Стравувањата од нов бран на инфлација повторно се во фокусот на инвеститорите, бидејќи конфликтот на Блискиот Исток ги одржува цените на нафтата на високо ниво, оценуваат аналитичарите.

Според проценките на „Блекрок“, конфликтот би можел да придонесе за раст на глобалната вкупна инфлација за околу 0,8 процентни поени. Последиците, сепак, нема да бидат еднакви во сите региони.

Европа и делови од Азија, кои во поголема мера зависат од увоз на енергија, ќе бидат поизложени на поскапувањето на енергентите и на растот на потрошувачките цени.

Од банката ОЦБЦ предупредуваат дека нов енергетски шок, во услови кога американскиот пазар на труд покажува знаци на стабилизација, би ја натерал Федералната резерва да остане фокусирана на ризиците од повисока инфлација.

Главниот инвестициски стратег на „ПНЦ асет менаџмент“, Јунг-Ју Ма, смета дека построгиот пристап на американската централна банка ќе продолжи сѐ додека не дојде до олеснување на состојбата на пазарите на нафта и намалување на другите инфлациски притисоци.

Тој предупреди дека неколку квартали со повисоки цени на нафтата и продолжени инфлациски притисоци би можеле да ги загрозат позитивните движења кај профитните маржи на малите и средните американски компании.

Цените на нафтата се намалија во раното тргување во петокот, но и натаму се движат кон неделна добивка, додека САД и Иран продолжуваат со меѓусебни напади.

Цената на златото бележи ограничен пад во текот на денешното тргување, додека продажниот притисок продолжува да доминира на пазарот, објави „Економис“.

Поголем пад засега спречува стабилноста на психолошки важната граница од 4.000 долари, која претставува клучно ниво на поддршка за благородниот метал.

Сепак, техничките показатели и натаму упатуваат на негативни движења. Златото продолжува да се тргува под 50-периодниот експоненцијален подвижен просек, кој во моментов дејствува како ниво на отпор.

Цената истовремено се движи по надолна тренд-линија, што го потврдува краткорочниот негативен тренд. Индикаторите за релативна сила, исто така, испраќаат негативни сигнали по излегувањето од зоната на прекумерна купеност.

Според анализата, ризикот од натамошен пад на цената на златото останува присутен доколку продолжи продажниот притисок и биде пробиено нивото на поддршка од 4.000 долари.

Цените на нафтата во понеделникот ги загубија претходните добивки откако иранското Министерство за надворешни работи соопшти дека преговорите со Соединетите Американски Држави би можеле да продолжат доколку бидат засновани врз националните интереси на Иран. Инвеститорите изјавата ја протолкуваа како сигнал дека дипломатските напори може повторно да бидат активирани.

Фјучерсите на суровата нафта од типот „брент“ се намалија за 0,18 проценти, на 87,94 долари за барел, откако претходно достигнаа 91,42 долари, што беше највисоко ниво од 11 јуни.

Американската нафта WTI поевтини за 0,82 проценти, на 81,81 долар за барел, откако во текот на тргувањето достигна 85,39 долари, највисока цена од 12 јуни.

Портпаролот на иранското Министерство за надворешни работи, Есмаил Багаеи, изјави дека посредници во изминатите денови доставиле нови пораки до Техеран, но не откри детали за содржината на предлозите.

Сепак, загриженоста за снабдувањето со нафта останува поради значително намалениот бродски сообраќај низ Ормутскиот Теснец. Според податоците на LSEG, во неделата низ теснецот поминале само четири брода, во споредба со осум претходниот ден.

Цените на нафтата претходно пораснаа поради интензивирањето на судирот меѓу САД и Иран и стравувањата дека транспортот преку Ормутскиот Теснец ќе остане нарушен. Соединетите Американски Држави деветта ноќ по ред извршуваа напади врз Иран, додека Кувајт и Бахреин пријавија нови ирански напади.

Ормутскиот Теснец е една од најважните светски рути за транспорт на енергенси. Пред избувнувањето на конфликтот низ него се транспортираа околу 20 проценти од глобалните резерви на нафта, поради што секое нарушување на сообраќајот предизвикува стравувања од недостиг и раст на цените.