Северна Македонија следната недела ќе го добие својот прв Центар за вештачка интелигенција, проект поддржан од Европската Унија чија цел е развој на екосистеми за вештачка интелигенција и проширување на пристапот до суперкомпјутерски ресурси оптимизирани за оваа технологија.

Министерот за дигитална трансформација, Стефан Андоновски, соопшти дека проектот „Везилка“ е вреден 6,5 милиони евра. Од нив, 2,5 милиони евра се обезбедени од Северна Македонија, додека остатокот е финансиран од Европската Унија.

Носител на проектот е Факултетот за информатички науки и компјутерско инженерство (ФИНКИ) во Скопје. Според најавите, граѓаните ќе можат да поставуваат дигитализирана литература и академски текстови, што ќе придонесе за збогатување на базите на податоци и развој на локални решенија базирани на вештачка интелигенција.

Проектот е дел од поширока европска иницијатива за развој на таканаречени „Антени на фабрики за вештачка интелигенција“ (AI Factory Antennas). Европската Унија за оваа намена планира инвестиции од околу 55 милиони евра, дополнети со средства од земјите учеснички во заедничката иницијатива EuroHPC, меѓу кои се и Северна Македонија, Србија и Молдавија.

Антените на фабриките за вештачка интелигенција претставуваат точки за поврзување со постојни суперкомпјутерски центри, овозможувајќи им на истражувачките институции, стартапите, малите и средни претпријатија и јавните институции далечински пристап до напредни компјутерски ресурси за развој и примена на вештачка интелигенција.

Од полноќ ќе важат нови цени на горивата, согласно последната одлука на Регулаторната комисија за енергетика (РКЕ). Иако просечната промена на цените е минимална, најголем дел од возачите ќе се соочат со поскапување на бензините и дизелот.

Според одлуката, цената на ЕУРОСУПЕР БС-95 ќе изнесува 87,50 денари за литар, што е зголемување од 1,50 денари. ЕУРОСУПЕР БС-98 ќе се продава по 90 денари за литар, односно за два денари поскапо од досега.

Поскапува и дизелот, чија нова цена ќе биде 87,50 денари за литар, што претставува раст од 50 денари по литар.

Наспроти тоа, екстра лесното масло за домаќинство ќе поевтини за 2,50 денари и ќе се продава по 86,50 денари за литар. Намалување има и кај мазутот, чија цена е утврдена на 46,223 денари за килограм.

Од РКЕ информираат дека при пресметката се земени предвид референтните износи на акцизите за бензините и дизелот, по престанокот на важноста на претходната одлука за измена на начинот на нивна пресметка.

Новите цени ќе стапат во сила на 16 јуни во 00:01 часот.

Граѓаните веќе неколку дена се соочуваат со потешкотии при користењето на апликацијата „Мој ДДВ“, поради што дел од корисниците не можат да се најават и да скенираат фискални сметки.

Според бројни пријави, при внесување на ПИН-кодот се појавува пораката „Нема конекција од УЈП“, што го оневозможува пристапот до системот. Корисниците посочуваат дека проблемот трае повеќе од 72 часа, предизвикувајќи незадоволство кај граѓаните кои редовно ја користат апликацијата за остварување поврат на ДДВ.

Од Управата за јавни приходи информираа дека апликацијата моментално работи со повремени забавувања и дека стручните тимови активно работат на утврдување на причините и отстранување на техничките проблеми, со цел услугата што поскоро да биде целосно функционална.

Засега, од УЈП не е соопштен конкретен рок кога апликацијата „Мој ДДВ“ повторно ќе функционира без прекини и ограничувања.