Групацијата БРИКС (Бразил, Русија, Индија, Кина и Јужна Африка) активно работи на развој на нова меѓународна платформа за плаќања која ќе функционира без употреба на американскиот долар. Според најавите, овој потег може да предизвика темелна промена во глобалната финансиска архитектура и да го редефинира начинот на кој државите вршат прекугранични трансакции.

Министерот за надворешни работи на Русија, Сергеј Лавров, потврди дека новиот платен систем е дел од пошироката стратегија на БРИКС за зајакнување на економската автономија и намалување на зависноста од западните финансиски институции. Новиот механизам ќе овозможи трговија со локални валути, без вклучување на доларот, а се очекува да биде достапен и за земји кои не се членки на БРИКС.

„Постојат повеќе иницијативи што се разгледуваат во рамки на БРИКС. Една од иницијативите е предлогот на Бразил за создавање алтернативна платформа за плаќање која веќе е во фаза на разработка. Ќе биде отворена и за други држави надвор од БРИКС, а нема да зависи од постоечките системи како што е SWIFT“, изјави Лавров.

Како пример на постоечка алтернатива, Лавров го спомена рускиот систем за финансиска размена на пораки, кој успешно функционира како замена за SWIFT во одредени трансакции.

„Постои можност за создавање платформи за плаќање кои се независни од надворешно влијание. Еден таков пример е системот за финансиска размена на пораки на Руската централна банка. Тој е ефикасен и функционира без потпирање на SWIFT“, заклучи Лавров.

Ако овој систем биде имплементиран и широко прифатен, би можел да предизвика суштински трансформации во меѓународната трговија и геоекономската рамнотежа, со потенцијал да ја намали глобалната доминација на доларот.

По повеќе од една деценија, интернет публикациите – онлајн медиумите, добија официјално признание во Законот за медиуми. Со новите измени, издавачите на дигитални медиуми добиваат рамноправен третман со останатите медиуми, што значи дека нивните права и обврски се целосно изедначени со оние на традиционалните медиумски работници.

Оваа легислативна измена претставува важен чекор напред во насока на:

• Поттикнување на медиумскиот плурализам и слободата на изразување;
• Подигање на стандардите за уредувачка транспарентност и професионалност;
• Јакнење на довербата во дигиталните медиуми, што стануваат се поважен дел од информирањето на јавноста.

Министерот за дигитална трансформација, Стефан Андоновски, истакна благодарност до пратениците во Собранието, Министерството за труд и социјална политика, како и до сите медиумски здруженија, новинари и експерти што придонеле за креирање на инклузивен и функционален текст на законот.

„Им благодарам на пратениците во Собранието, кои преку дискусии со засегнатите страни придонесоа кон поинклузивен текст на законот, и до тимот во Министерството за трудот околу основниот текст. А секако благодарност и до сите медиумски здруженија, здруженија на новинари, новинари и медиумски работници кои се вклучија во широката дебата. Ова може да биде почеток на одлична соработка кон уште подобри решенија, политики и стратегии за развој на медиумскиот сектор“, изјави министерот за дигитална трансформација, Стефан Андоновски.

Со оваа одлука, Македонија го зацврстува курсот кон дигитална трансформација, медиумска етика и слобода на говорот – вредности клучни за модерна, демократска и економски стабилна држава.

Министерката за финансии, Гордана Димитриеска-Кочоска, од денеска до 26 април престојува во Вашингтон, каде што учествува на Пролетните средби на Меѓународниот монетарен фонд (ММФ) и Светската банка (СБ).

Во рамките на посетата, министерката ќе оствари средби со високи претставници на двете институции, при што ќе ги претстави актуелните остварувања и идните планови на Владата за фискалната политика, со акцент на реформите во управувањето со јавните финансии и обезбедувањето на макроекономска стабилност.

Предвидени се средби со извршниот директор на ММФ, Јерон Клик, директорот на Европскиот оддел во ММФ, Алфред Камер, шефот на Мисијата на ММФ за Македонија, Анет Кјоб, како и претставници од Одделот за фискални прашања на ММФ.

На агендата се и средби со претставници на Светската банка, меѓу кои извршниот директор Јуџин Ругенат, потпретседателката Антонела Басани, регионалната директорка за Западен Балкан Шиаочин Ју и директорот за земјава, Масимилијано Паолучи.

Покрај тоа, министерката ќе се сретне со претставници од Трезорот на САД и мултинационални корпорации за финансиски услуги кои се вклучени во процесот на издавање еврообврзници за Македонија. Таа ќе учествува и на Регионалната тркалезна маса за платежни системи, посветена на Единствената област за плаќања во евра – СЕПА, каде што Македонија се приклучи годинава.

Пролетните средби се значаен глобален настан што обединува министри за финансии, гувернери на централни банки, меѓународни финансиски институции, бизнис-заедници и академици, за дискусија на актуелни теми од светската економија, развојот и пазарите на капитал.

Димитриеска-Кочоска на средбите учествува заедно со гувернерката на Народната банка, Анита Ангеловска-Бежоска, вицегувернерите Ана Митреска и Фадил Бајрами, како и државната секретарка во Министерството за финансии, Андриана Матлиоска.

Претходно, министерката оствари посета на Чикаго, каде што имаше средби со претставници на македонската дијаспора во САД.