Буџетскиот дефицит на Северна Македонија во периодот јануари–април 2026 година изнесува 25,6 милијарди денари (околу 415 милиони евра), што претставува значително зголемување во споредба со истиот период минатата година, кога дефицитот изнесувал 14,7 милијарди денари.

Според податоците на Министерството за финансии, вкупните приходи во консолидираниот буџет во првите четири месеци од годинава достигнале 113,6 милијарди денари, што е повеќе од 107 милијарди денари регистрирани во истиот период во 2025 година.

Во исто време, буџетските расходи пораснале уште побрзо и достигнале 139,2 милијарди денари, наспроти 121,7 милијарди денари во првите четири месеци од минатата година.

Само во април, буџетот забележал дефицит од 380 милиони денари, додека во април 2025 година дефицитот изнесувал само 5,8 милиони денари.

На крајот од 2025 година, буџетскиот дефицит на државата изнесуваше 41,8 милијарди денари, што беше малку пониско во однос на 41,9 милијарди денари една година претходно.

Податоците покажуваат дека и покрај растот на буџетските приходи, значителното зголемување на расходите придонело за продлабочување на буџетскиот јаз во првите четири месеци од 2026 година.

Во првото тримесечје од 2026 година бројот на невработени лица во земјава е намален за еден процент во споредба со претходниот квартал, а за 2,3 проценти во однос на истиот период лани, покажуваат податоците на Државниот завод за статистика.

Според статистиката, во државата има 90.499 невработени лица, додека бројот на вработени изнесува 707.385. Стапката на невработеност е 11,3 проценти, а стапката на вработеност достигнува 46,5 проценти.

Од вкупниот број невработени, 62,4 проценти се мажи, а 37,6 проценти жени. Кај вработените, пак, мажите учествуваат со 57,9 проценти, а жените со 42,1 процент.

Податоците покажуваат дека активното население во земјата брои 797.884 лица, при што стапката на активност изнесува 52,5 проценти.

Во меѓувреме, евидентиран е раст на неформалната вработеност. Во првите три месеци од годинава неформално биле ангажирани 94.197 лица, што претставува зголемување од 4,3 проценти во однос на претходното тримесечје.

Најголем дел од неформално вработените работат во секторот земјоделство, шумарство и рибарство, каде што се ангажирани 43,6 проценти од нив, додека 17,5 проценти работат во градежништвото.

Најновите податоци укажуваат дека пазарот на трудот бележи благо намалување на невработеноста, но истовремено и зголемување на бројот на лица кои работат надвор од формалните работни односи.

Цената на американската сурова нафта WTI во петокот се спушти под 88 долари за барел и е на пат да го забележи најголемиот месечен пад во последниот период, по извештаите за можно продолжување на примирјето меѓу САД и Иран.

Според информациите, Вашингтон и Техеран постигнале начелен договор за продолжување на прекинот на непријателствата за дополнителни 60 дена, а се разгледува и можноста за непречен поморски сообраќај низ Ормутскиот Теснец, една од најважните светски рути за транспорт на нафта.

Во извештаите се наведува и дека Иран би требало да ги отстрани сите мини од пловниот пат во рок од 30 дена.

Сепак, неизвесноста останува. Американскиот претседател Доналд Трамп сè уште не ги одобрил предложените услови, додека потпретседателот Џеј Ди Венс изјави дека е прерано да се каже дали и кога ќе биде постигнат конечен договор.

Американската нафта WTI во моментов се тргува по цена од 87,46 долари за барел, што претставува дневен пад од 1,62 проценти и месечен пад од 16,8 проценти.

И нафтата Брент забележа пад и се тргува околу 91 долар за барел, што е за 17,5 проценти пониско во споредба со почетокот на месецот.

Пазарите позитивно реагираат на можноста за дипломатско решение меѓу САД и Иран, иако остануваат отворени клучните прашања поврзани со иранската нуклеарна програма, контролата врз Ормутскиот Теснец и евентуалното укинување на санкциите кон Техеран.