НЛБ Банка објави промотивна понуда за потрошувачки кредити во износ до 2.500.000 денари, со фиксни каматни стапки и брзо одобрување.

Според понудата, клиентите кои ќе аплицираат преку мобилната апликација мКлик можат да добијат кредит со фиксна каматна стапка од 5,6 проценти, додека за апликациите поднесени во експозитурите на банката е предвидена фиксна каматна стапка од 5,7 проценти.

Од НЛБ Банка информираат дека процесот на одобрување трае само неколку минути, а промотивната понуда ќе биде достапна до 31 август.

Гувернерот на Народната банка, Трајко Славески, ги пречека студентите кои ова лето ќе ја извршуваат својата практична работа во институцијата, охрабрувајќи ги максимално да ја искористат можноста за професионален развој и стекнување практични знаења.

На средбата, одржана во Музејот на Народната банка, Славески истакна дека младите се важен дел од иднината на централното банкарство и ги повика активно да учат, да поставуваат прашања и да бидат отворени за нови идеи.

Настанот се организира во годината кога Народната банка одбележува 80 години од развојот на централното банкарство, јубилеј што ја нагласува улогата на институцијата во зачувувањето на довербата во националната валута и одржувањето на макроекономската стабилност.

Во текот на практичната работа, студентите ќе имаат можност да се запознаат со функционирањето на повеќе организациски единици во Народната банка, меѓу кои секторите за монетарна политика и истражување, финансиски пазари, статистика, информатичка технологија, правни работи и трезорско работење, со цел да добијат поширок увид во работата на современа централна банка.

Нова Љубљанска банка (НЛБ Групацијата) е избрана меѓу 36 банки и финтек компании кои ќе учествуваат во пилот-проектот на Европската централна банка (ЕЦБ) за тестирање на дигиталното евро.

Пилот-фазата треба да започне во втората половина на 2027 година и ќе трае 12 месеци. Во тој период ќе се тестираат техничките функционалности на дигиталното евро, неговата примена во секојдневните плаќања и корисничкото искуство пред евентуалното официјално воведување на новата европска дигитална валута.

Покрај НЛБ, во проектот учествуваат и големи европски банки, меѓу кои UniCredit, Deutsche Bank, Raiffeisen Bank и Piraeus Bank, како и водечки финтек компании како Revolut, Stripe, Nexi Payments, Satispay и хрватскиот CorvusPay.

Од Европската централна банка соопштија дека за повикот за учество биле доставени повеќе од 50 апликации, што, според институцијата, ја потврдува силната заинтересираност на приватниот сектор за развојот на европскиот систем за дигитални плаќања.

Членот на Извршниот одбор на ЕЦБ и претседател на работната група за дигиталното евро, Пјеро Чиполоне, изјави дека големиот интерес од пазарот ја потврдува подготвеноста на приватниот сектор активно да придонесе во развојот на проектот и во зајакнувањето на европскиот платен систем.

За време на тестирањето ќе се користи бета-верзија на дигиталното евро, а во проектот ќе бидат вклучени вработени во ЕЦБ, националните централни банки од еврозоната и избрани трговци. Корисниците ќе можат да тестираат различни видови трансакции, вклучувајќи плаќања во продавници, онлајн купувања и трансфери од лице до лице.