Народна банка продолжува со унапредување на монетарната политика и активностите за развој на финансиските пазари, со цел поголема стабилност и ефикасност во економијата. Ова беше истакнато од вицегувернерот Игор Величковски на Годишното собрание на АЦИ Македонија.

Тој нагласи дека централната банка и натаму ја спроведува стратегијата на стабилен девизен курс на денарот во однос на еврото, што претставува клучен фактор за одржување на ценовната стабилност и предвидливоста во економијата.

Со последните измени во оперативната монетарна рамка, како што посочи Величковски, се овозможува поголема флексибилност и поефикасно управување со ликвидноста во банкарскиот систем, како и побрза реакција на промените на пазарите. Овие мерки се особено значајни во услови на зголемена глобална неизвесност и геополитички ризици.

Во рамки на реформите, се воведуваат и механизми за попрецизно насочување на краткорочните каматни стапки, преку промени во благајничките записи и каматниот распон, што треба да овозможи поефикасен пренос на монетарните сигнали.

Народна банка во наредниот период ќе биде насочена и кон развој на девизниот пазар, со цел поголема транспарентност, ликвидност и доверба кај учесниците.

Дополнително, регулативните измени овозможуваат воспоставување платформи за секундарно тргување со финансиски инструменти, што ќе придонесе за подобра заштита на инвеститорите и усогласување со европските стандарди.

Во платежниот сектор, значаен чекор претставува приклучувањето на земјата кон Единствената област за плаќања во евра (СЕПА), што овозможува побрзи и поевтини прекугранични трансакции. Паралелно, се работи и на воспоставување систем за инстант плаќања, кој ќе овозможи трансакции во реално време, 24 часа на ден.

Од Народна банка порачуваат дека и во иднина ќе продолжат со активности за развој на финансиската инфраструктура, со цел создавање постабилно и поконкурентно економско окружување.

Стопанска банка АД Скопје нуди можност за креирање електронска идентификација преку платформата OneID, со што клиентите ќе можат полесно да пристапуваат до банкарските производи и услуги.

Од банката информираат дека корисниците преку мобилен телефон ќе имаат 24-часовен пристап до услугите, без потреба од физичка посета на филијала.

Со ова решение, се поедноставува користењето на банкарските услуги, а процесите стануваат побрзи и подостапни за клиентите.

Дополнителни информации и упатства за користење се достапни преку онлајн туторијал објавен од банката.

Со фокус на удобноста, брзината и достапноста, експозитурата Макпетрол на Комерцијална банка доби комплетно модернизиран простор, опремен и со дигитален киоск, за уште поголемо корисничко задоволство.

Реновираната експозитура Макпетрол ги отвори вратите за своите клиенти, на кои ќе им нуди побрзи и поедноставни банкарски трансакции, овозможени преку современи дигитални уреди, како и редовни шалтерски услуги.

Како дел од дигиталната трансформација на банкарските услуги, експозитурата е опремена со дигитален киоск, кој претставува практично и современо решение за плаќање сметки за јавни услуги (ЕВН, Телеком, А1, БЕГ и Телекабел), без провизија, без посета на шалтер и со картичка од која било банка. Преку дигиталниот киоск, клиентите можат да испечатат и извод од платежна сметка на физичко лице, доколку имаат активна претплата на Интернет банка.

За уплата и исплата на готовина, пак, имаат на располагање и модерен банкомат. Во промотивниот период до 31.12.2026 година, правните лица на банкоматот можат да вршат уплата на дневен промет без надомест со Visa Business Debit или Debit Mastercard Business.

Експозитурата овозможува целосно прилагоден пристап за лица со намалена мобилност.

Шалтерскиот дел од експозитурата работи од понеделник до петок од 08:00 до 16:00 часот. Клиентите можат да користат широк спектар услуги: отворање платежни сметки во денари и девизи, плаќања во земјата и во странство, брзи трансфери на пари, менувачко работење, кредитни производи и штедни влогови, купување удели во инвестициски и пензиски фондови и осигурителни полиси, како и стручни совети и обука за користење електронска и мобилна банка за физички и за правни лица.

Со модернизацијата на експозитурата Макпетрол, Комерцијална банка уште еднаш потврдува дека инвестира во корисничко задоволство, паметни дигитални решенија и услуги што носат повеќе практичност, поголема слобода и поефикасно управување со личните и деловните финансии.