Connect with us

Банки

Величковски од Народната банка: Новата правна рамка во платните системи − можност за побрза интеграција во Единствената европска платежна област

Објавено

пред 1 година

на

Новата правна рамка за платните системи и платежните услуги, поради високата усогласеност со правото на Европската Унија, носи можности за забрзана интеграција на земјата во Единствената европска платежна област (СЕПА) и поврзување со платежната инфраструктура во ЕУ за побрзи и поевтини плаќања во евра за граѓаните и компаниите. Исто така, правната рамка има за цел да го поттикне користењето на дигиталните канали за полесно иницирање на плаќањата за побрзо, поедноставно и поевтино извршување на плаќањата во земјата, посочува директорот на Дирекцијата за платни системи при Народната банка, Игор Величковски, во интервју за месечникот „Економија и бизнис“. Величковски нагласува дека иднината на плаќањата се заснова на цврста правна рамка којашто обезбедува сигурно и ефикасно извршување на плаќањата и поголема заштита на корисниците на платежните услуги, а особено на потрошувачите.

Новата правна рамка им овозможува на банките и на новите даватели на платежни услуги од финтек-секторот, преку спроведување на концептот на т.н. „отворено банкарство“, да понудат иновативни решенија коишто ги задоволуваат потребите на нивните клиенти да извршуваат плаќања на побрз и поудобен начин, нагласува Величковски и посочува дека потенцијалот за примената на нови финтек-решенија е голем. „Доколку денес сакаме да купиме некој производ или услуга на интернет, ние вообичаено плаќаме со платежна картичка. Во иднина, очекуваме дека финтек-решенијата ќе ни овозможат да платиме на брз, сигурен и удобен начин директно преку нашето електронско банкарство, без да ја користиме платежната картичка. На пример, со користење мобилна апликација којашто е поврзана со нашата платежна сметка ќе може да платиме за вечерата со пријателите во ресторан без користење на платежната картичка, при што износот на сметката ќе може лесно да се подели помеѓу пријателите, независно од тоа кај кој давател на платежни услуги имаат платежна сметка“, објаснува директорот на Дирекцијата за платни системи.

Во однос на граѓаните, новините донесоа многу поголема правна заштита.

„Банките треба да им понудат на граѓаните рамковен договор за платежни услуги којшто ги регулира правата и обврските за нивно користење, при што пред склучувањето на договорот треба да ги информираат граѓаните за условите под кои може да ги користат платежните услуги, како и за висината на надоместоците за најчесто користените услуги“, посочува Величковски и дополнува дека граѓаните имаат право да побараат замена на постојните договори со нов рамковен договор со цел да си обезбедат поголема правна заштита.

Новата правна рамка ги зема предвид и интересите на компаниите.

„За првпат се врши ограничување на висината на надоместоците коишто давателот којшто поставил ПОС-уред кај трговецот му ги плаќа на давателот којшто ја издал платежната картичка којашто се користи на конкретниот ПОС-уред. Висината на овие надоместоци постепено се намалува и на почетокот на 2025 година не смее да биде повисока од 0,2% од вредноста на платежната трансакција извршена со дебитна платежна картичка, односно од 0,3% кај кредитна платежна картичка, со што ова ограничување ќе се изедначи со она коешто во моментов се применува во Европската Унија. На овој начин, се очекува дека ќе се намалат трошоците за давателите коишто поставуваат ПОС-уреди кај трговците, што понатаму би довело до намалени надоместоци за трговците коишто прифаќаат плаќања со платежни картички“, посочува Величковски.

Слични Теми:

Банки

Промени во Надзорниот одбор на ТТК Банка АД Скопје

Објавено

пред 6 часа

на

Согласно Глава 6 од Правилата за котација на Македонската берза, ТТК Банка АД Скопје известува за промени во составот на својот Надзорен одбор.

„Врз основа на член 33 од Правилата за котација на Македонската берза на хартии од вредност, ТТК Банка АД Скопје објавува дека, заради истекот на мандатот заклучно со 18.3.2025 година, г. Арсен Јаневски и г. Трим Ќемали повеќе не се членови на Надзорниот одбор на ТТК Банка АД Скопје“, се вели во соопштението на ТТК Банка, објавено на Македонска берза.

По овие промени, актуелниот состав на Надзорниот одбор на ТТК Банка АД Скопје е следниот:

  • г-дин Бобан Гоговски – Претседател на Надзорниот одбор и Извршен член на Одборот на директори, како и генерален директор на „Тетекс“ АД Тетово.
  • г-дин Владо Камбовски – Заменик-претседател на Надзорниот одбор и независен член.
  • г-ѓа Драгица Јовановска – Член на Надзорниот одбор и Неизвршен член на Одборот на директори на „Тетекс“ АД Тетово.
  • г-дин Златко Черепналкоски – Член на Надзорниот одбор и Директор за продажба и маркетинг на „Енерџи Деливери Солушнс“ АД Скопје.
  • г-ѓа Евгенија Трпкоска – Член на Надзорниот одбор и Неизвршен член на Одборот на директори на „Тетекс“ АД Тетово.
  • г-дин Михаил Петковски – Член на Надзорниот одбор и професор во пензија.

ТТК Банка АД Скопје останува посветена на стабилно и професионално управување, следејќи ги највисоките корпоративни стандарди.

Продолжи со читање

Банки

ВОДЕНИ ОД МОТОТО ЗАЕДНО СМЕ ПОСИЛНИ – Шпаркасе Банка и Шпаркасе Лизинг донираа 6 милиони денари како поддршка и помош на семејствата на повредените од трагедијата во Кочани

Објавено

пред 11 часа

на

Во духот на општествената одговорност и солидарност, Шпаркасе Банка АД Скопје и Шпаркасе Лизинг издвојуваат финансиски средства во износ од 6 милиони денари како поддршка за заедницата погодена од неодамнешните случувања во Кочани и околината.

Средствата ќе бидат наменети за помош на повредените и нивните семејства, поддршка на институциите и заедницата во Кочани, како и за директна донација на наменската сметка на Црвениот крст на Република Северна Македонија.

„Како финансиска институција со силен општествен ангажман, Шпаркасе Банка и Шпаркасе Лизинг остануваат посветени на вредностите на хуманоста, одговорноста и солидарноста. Ги охрабруваме сите компании и поединци, во рамки на своите можности, да се приклучат на оваа иницијатива и да дадат свој придонес во процесот на опоравување и поддршка на погодените семејства“, велат од Шпаркасе Банка и Шпаркасе Лизинг.

Во овие тешки моменти, единството е клучно. Заедно сме посилни – денес и секогаш.

Продолжи со читање

Банки

КРИЗА ВО ГЕРМАНСКИОТ БАНКАРСКИ ГИГАНТ – Дојче банк ќе отпушта две илјади вработени и ќе ја намалува мрежата на филијали!?

Објавено

пред 1 ден

на

Германскиот банкарски гигант „Дојче банк“ планира да намали околу 2.000 работни места во текот на оваа година, во рамки на стратегијата за оптимизација на трошоците, пренесува „ДПА“.

Во согласност со долгорочниот тренд на реструктурирање, банката дополнително ќе ја намали својата мрежа на филијали. Овој потег е дел од тековните процеси на прилагодување кон новите пазарни услови и зголемениот фокус на дигиталните финансиски услуги.

Извршниот директор на „Дојче банк“, Кристијан Севинг, на конференцијата организирана од „Морган Стенли“ истакна дека во наредниот период ќе се реализира значителен број затворања на филијали. Тој нагласи дека трошоците поврзани со овие мерки се веќе пресметани во тековните финансиски планови на банката.

Портпаролот на „Дојче банк“ потврди дека процесот на затворање на филијали е дел од претходно најавените мерки за оптимизација, додавајќи дека банката не воведува нова програма за намалување на трошоците.

Во согласност со новата деловна стратегија, „Дојче банк“ го префрла фокусот кон дигиталното банкарство, при што се планира значително зголемување на видео и телефонските консултации за приватни клиенти, се вели во извештајот на „ДПА“.

Продолжи со читање

Популарно