Сè повеќе компании кои отпуштаа работници со образложение дека вештачката интелигенција може да ги замени нивните задачи, сега почнуваат повторно да вработуваат луѓе, откако се покажало дека автоматизираните системи не можат целосно да ги покријат потребите на бизнисот, пишува CNBC.

Еден од најновите примери е Ford, кој, според извештаите, повторно ангажира стотици искусни инженери за да работат на проблеми со квалитетот што автоматизираните системи не успеале да ги решат. Од компанијата посочуваат дека вештачката интелигенција е корисна алатка, но дека нејзината ефикасност зависи од податоците со кои се обучува.

Слични примери има и кај Commonwealth Bank of Australia и IBM. Австралиската банка минатата година отпуштила повеќе од 40 вработени во корисничка поддршка и ги заменила со AI гласовен бот. Но, системот не успеал да се справи со обемот на работа, па бројот на повици се зголемил, по што банката ги повлекла отпуштањата.

IBM, пак, користел вештачка интелигенција за дел од HR функциите, при што системот можел да обработи околу 94 проценти од рутинските барања, но не и посложените случаи, вклучително и етички дилеми. Компанијата потоа најавила дека во 2026 година ќе го зголеми бројот на почетни вработувања во САД.

Аналитичарите предупредуваат дека отпуштањето работници само поради воведување AI не е секогаш најдобар пат до раст. Според податоци на Orgvue, 39 проценти од бизнис-лидерите отпуштиле работници поради воведување вештачка интелигенција, но повеќе од половина од нив подоцна признале дека одлуките биле погрешни.

Истражување на Robert Half, доставено до CNBC, покажува дека 32 проценти од менаџерите за вработување во САД укинале работно место главно поради AI, а потоа повторно вработиле лице за иста или слична позиција.

Пораката од овие примери е дека вештачката интелигенција го менува пазарот на труд, но сè повеќе компании сфаќаат дека најголема вредност не носи целосната замена на луѓето, туку соработката меѓу човечкото знаење и новите технологии.

Македонска берза, во соработка со ЕБОР и PwC, ги поканува домашните компании со потенцијал за раст да се приклучат на специјално креирана програма за проценка на нивната подготвеност за прибирање капитал преку пазарот на капитал.

Проектот е наменет за амбициозни и успешни компании кои планираат нов инвестициски циклус, размислуваат за долгорочна стратегија и генерациски континуитет, сакаат независна проценка на вредноста и потенцијалот на својот бизнис или не ја исклучуваат можноста во иднина да прибираат капитал преку издавање акции или обврзници.

Компаниите што ќе учествуваат во проектот ќе добијат пристап до ексклузивна лидерска академија, индивидуална проценка на подготвеноста за излегување на пазарот на капитал, како и професионален извештај со препораки за понатамошен развој.

Од Македонска берза посочуваат дека ова е можност компаниите да добијат независна експертска проценка за тоа каде се наоѓаат денес и како во иднина можат да привлечат инвеститори.

До 70 проценти од трошоците за учество ќе бидат покриени преку грант обезбеден од ЕБОР. Рокот за пријавување е 1 септември 2026 година, а повеќе детали за учество и начинот на аплицирање се достапни на веб-страницата на Македонска берза.

Од полноќ ќе важат нови цени на горивата, откако Регулаторната комисија за енергетика донесе одлука со која малопродажните цени на нафтените деривати во просек се намалуваат за 0,27 проценти во однос на претходната пресметка.

Според новата одлука, од 30 јуни 2026 година, од 00:01 часот, ЕУРОСУПЕР БС-95 ќе се продава по максимална цена од 84,50 денари за литар, додека ЕУРОСУПЕР БС-98 ќе чини 86,50 денари за литар. Двата бензина поскапуваат за 0,50 денари.

Дизел горивото ЕУРОДИЗЕЛ БС поевтинува за 0,50 денари и неговата нова максимална цена ќе изнесува 80 денари за литар.

Цената на Екстра лесното масло за домаќинство не се менува и останува 79,50 денари за литар. Мазутот М-1 НС поевтинува за 0,796 денари за килограм и ќе се продава по цена од 41,495 денари за килограм.

Од РКЕ посочуваат дека при пресметката се земени предвид движењата на референтните цени на светските берзи, каде што е забележано намалување кај бензините, дизелот, екстра лесното масло и мазутот. Истовремено, курсот на денарот во однос на доларот бил повисок за 1,5132 проценти во споредба со претходната пресметка.

Регулаторната комисија нагласува дека утврдените цени се максимални. Трговците на големо и мало имаат можност горивата да ги продаваат и по пониски цени од највисоките дозволени.