи, но се уште е под европскиот просек. Ова е силен сигнал за растечка побарувачката, но, извештајот покажува дека растот на е-трговијата не е доволен сам по себе. 

Клучното прашање е дали економијата е подготвена за следната фаза, а тоа е е-трговија поддржана од вештачка интелигенција (ВИ)? Вештачката интелигенција сè побрзо го менува начинот на кој функционираат бизнисите и пазарите на труд, а е-трговијата е меѓу секторите каде овие промени се највидливи. Од персонализирани понуди и паметен дигитален маркетинг, до оптимизација на логистика, управување со залихи и откривање измами овозможено од алатки на вештачката интелигенција која станува клучен двигател на конкурентноста во онлајн трговијата. 

Во таа насока во Прегледот на Е-трговијата во Западен Балкан, 2025 година анализиран е AI Preparedness Index (AIPI) – индекс кој го воведе Меѓународниот монетарен фонд во 2023 година и кој ја мери подготвеноста на земјите да ја применуваат вештачката интелигенција на одржлив и инклузивен начин. AIPI ги оценува земјите преку четири клучни столба:

● дигитална инфраструктура,

● иновации и економска интеграција,

● човечки капитал и политики на пазарот на труд,

● регулатива и етика.

Со резултат од 0,48, Северна Македонија значително заостанува не само зад просекот на ЕУ, но и зад балканските пазари, односно подобар AIPI има само од Босна и Херцеговина. Европските лидери како Данска, Холандија и Естонија покажуваат подготвеност со индекс над 0.76. Ова укажува дека бизнис-екосистемот сè уште нема доволно капацитет целосно да ја искористи вештачката интелигенција во е-трговијата за персонализација, автоматизација, анализа на податоци, логистика и управување со ризици. 

Главните ограничувања се поврзани со дигиталната инфраструктура, иновативниот капацитет и интеграцијата во глобалната дигитална економија, иако постојат позитивни сигнали во делот на човечкиот капитал и адаптацијата на пазарот на труд.

„Е-трговијата во Северна Македонија бележи силен раст, но следната фаза мора да биде фокусирана на квалитет, доверба и одржлив развој, не само на квантитет. Вештачката интелигенција не е технологија на иднината, таа е реалност денес што го менува начинот на кој функционира дигиталната економија. Нашата задача е да им помогнеме на е-трговците, институциите и потрошувачите да бидат подготвени за оваа трансформација, преку приближување на клучните трендови и континуирана едукација, иницијативи и кампањи“, изјави претседателката на Асоцијацијата за е-трговија во Северна Македонија, Нина Ангеловска Станков.

Прегледот на Е-трговијата во Западен Балкан, 2025 годинајасно укажува дека идниот раст на е-трговијата во земјата зависи од подготвеноста на македонските е-трговци да ја искористат таа трансформација за одржлив раст, поголема конкурентност и подобра заштита на потрошувачите.

Инаку, Прегледот на Е-трговијата во Западен Балкан, 2025 година е изработен од Асоцијацијата за е-трговија (АЕТМ) и беше традиционално презентиран на 8-та регионална конференција за е-трговија. Како седмо издание од серијата, оваа публикација по втор пат е објавена на англиски јазик и со проширен фокус кој го опфаќа целиот регион на Западен Балкан: Албанија, Босна и Херцеговина, Косово, Црна Гора, Северна Македонија и Србија. 

Повеќе информации за „Прегледот на е-трговијата во Западен Балкан 2025“, како и можност за преземање и читање на извештајот, се достапни на следниот линк: https://ecommerce.mk/analizi-i-izveshtai/

Резервната банка на Индија (RBI) им предложи на земјите-членки на БРИКС да ги поврзат своите официјални дигитални валути на централните банки (CBDC), со цел да се олесни прекуграничното тргување и плаќањата поврзани со туристичките патувања, пренесува „Reuters“, повикувајќи се на извори запознаени со иницијативата.

Според централната банка, ваквиот чекор би можел значително да ја намали зависноста од американскиот долар, особено во услови на зголемени геополитички тензии и фрагментација на глобалниот финансиски систем.

Иницијатива за самитот на БРИКС во 2026 година

Резервната банка на Индија ѝ препорачала на индиската влада предлогот за поврзување на дигиталните валути на централните банки на земјите-членки на БРИКС да биде вклучен на агендата на самитот на економската организација, кој е планиран за 2026 година и ќе се одржи под претседателство на Индија.

Идејата за создавање заедничка платна инфраструктура на БРИКС не е нова. Таа беше дискутирана и на самитот на БРИКС одржан во Рио де Жанеиро во јули 2025 година, кога во завршната декларација земјите-членки повикаа на продолжување на работата за развој на прекугранични платни системи меѓу државите основачи на групата – Бразил, Русија, Индија, Кина и Јужна Африка.

Технолошки и регулаторни предизвици

Сепак, имплементацијата на ваквиот систем би можела да се соочи со одложувања поради неподготвеноста на дел од земјите-членки да ги користат технолошките платформи на други држави. За да се постигне конкретен напредок, ќе биде неопходен широк консензус околу технолошките решенија, безбедносните стандарди и регулаторната рамка.

Како можна преодна мерка за управување со потенцијалните трговски нерамнотежи, се разгледува и користење на билатерални договори за размена на валути (swap agreements) меѓу централните банки на земјите од БРИКС.

BRICS Pay – алтернатива на западната платна инфраструктура

Предложениот прекуграничен дигитален платен систем BRICS Pay, кој го развиваат земјите-членки, има за цел да го зајакне финансискиот суверенитет на групата и да ја намали зависноста од доларот. Иницијативата е насочена кон создавање алтернативна глобална платна инфраструктура која би функционирала независно од западно-контролираните финансиски механизми, како што се SWIFT и доларските клиринг-системи.

Наместо воведување единствена заедничка валута, BRICS Pay е замислен како дигитален „обединувачки слој“, преку кој би се овозможиле директни плаќања во националните валути и/или во идните дигитални валути на централните банки на земјите-членки.

Намалување на финансиската ранливост

Системот има за цел да ја намали изложеноста на финансиските системи на земјите од БРИКС на надворешни шокови, ризикот од „замрзнување“ на финансиски средства и политички притисоци. За разлика од постојните платни системи со концентрирана управувачка моќ, BRICS Pay е планирано да функционира врз основа на заеднички надзор и колективно донесување одлуки, со цел да се обезбеди неутралност и рамноправност меѓу земјите-членки.