Намалувањето на тензиите на Блискиот Исток веднаш се одрази врз глобалните финансиски пазари. Инвеститорите позитивно ја примија најавата за мировен договор меѓу САД и Иран, што доведе до значителен пад на цените на нафтата, слабеење на американскиот долар и раст на берзанските индекси ширум светот.

Фјучерсите на суровата нафта Брент се намалија за повеќе од 4% и се тргуваа по цена од 83,82 долари за барел, додека доларот ослабе поради намалувањето на геополитичките ризици и ублажените инфлаторни очекувања.

Пазарните аналитичари оценуваат дека инвеститорите очекуваат стабилизирање на снабдувањето со енергенси и намалување на ризиците од нарушување на клучните транспортни рути, особено во регионот на Ормутскиот теснец.

„Ќе треба време за да се види колку брзо теснецот навистина ќе се отвори повторно и колку време ќе биде потребно протокот на нафта да се врати во нормала. Секако ќе бидат потребни месеци, а не недели“, изјави Ник Твидејл, главен пазарен стратег во ATFX Global.

И покрај позитивните реакции на пазарите, аналитичарите предупредуваат дека инвеститорите и натаму внимателно ќе го следат развојот на настаните, бидејќи долгорочната стабилност ќе зависи од конкретната имплементација на договорот и нормализирањето на глобалните енергетски текови.

Цената на златото забележа пад во петокот и се движи кон неделна загуба, додека инвеститорите внимателно ги следат геополитичките тензии на Блискиот Исток и очекувањата за идната монетарна политика на американските Федерални резерви.

Спот-цената на златото се намали за 0,6% и изнесуваше 4.445,51 долари за унца, при што благородниот метал е во насока да ја заврши неделата со загуба од околу 2%. Во исто време, фјучерсите на златото во САД за августовска испорака се намалија за 0,7% на 4.471,70 долари за унца.

Пазарите остануваат под влијание на неизвесноста околу конфликтите на Блискиот Исток, но и на сигналите од претставниците на Федералните резерви дека каматните стапки би можеле да останат повисоки подолг период со цел да се контролира инфлацијата.

Повисоките каматни стапки традиционално вршат притисок врз цената на златото, бидејќи металот не носи каматен принос и станува помалку атрактивен во споредба со другите финансиски инструменти.

Инвеститорите сега го насочуваат вниманието кон новите економски податоци од САД, кои би можеле да дадат појасна слика за идните потези на Федералните резерви и за понатамошното движење на цената на златото на светските пазари.

Месечниот статистички билтен на Македонска берза за мај покажува намалена трговска активност и благо повлекување на инвеститорите во однос на април. Пазарната капитализација на котираните друштва изнесуваше 347,6 милијарди денари и забележа месечен пад од 1,47%, додека берзанскиот индекс МБИ10 се намали за 1,76% и месецот го заврши на ниво од 9.766,03 поени.

Вкупниот промет достигна 308,1 милиони денари, што претставува намалување од високи 17,70% на месечно ниво. Пад е забележан и кај бројот на реализирани трансакции, кои изнесуваа 1.307 или 15,51% помалку во споредба со претходниот месец. Особено се издвојува намалувањето на прометот во класичното тргување, кој се намали за 20,11% и изнесуваше 282,1 милиони денари.

Од друга страна, блок-трансакциите забележаа исклучително силен раст од 221,43%, достигнувајќи вредност од речиси 26 милиони денари, што укажува на зголемена активност кај поголемите инвеститори.

Според бројот на трансакции, најтргувана акција во мај беше акцијата на Комерцијална банка со 526 трансакции, пред Македонски Телеком со 188 и Алкалоид со 156 трансакции. Според количината на истргувани акции, апсолутен лидер беше Македонски Телеком со 85.922 акции, пред Комерцијална банка и Гранит.

Најголем раст на вредноста на акцијата во текот на месецот оствари ОКТА АД Скопје со импресивни 22%, додека меѓу добитниците се најдоа и Попова Кула Демир Капија и ТИТАН УСЈЕ. Од друга страна, најголем пад забележа на вредноста на акцијата забележа Макошпед АД Скопје со намалување од високи 25,32%, пред ВВ Тиквеш Кавадарци (-14,45%) и Стопанска банка АД Скопје (-8,71).

Податоците упатуваат на период на умерена корекција на домашниот пазар на капитал, со намалена ликвидност во редовното тргување, но и со зголемен интерес за поголеми блок-позиции, што претставува важен сигнал за движењата на инвеститорското расположение на Македонска берза.