„Потресени од трагедијата во Кочани, поради која искрено сочуствуваме со семејствата на починатите и посакуваме брзо закрепнување на повредените, Комерцијална банка ја изразува својата солидарност со набавка и донација на ново возило за брза помош за Општата болница во Кочани. Во овие тешки моменти, чувствуваме дека е наша одговорност да дадеме конкретен придонес за подобрување на состојбите во јавното здравство и за помош секогаш кога е потребна.

Оваа донација е само еден од начините со кои сакаме да ја покажеме нашата солидарност со семејствата кои се соочуваат со невидена болка и траума. Пожарот во дискотеката во Кочани остави длабоки рани, но и итна потреба од подобрување на капацитетите на јавните здравствени установи со цел да обезбедат брза и ефикасна медицинска помош кога е најпотребна.

Банката останува доследна на својата општествено одговорна мисија и ќе продолжи и понатаму да ги поддржува напорите за што побрзо закрепнување на повредените и за ублажување барем малку на траумата на семејствата на загинатите и на повредените. Оваа трагедија е неопислива болка за засегнатите, но и повик да се обединиме во хуманоста и солидарноста, кои се основа за изградба на посилна и поотпорна заедница“, велат од Комерцијална банка.

Европската банка за обнова и развој (ЕБОР) одобри ЕУР 4 милиони кредитна линија на Шпаркасе Банка АД Скопје, за натамошно позајмување на македонските малите и средни претпријатија (МСП), за инвестиции во дигитална и автоматска технологија.

Ова е прв кредит од ЕБОР Програмата за дигитализација на Западен Балкан во земјата, преку кој се поддржуваат стимулативни плаќања и техничка помош финансирана од Европската Унија, чија Програма за гаранции за Западен Балкан ги поддржува МСП, преку обезбедување на поголемо финансирање достапно преку комбинација на грантови и кредити.

Програмата за дигитализација на Западен Балкан се стреми кон привлекување на иновација, конкурентност и одржлив развиј во приватниот сектор. Истата вклучува мерки на зајакување во насока на користење нови технологии кои може да овозможат автоматизација и дигитализација, обезбедувајќи услови МСП да останат конкурентни во сė поширокиот дигитален пејсаж, и насочувајќи ги инвестициите кон технологија која ја поддржува Транзицијата кон зелената економија. Оваа иницијатива промовира и инклузивен економски раст, преку обезбедување услови, МСП управувани од жени, да имаат еднаков пристап до финансирање.

Обезбедувањето на финансирање за ваков развој ќе им помогне на бизнисите во регионот подобро да се усогласат со ЕУ стандардите, да го прошират нивниот трговски потенцијал, да го зголемат капацитетот, да се натпреваруваат на глобалната сцена, и да ја поттикнат нивната отпорност и разновидност.

Договорот беше потпишан од господин Фатих Туркменоглу, Претставник на ЕБОР за Северна Македонија и господин Санел Кустурица, Претседател на Управниот Одбор на Шпаркасе Банка и госпоѓа Златица Цивкароски, Член на Управниот Одбор на Шпаркасе Банка.

Туркменоглу изјави: “Поддршката на МСП во нивната дигитална и зелена транзиција е круцијална за градење на силен приватен сектор. Преку промовирање на иновација и одржливост, обезбедуваме услови бизнисите да добијат пристап до финансирањето и можности за раст. Оваа иницијатива, ги охрабрува МСП да ја поттикнат автоматизацијата и дигитализацијата, да ја зајакнат нивната конкурентност на локалните и глобалните пазари, како и инклузивноста во ланците на глобални вредности.”

Кустурица додаде: “Посветени сме во поддршка на иновациите и одржливиот раст, а оваа соработка ја зајакнува нашата посветеност во обезбедувањето финансиски решенија кои им овозможуваат на малите и средни бизниси да напредуваат. Горди сме што соработуваме со ЕБОР во оваа иновативна иницијатива, која има за цел да ја поттикне дигиталната и зелена трансформација на малите и средни претпријатија во земјата. Со олеснување на пристапот до напредни технологии и промоција на одржливоста, не само што им помагаме на бизнисите да ја подобрат својата ефикасност и продуктивност, туку и придонесуваме за поодржлива и посилна економија.“

ЕБОР има инвестирано повеќе од ЕУР 2.9 милијарди во 198 проекти во Северна Македонија, од почетокот на работењето во земјата.

Народната банка, Министерството за финансии, Комисијата за хартии од вредност, Агенцијата за супервизија на капитално финансирано пензиско осигурување и Агенцијата за супервизија на осигурувањето, во соработка со асоцијациите и институциите од приватниот и граѓанскиот сектор коишто се активни во доменот на финансиската едукација, наредната недела, тринаесетта година по ред, ќе ја одбележат Глобалната недела на парите. Глобалната недела на парите традиционално се одбележува преку предавања за различни возрасни групи, објавување едукативни материјали од областа на финансиите на интернет-страниците, одржување работилници со физичко присуство или онлајн, објавување едукативни содржини на социјалните мрежи.

Темата на која е посветена годинешната Глобална недела на парите е: „Размисли пред да „заследиш“, за безбедност на твоите пари во иднина“ (Think before you follow, wise money tomorrow). Темата се осврнува на сложеноста на современите дигитални финансиски трендови, појавата на лица што даваат совети за финансиските инвестиции (т.н. „финфлуенсери“) и зголемената употреба на вештачката интелигенција при утврдувањето на веродостојноста на финансиските информации и совети, особено за младите. Понатаму, и емоционалната пристрасност и однесувањето, особено менталитетот на толпата можат да поттикнат лоши финансиски одлуки под притисок на врсниците или под влијание на социјалните медиуми.

Во овој контекст, од огромно значење е младите да развијат добри вештини за управување со парите, да препознаваат емоционални поттикнувачи и да стекнат критички пристап кон изворите на информации. Зајакнувањето на финансиската писменост може да им помогне на младите подобро да се снаоѓаат на финансиските пазари, да се спротивстават и да препознаат пристрасни совети што води до попаметни финансиски одлуки. Оттаму, темата на овогодишната Глобална недела на парите ги поттикнува младите луѓе да бидат исклучително претпазливи при носењето финансиски одлуки и користењето на современите технологии во финансискиот сектор.

Во рамките на одбележувањето на Глобалната недела на парите, Народната банка ќе организира повеќе предавања за учениците од основните и средните училишта, децата од предучилишна возраст и за студентите. Воедно, секој ден ќе се објавуваат прашања во рамките на едукативниот квиз на социјалните мрежи на Народната банка. Во соработка со Сојузот на средношколци ќе биде одржана работилница со учениците од средните училишта. Воедно, Народната банка ќе организира вебинар за наставниот кадар од основните и средните училишта, пред кои ќе се одржи презентација на темата на Глобалната недела на парите и дискусија. За таа цел, ги повикуваме наставниците и професорите да се пријават за учество на вебинарот, а потоа да одржат наменски презентации за своите ученици, со што ќе се зголеми опфатот на вклучените ученици. Народната банка зеде учество во активностите на здружението за вмрежување на успешни жени „Јас сум жена“, односно учествува во предавањето на едно средно економско училиште и во панел-дискусија за кибербезбедноста којашто ќе биде во рамките на Женскиот економски форум. Народната банка, организациски и со учество во Жири-комисијата, го поддржува и националниот натпревар на Европскиот квиз на парите 2025 година, којшто ќе се одржи за време на Глобалната недела на парите (првиот круг на 1 април и вториот круг на 4 април 2025 година).

Во меѓународни рамки, Глобалната недела на парите се одбележува од 2012 година, со единствен прекин во 2020 година поради пандемијата, во организација на Организацијата за економската соработка и развој (ОЕЦД). Оваа глобална иницијатива, којашто досега се одбележува во повеќе од 176 земји во светот и со која се опфатени 60 милиони деца и млади, ја подигнува свеста кај младите за финансиската едукација и нивните знаења за парите, штедењето, вработувањето и претприемаштвото. Повеќе информации за Глобалната недела на парите се достапни на врската: www.globalmoneyweek.org   

Во однос на другите земји, Глобалната недела на парите кај нас се одржува две недели подоцна, поради трагедијата во Кочани.