Азиските берзи забележаа силен раст во четвртокот, следејќи го позитивниот тренд на Волстрит, откако порасна оптимизмот дека тензиите на Блискиот Исток би можеле да се намалат.

Американскиот претседател Доналд Трампизјави дека преговорите меѓу Вашингтон и Техеран се во „завршна фаза“, што дополнително ја подобри довербата кај инвеститорите.

Во исто време, цените на нафтата остануваат под притисок поради блокадите на иранските пристаништа од страна на американската администрација и ограничувањата во Ормутскиот Теснец, кој е еден од најважните светски енергетски поморски коридори.

Јапонскиот индекс Nikkei 225 порасна за 3,52%, поддржан од силните трговски податоци на Јапонија. Извозот во април се зголемил за 14,8% на годишно ниво, најмногу благодарение на растот на испораките на полупроводници.

Акциите на SoftBank Group скокнаа за речиси 20%, по силните резултати на Nvidia и зголемениот интерес за секторот на вештачка интелигенција.

Јужнокорејскиот индекс KOSPI порасна за 7,68%, додека технолошкиот KOSDAQ доби 5,02%.

Акциите на Samsung Electronics пораснаа за повеќе од 6%, откако беше избегнат штрајк на околу 47.000 работници по напредокот во преговорите за платите. Истовремено, SK Hynix забележа раст од 11%.

Австралискиот индекс S&P/ASX 200 се зголеми за 1,69%, додека кинескиот CSI 300 порасна за 0,56%.

Во Хонг Конг, Hang Seng Index остана речиси непроменет, а индискиот Nifty 50 порасна за 0,42%.

Сојузот на синдикати на Македонија (ССМ) соопшти дека вредноста на минималната синдикална кошничка за мај 2026 година изнесува 68.743 денари, што е за 54 денари помалку во однос на април, кога била пресметана на 68.797 денари.

Според податоците на ССМ, најголем дел од месечните трошоци на едно четиричлено семејство се однесуваат на храна и пијалоци, за кои се потребни 25.475 денари или 37,1 проценти од вкупната кошничка.

Значителен дел од трошоците се наменети и за домување, вода, електрична енергија и греење, кои достигнуваат 6.338 денари, додека за облека и обувки се издвојуваат 6.334 денари.

Во пресметката се вклучени и трошоци за транспорт, комуникации, образование, рекреација и култура, ресторани и хотели, како и други основни услуги и производи.

Од ССМ посочуваат дека доколку семејството живее во изнајмен стан од 60 квадратни метри, вредноста на минималната синдикална кошничка се зголемува на 84.117 денари. Во тој случај, трошоците за домување и комуналии достигнуваат 21.713 денари.

Еврозоната забележа значителен пад на трговскиот суфицит во размената со остатокот од светот во првиот квартал од годинава, покажуваат првичните податоци на Евростат.

Во март еврозоната остварила трговски суфицит од 7,8 милијарди евра, што е драстично помалку во споредба со истиот месец минатата година, кога суфицитот изнесувал 34,1 милијарда евра.

На годишно ниво, извозот од еврозоната во март е намален за 5,5 проценти и изнесувал 265,2 милијарди евра, додека увозот пораснал за 4,4 проценти, достигнувајќи 257,4 милијарди евра.

Во февруари трговскиот суфицит на еврозоната изнесувал 11,1 милијарди евра.

Падот на суфицитот најмногу се должи на намалувањето на вишокот во хемиската индустрија, како и во производството на машини и возила. Во хемискиот сектор суфицитот речиси е преполовен – од 41,8 милијарди на 18,9 милијарди евра.

Во текот на целиот прв квартал еврозоната остварила позитивно трговско салдо од 16,6 милијарди евра, што е значително помалку од 55,4 милијарди евра во истиот период лани.

Вкупниот извоз во првите три месеци е намален за 6,5 проценти, на 713,1 милијарда евра. Истовремено, увозот е намален за 1,5 проценти и изнесувал 696,5 милијарди евра.

Трговијата внатре во еврозоната во првиот квартал достигнала вредност од 685,5 милијарди евра, што е за 1,9 проценти повеќе во однос на истиот период минатата година.

Податоците за целата ЕУ покажуваат дека трговскиот суфицит во март изнесувал 5,9 милијарди евра, во споредба со 34 милијарди евра една година претходно.

Извозот на ЕУ е намален за 8,7 проценти, додека увозот е зголемен за 2,7 проценти.

Резултатот е послаб и во споредба со февруари, кога трговскиот суфицит изнесувал 9,1 милијарда евра. Главна причина за падот е продлабочувањето на дефицитот во енергетскиот сектор, кој се зголемил за речиси седум милијарди евра.

Во првиот квартал ЕУ остварила трговски суфицит од 8,4 милијарди евра, додека во истиот период минатата година суфицитот изнесувал 50,7 милијарди евра.

Во тој период извозот е намален за 8,9 проценти, а увозот за три проценти.

Внатрешната трговија во ЕУ пораснала за 2,7 проценти и достигнала 1,07 трилиони евра.

Најголеми трговски партнери на ЕУ остануваат САД, Кина, Обединетото Кралство, Швајцарија и Турција.

Во март ЕУ остварила трговски суфицит со САД од 13,5 милијарди евра, но и тоа е значително помалку во споредба со 40,4 милијарди евра една година претходно.

Со Кина, пак, ЕУ забележала трговски дефицит од 32,6 милијарди евра.

Меѓу десетте најголеми трговски партнери, ЕУ имала суфицит со САД, Обединетото Кралство, Швајцарија и Турција, додека дефицит е регистриран во трговијата со Кина, Норвешка, Јапонија, Индија, Јужна Кореја и Бразил.