Со цел унапредување на корисничкото искуство и поголема достапност на своите услуги, Халкбанк АД Скопје на 5 мај 2025 година официјално ја отвори својата нова, модерна експозитура во трговскиот центар Diamond Mall, во срцето на главниот град.

Новата филијала на Халкбанк нуди широк спектар на банкарски услуги од депозитно и благајничко работење, кредитирање, платен промет, до дополнителна консултативна поддршка во пријатна и функционално уредена средина. Со оваа инвестиција, банката ја продолжува својата стратегија за проширување на физичкото присуство и обезбедување на поквалитетен и поефикасен пристап до услугите за граѓаните и компаниите.

Работно време на експозитурата:

• Понеделник – Сабота: од 10:00 до 22:00 часот
• Недела: од 10:00 до 20:00 часот

Diamond Mall експозитурата претставува 47-ма филијала на Халкбанк АД Скопје на ниво на држава и 27-ма во градот Скопје, со што банката потврдува дека останува посветена на својата мисија – да биде финансиски партнер на клиентите во секојдневниот живот и деловно работење.

Во динамично време кога удобноста и достапноста се клучни, новата експозитура на Халкбанк во Diamond Mall претставува важен чекор кон уште подобро банкарство, поблиску до клиентите.

НЛБ Банка Скопје официјално ја достави апликацијата до Европскиот платен совет за членство во СЕПА (SEPA – Single Euro Payments Area), со што станува и првата банка во Република С. Македонија која го започна овој значаен процес на интеграција на македонскиот финансиски систем во европскиот платежен систем.

СЕПА е иницијатива на Европската Унија што ги поедноставува плаќањата во евра, овозможувајќи им на поединците, бизнисите и владите поедноставно управување со платежните услуги преку побрзи, поефикасни, потранспарентни и побезбедни плаќања во евра, кон и од земјите членки на СЕПА.

Патот кон СЕПА за нашата земја го отвори Народната банка со воспоставувањето на целосно нова правна рамка во доменот на плаќањата, усогласена со регулаторните барања на СЕПА и формалното поднесување на апликацијата за членство, за што Европскиот совет за плаќања на 6 март 2025 година донесе позитивна одлука. Со прифаќањето на Република С. Македонија во географската зона на СЕПА на македонските даватели на платежни услуги – банките им се овозможи да аплицираат за учество во СЕПА платежните шеми и оперативно вклучување за извршување на плаќањата во евра со сите земји членки почнувајќи од 6 октомври 2025 година.

„Членството на НЛБ Банка Скопје во СЕПА ја потврдува нашата посветеност кон иновации, интеграција и финансиска достапност за сите наши клиенти. Тоа е стратешки потег кој ја подобрува позицијата на македонските граѓани и компании на европскиот пазар и ги отвора вратите кон европскиот финансиски систем, овозможувајќи им на поединците и бизнисите од Република С. Македонија поефикасно да учествуваат во економијата на Еврозоната. Од друга страна, приклучувањето кон СЕПА придонесува кон напорите за целосна финансиска интеграција на нашата земја во европскиот економски простор“– истакнуваат од НЛБ Банка Скопје.

Пристапот во СЕПА на НЛБ Банка Скопје се очекува да биде на почетокот на октомври
годинава, по техничката интеграција на Банката со системот. Со приклучувањето кон СЕПА, НЛБ Банка Скопје ќе им овозможи на своите клиенти да вршат и примаат плаќања во евра низ, во моментов 40 земји-членки на СЕПА, со истата леснотија и ефикасност како и домашните трансфери.

Стандардизираните процеси и информативните формати на СЕПА обезбедуваат јасност и предвидливост во платните операции, побрзи трансакции – плаќањата во евра се обработуваат истиот или најдоцна следниот работен ден низ земјите на СЕПА, подобрени деловни можности и низа други придобивки за граѓаните и компаниите.

Во првиот квартал од годинава, трговците во најголемите европски инвестициски банки забележаа најдобри резултати во последната деценија, благодарение на зголемената нестабилност на финансиските пазари и интензивното тргување предизвикано од политиките на американскиот претседател Доналд Трамп во врска со царините.

Швајцарската UBS, француските BNP Paribas и Societe Generale, британската Barclays, како и германската Deutsche Bank, остварија вкупен приход од 13 милијарди евра од тргување со акции и обврзници, највисоко ниво од 2015 година, според „Фајненшл тајмс“.

Исто така, и американските банкарски гиганти од Вол Стрит покажаа силни перформанси, со вкупни приходи од речиси 37 милијарди долари во истиот период.

Пазарната нестабилност, поттикната од неизвесната економска политика на САД, резултираше со значителни флуктуации на акциите, обврзниците и девизниот пазар.

Главниот извршен директор на Societe Generale, Славомир Крупа, изјави: „Нестабилноста на пазарот во голема мера ги поддржува банкарските операции во тој сегмент, како што беше случајот и со нас.“

UBS пријави пораст на приходите од трговскиот сегмент за речиси една третина на годишно ниво, достигнувајќи 2,3 милијарди евра. BNP Paribas забележа рекордни квартални приходи од 2,8 милијарди евра.

Иако Deutsche Bank веќе не тргува со акции, нејзините приходи од тргување со обврзници, валути и стоки се зголемиле за 17%, додека Barclays бележи раст од 21%, со што ги надминаа американските конкуренти во овој сегмент.

Societe Generale беше посебно силна во тргување со акции, при што приходите се зголемија за повеќе од една петтина, достигнувајќи 1,06 милијарди евра.

По подолг период на слаби приноси и ограничени дивиденди, европските банки доживуваат значителен бизнис-бум, поттикнат од повисоките каматни стапки и продолжената пазарна нестабилност поради пандемијата и енергетската криза.

До овој квартал, најуспешен период за трговски приходи во изминатата деценија беше првиот квартал од 2022 година, кога петте најголеми банки остварија 12,8 милијарди евра. Во тој период, значајна улога имаше и Credit Suisse, која веќе не е присутна на пазарот по преземањето од страна на UBS.

Главниот извршен директор на UBS, Серџо Ермоти, забележа дека на почетокот на вториот квартал, пазарната активност останала висока, особено по најавата на реципрочни тарифи од страна на Трамп. Обемот на тргување во некои денови дури го надминал врвот постигнат за време на пандемијата за 30%.

Аналитичарот на Citigroup, Ендру Кумбс, изрази очекување за продолжување на добрите резултати и во вториот квартал, но предупреди дека се забележува одреден замор кај инвеститорите, што може да значи постепено смирување на пазарните движења.