Connect with us
no baners

Банки

ПроКредит Групацијата ја заокружи 2023 година со силни финансиски резултати

Објавено

пред 2 години

на

ПроКредит Групацијата, главно активна во Југоисточна и Источна Европа, забележа одличен финансиски резултат од 113,4 милиони евра во 2023 година, што одговара на принос на капиталот од 12,2%. Оперативните приходи се зголемија за 21% на годишно ниво, како резултат на позитивните движења во сите редовни текови на приходи. Соодносот на трошоци и приходи се подобри за 4,1 процентни поени, на 59,9%.

Умерениот раст на кредитното портфолио од 1,9% во голема мера се должи на тековните намалувања на портфолиото во Украина. Депозитите забележаа добар раст од 965 милиони евра, или 15,3%, со значаен придонес од сегментот комерцијално банкарство. Врз основа на соодносот на CET1 од 14,3%, Управниот одбор има намера да предложи дивиденда од 0,64 евра по акција на Годишното генерално собрание на 4 јуни 2024 година.

Кредитното портфолио на Групацијата порасна за 119 милиони евра или за 1,9%. Депозитите пораснаа за значителни 965 милиони евра или за 15,3%, во кои физичките лица учествуваа со приближно 50%.

Значителен развој на приходите и зголемена трошковна ефикасност

Оперативните приходи на Групацијата се зголемија втора година по ред за повеќе од 20%, со раст од 72,7 милиони евра или 21,4% во споредба со 2022 година, на 412,5 милиони евра (2022 година: 339,8 милиони евра). Овој позитивен развој е поттикнат од повисоките нето-приходи од камати, нето-приходите од провизии и надоместоци и приходите од девизни трансакции. Сите банки на ПроКредит во Југоисточна и Источна Европа објавија позитивни резултати, при што повеќето покажаа значително подобрени или стабилно добри нивоа на профитабилност и на трошковна ефикасност во споредба со претходната година.

Нето-приходите од камати пораснаа за 72,6 милиони евра или за 27,4%, на 337,2 милиони евра (2022 година: 264,6 милиони евра). Нето-каматната маржа се зголеми за 53 базични поени, на 3,6%, како резултат на главно стабилните кредитни маржи и на повисоките клучни каматни стапки. Во четвртиот квартал, нето-каматната маржа изнесуваше 3,8%.

Со 57,5 милиони евра, нето-приходите од провизии и надоместоци се 5,1% над нивото забележано во претходната година (2022 година: 54,7 милиони евра). Особено позитивно се развиваа приходите од активностите со трансакции и картички. Другите нето оперативни приходи придонесоа 17,8 милиони евра во вкупниот резултат (2022 година: 20,5 милиони евра). Резултатот од девизните трансакции, што е вклучен во оваа ставка, бележи солиден пораст од 4,1 милиони евра или 17,2%.

Кадровските и административните расходи пораснаа за 29,6 милиони евра или 13,6%. Ова зголемување главно се должи на повисоките трошоци за персоналот, ИТ и за маркетинг. Соодносот на трошоци и приходи видливо се подобри за 4,1 процентни поени, на солидно ниво од 59,9% (2022 година: 64,0%).

Управниот одбор ги објави изгледите за финансиската 2024 година

Земајќи ги предвид солидните финансиски резултати во 2023 година, Управниот одбор очекува принос на капиталот од околу 10%-12% за 2024 година, врз основа на внимателна проценка до 40 базични поени за трошоците за ризик. Соодносот на трошоци и приходи се очекува да биде околу 63%, земајќи ги предвид зголемените инвестиции и претпоставувајќи благо намалена нето каматна маржа.

„Продолжуваме интензивно да инвестираме во однос на персоналот, ИТ и маркетингот, бидејќи сакаме видливо да го зголемиме нашиот отпечаток на нашите пазари во наредните години, со цел да постигнеме важни ефекти на скалирање, да ги зајакнеме маржите на двете страни од билансот на состојба и да го зајакнеме позитивното влијание што сакаме да го создадеме во општествата и во економиите во кои работиме“, истакна Хуберт Спехтенхаузер.

На среден рок, ПроКредит има за цел да го зголеми кредитното портфолио на Групацијата за над 10 милијарди евра. Се очекува среднорочниот принос на капиталот да се зголеми на ниво од приближно 13%-14%, со претпоставка за трошок за ризик од околу 30-35 базични поени. Соодносот на трошоците и приходите се очекува да биде приближно 57% (без еднократни ефекти).

Годишниот извештај на ПроКредит групацијата за 2023 година и Извештајот за одржливост за 2023 година од денес се достапни во делот Односи со инвеститори на веб страницата на ПроКредит Холдинг на https://www.procredit-holding.com/investor-relations/reports-and-publications/financial-reports/ и https://www.procredit-holding.com/investor-relations/reports-and-publications/non-financial-reports/.

Пакетот на Извештајот за одржливост се состои од два дела. Самиот Извештај за одржливост дава детален преглед на стратегијата за одржливост на ПроКредит Холдинг, како и на неговите перформанси за одржливост, иницијативи и цели за иднината. Освен тоа, во нејзиниот Годишен извештај, Групацијата доброволно ги открива своите стратегии, планови и методологии во контекст на два стандарди специфични за темата, ESRS E1 „Климатски промени“ и ESRS S1 „Сопствена работна сила“, во согласност со начелата на Меѓународната рамка за интегрирано известување.

Слични Теми:

Банки

Вицегувернерот Величковски: Eдноставни и евтини дигитални решенија за поголемо прифаќање електронски плаќања кај малите трговци

Објавено

пред 3 часа

на

„И покрај добрата дигитална подготвеност на граѓаните, прифаќањето електронски плаќања кај малите трговци е ограничено и претставува голем предизвик за платниот систем во земјава.“ Ова беше истакнато од вицегувернерот на Народната банка Игор Величковски на отворањето на работилницата „Премостување на јазот кај прифаќањето на електронските плаќања од страна на трговците: Форум на засегнатите страни за заклучоците и следните чекори“, организирана во соработка со Светската банка.

Тој посочи дека земјава има силна основа за дигитални плаќања, со тоа што 84% од граѓаните поседуваат платежна сметка, тројца од четворица жители кои поседуваат платежна сметка примиле или испратиле плаќања преку дигиталните канали, а покриеноста на територијата на државата со интернет и мобилна мрежа е над 90%. Сепак, повеќе од 90% од плаќањето стоки и услуги кај малите трговци сè уште се извршуваат во готовина. Во земјава кај приближно 16.700 трговци има околу 36.000 уреди на кои се прифаќаат плаќања, што покажува дека прифаќањето е концентрирано и нееднакво, особено кај малите бизниси.

Величковски нагласи дека главниот проблем не е дали граѓаните можат да плаќаат дигитално, туку дали малите трговци можат да го прифатат тоа дигитално плаќање. „Малите трговци сè уште ги сметаат електронските плаќања за скапи и сложени“, истакна тој, додавајќи дека решението е во нови, поедноставени модели на прифаќање.

Според него, конкретните чекори што ќе го намалат јазот се: воведување инстант плаќања до крајот на годината преку клонот на ТИПС, развиен од Банката на Италија за земјите од Западен Балкан согласно одлука на Европската централна банка, и придружните услуги како национален интероперабилен код за брз одговор (QR) што ќе може да се користи од сите корисници на платежни услуги независно од давателот на платежни услуги, плаќања преку едноставни идентификатори (алијаси), инстант потврда за секоја трансакција, развивањето на т. н. „Барање за плаќање (услуги)“ и дополнително развивање мобилни апликации, вклучително и од небанкарски даватели.

Тој посочи дека овие решенија директно ги засегаат најголемите препреки за малите трговци: високите трошоци за уредите за прифаќање на плаќањата, сложените процеси и недоволната флексибилност на постојните системи. „Со овие услуги, прифаќањето дигитални плаќања може да стане едноставно како примање порака на телефон“, нагласи Величковски.

Вицегувернерот ја нагласи и соработката со Светската банка во спроведувањето на реформите, вклучително и приклучувањето кон СЕПА и модернизацијата на платежната инфраструктура. „Целта е јасна, секој мал трговец во земјава да има можност да прифаќа дигитално плаќање без препреки, високи трошоци и сложени системи“, заклучи Величковски.

Продолжи со читање

Банки

Патувајте без грижи ова лето со патничко осигурување од Стопанска банка и Кроација осигурување

Објавено

пред 5 часа

на

Со почетокот на летната сезона и зголемениот број патувања, Стопанска банка АД – Скопје ги потсетува своите клиенти дека можат да патуваат побезгрижно со патничкото осигурување што го нуди во соработка со Кроација осигурување.

Осигурувањето е наменето за сите кои планираат одмор, деловно патување или викенд-посета во странство, обезбедувајќи дополнителна сигурност и заштита за време на престојот надвор од државата.

Од банката велат дека целта е клиентите да се фокусираат на своето патување и уживање, без непотребни грижи околу непредвидени ситуации.

Повеќе информации за условите и покритијата се достапни на веб-страницата на Стопанска банка.

Продолжи со читање

Банки

Нов банкомат на Халкбанк пред МНТ инспириран од театарската сцена

Објавено

пред 6 часа

на

На плоштадот покрај Македонскиот народен театар во Скопје е поставен нов банкомат на Халкбанк, чиј дизајн е внимателно приспособен на амбиентот и архитектурата на една од најзначајните културни локации во главниот град.

Со својата форма и препознатливите црвени завеси, поставката потсетува на мала театарска сцена, создавајќи впечаток дека и секојдневните банкарски услуги можат да бидат дел од градската културна приказна.

Од банката посочуваат дека идејата е функционалноста да се спои со естетиката, а урбаната инфраструктура да се вклопи во просторот наместо да доминира во него. Новиот банкомат е осмислен така што го почитува духот на локацијата и ненаметливо се интегрира во околината на Македонскиот народен театар.

Ова не е прв ваков проект на Халкбанк. Пред неколку години банката постави банкомат и во центарот на Охрид, изработен во стилот на традиционалната охридска куќа, со цел банкарската инфраструктура да стане дел од локалниот идентитет и градскиот пејзаж.

Со новото решение пред МНТ, банкоматот не е само место за извршување трансакции, туку и дел од визуелниот амбиент на градот, кој на симболичен начин ги поврзува секојдневието и културата.

Продолжи со читање

Популарно

Copyright © 2023 bankarstvo.mk. All Rights Reserved. Developed by Digital Orange