Комисијата за хартии од вредност донесе одлуки со кои се менува сопственичката структура во едно друштво за управување со фондови и се овозможува ново капитално зајакнување на банкарскиот сектор.

На 84. седница, со која претседаваше претседателката м-р Бујаре Абази, одобрено е Иван Ивановски од Кочани да стекне целосна сопственост во Друштвото за управување со инвестициски фондови „Иново Статус“ АД Скопје. Тој ќе преземе 297.654 акции со право на глас, односно 100 проценти од друштвото, во трансакција проценета на 160 илјади евра. Реализацијата треба да се спроведе во рок од 90 дена од издавањето на согласноста.

Воедно, Комисијата даде зелено светло и за нова емисија на акции на Халк Банка АД Скопје. Станува збор за 246.000 обични акции со вредност од 10.000 денари по акција, што носи вкупна емисија од 2,46 милијарди денари.

Акциите ќе бидат понудени преку приватна понуда на познат инвеститор – Халк банка А.Ш. од Истанбул, која веќе е акционер во скопската банка. Со оваа постапка, банката има за цел да го зголеми капиталот и да ја одржи соодветната капитална стабилност во наредниот период.

КБ Прво пензиско друштво преку соопштение потсетува дека грижата за личните финансии и навременото планирање на пензијата се клучни за долгорочна финансиска сигурност.

Од друштвото посочуваат дека информираноста за начинот на распределба на придонесите од бруто платата им овозможува на граѓаните полесно да носат финансиски одлуки. Според објавените податоци, 12,8 проценти од бруто платата се издвојуваат во Фондот за пензиско и инвалидско осигурување, додека 6 проценти се уплатуваат на лична индивидуална сметка во задолжителен пензиски фонд.

Овие средства, како што се наведува, се инвестираат на домашните и странските финансиски пазари со цел остварување принос, што значи дека идната пензија на осигурениците ќе се обезбедува од два извори.

Од КБ Прво нагласуваат дека донесувањето информирани одлуки денес има директно влијание врз финансиската стабилност во иднина, потенцирајќи дека планирањето на пензијата не треба да се одложува.

„Одборот на директори на Меѓународниот монетарен фонд (ММФ) одобри нов четиригодишен продолжен финансиски аранжман за Украина во вредност од 8,1 милијарда долари“, соопшти премиерката Јулија Свириденко.

Првата транша од околу 1,5 милијарди долари ќе пристигне во блиска иднина.

Средствата ќе се користат за финансирање на буџетскиот дефицит и поддршка на макрофинансиската стабилност, како дел од пошироката фискална рамка предвидена да покрие проектираниот дефицит од 136,5 милијарди долари за четири години.

Според Свириденко, новата програма на ММФ претставува „сидро“ за целокупната меѓународна финансиска поддршка, вклучително и кредитот од 90 милијарди евра од Европската унија.

„Важно е да се нагласи дека новата програма за соработка на ММФ за Украина е „сидро“ за сета меѓународна финансиска поддршка, особено за добивање на кредитот од 90 милијарди евра од Европската унија“, истакна Свириденко.

Програмата, исто така, ја продолжува серијата реформи кои во претходните години ја обезбедија финансиската стабилност на Украина.