Connect with us

Банки

Донација на НЛБ Банка за Клиниката за гинекологија и акушерство

Објавено

пред 2 години

на

Во месецот кога се одбележува Светскиот ден на предвремено родените бебиња, 17 ноември, Универзитетската Клиника за гинекологија и акушерство официјално го пушти во употреба интраклиничкиот транспортен систем за респираторна терапија на новородени, донација од НЛБ Банка, реализирана во рамките на проектот „Свет полн со добрина е свет полн со можности“.

Интраклиничкиот транспортен систем за респираторна терапија на новородени е прв и единствен на државните клиники во земјава со чија употреба значително ќе се подобрат резултатите за време на „златниот час“ – првиот час по раѓањето на новороденчето, транспортната патека и престојот во Одделението за интензивна нега при неонатолошкото одделение. Овој медицински апарат е најнова иновација кој овозможува примена на вистинска заштитна стратегија за вентилација на белите дробови и мозокот, сè со цел да се спречат повреди на белите дробови, хемодинамски и невролошки оштетувања кај новороденчето.

„Искрена благодарност до НЛБ Банка за оваа значајна донација. Кога велам значајна, навистина мислам така бидејќи со овој апарат се обезбедува заштитна нега и средина која одговара на потребите на бебето и се зголемуваат шансите за намалување на бројот на респираторни компликации и смртни случаи кај предвремено родените бебиња.“ – истакнува Директорката на Клиниката за гинекологија и акушерство, Проф. Д-р. Ирена Алексиоска Папестиев и појаснува: „Недоносените доенчиња се особено изложени на зголемен ризик од морбидитет и морталитет поради незрелоста на нивните телесни системи. Неонаталната вентилација е важен дел од грижата што се обезбедува во единицата за неонатална интензивна нега. Но, вентилацијата на новороденчињата е значителен предизвик во периодот по реанимација до сместување во инкубатор. Интраклиничкиот транспортен систем за респираторна терапија овозможува пренос на новородените до одделението со респираторна поддршка, што е многу значајно, бидејќи иако се работи за само неколку минути, без респираторна поддршка доаѓа до респираторната инсуфициенција која е една од главните причини за неонатална смртност или можни компликации.“

Инаку, проектот „Свет полн со добрина е свет полн со можности“ во рамките на кој е и оваа донација беше реализиран како дел од голема регионална донаторска акција на НЛБ Групацијата кога беа донирани вкупно 1,35 милиони евра на сите пазари каде што е присутна Групацијата.

„Кога велиме „Свет полн со добрина е свет полн со можности“, веруваме во можности за сите! Оваа донација им дава можност на „малите херои“ да се изборат за воздух и да зачекорат низ животот, охрабрувајќи ги нивните семејства дека има надеж. Квалитетна медицинска нега и грижа е значаен столб за одржливо здравство. Како општествено одговорна компанија, ние сме силно посветени на одржливи проекти, со посебен фокус на организации и институции од јавен карактер кои имаат витална улога и придонесуваат за добробит на заедницата, на што остануваме посветени и во иднина“. – истакнува по повод донацијата Тони Стојановски, Претседател на Управниот одбор на НЛБ Банка.

Светскиот ден на предвремено родените бебиња се одбележува секоја година на 17 ноември со цел да се подигне свеста за предвременото раѓање и загриженоста на нивните семејства ширум светот. Статистиките говорат дека приближно 15 милиони бебиња се раѓаат предвремено годишно, а предвременото породување е водечка причина за смрт кај децата на возраст под пет години во светот. Во Македонија е значително зголемен бројот на  прематури – предвремено родени бебиња. За илустрација, според последните информации од Клиниката за гинекологија и акушерство во Скопје, на Одделението за интензивна нега при неонатолошкото одделение голем дел од предвреме родените бебиња се екстремни прематури, родени пред 27 гестациска недела со исклучително мала родилна тежина.

Слични Теми:

Банки

Народна банка: Каматите на вкупните кредити се намалија, новите заеми поскапеа во август

Објавено

пред 7 часа

на

Просечната каматна стапка на вкупните кредити во август 2026 година изнесувала 4,67 проценти, што претставува намалување од 0,01 процентен поен во однос на претходниот месец и од 0,23 процентни поени на годишно ниво, покажуваат најновите податоци на Народната банка.

Кај депозитите, просечната каматна стапка останала непроменета во однос на јули и изнесувала 2,18 проценти. На годишно ниво е забележано минимално намалување од 0,01 процентен поен.

Истовремено, податоците покажуваат поинакво движење кај новите банкарски производи. Просечната каматна стапка на новоодобрените кредити во август се зголемила за 0,26 процентни поени на месечно и за 0,22 процентни поени на годишно ниво, достигнувајќи 4,70 проценти.

Повисоки камати се забележани и кај новопримените депозити. Нивната просечна каматна стапка изнесувала 2,72 проценти, што е зголемување од 0,30 процентни поени во однос на јули и од 0,66 процентни поени во однос на август минатата година.

Каматите за компаниите благо се намалуваат кај постојните кредити

Кај корпоративниот сектор, просечната каматна стапка на вкупните кредити во август се намалила за 0,01 процентен поен и изнесувала 4,33 проценти. На годишно ниво намалувањето изнесува 0,19 процентни поени.

Кај депозитите на компаниите, пак, е забележано зголемување. Просечната каматна стапка изнесувала 2,69 проценти, што е раст од 0,06 процентни поени на месечно и од 0,16 процентни поени на годишно ниво.

Позначителен раст е регистриран кај новоодобрените корпоративни кредити. Нивната просечна каматна стапка достигнала 4,68 проценти, по месечен раст од 0,47 процентни поени. На годишна основа, по неколку месеци на намалување, каматата се зголемила за 0,35 процентни поени.

Кај новопримените депозити на компаниите каматната стапка изнесувала 2,75 проценти, при месечен раст од 0,77 и годишен раст од 0,89 процентни поени.

Каматата на кредитите за населението падна на 5 проценти

Кај домаќинствата продолжува трендот на намалување на просечната каматна стапка на вкупните кредити. Во август таа изнесувала 5 проценти, што е намалување од 0,02 процентни поени во однос на јули и од 0,27 процентни поени на годишно ниво.

Каматната стапка на вкупните депозити на домаќинствата останала непроменета на месечно ниво и изнесувала 2,11 проценти. Во споредба со август минатата година, таа е пониска за 0,03 процентни поени.

Кај новоодобрените кредити за домаќинствата немало промена во однос на претходниот месец, па просечната каматна стапка останала на 4,73 проценти. На годишно ниво, сепак, таа е повисока за 0,05 процентни поени.

Новопримените депозити на домаќинствата во август носеле просечна камата од 2,72 проценти, што претставува зголемување од 0,07 процентни поени на месечно и од 0,54 процентни поени на годишно ниво.

Податоците на Народната банка покажуваат дека, иако просечните камати на вкупното кредитно портфолио продолжуваат благо да се намалуваат, кај новоодобрените кредити во август е забележан раст на каматните стапки. Од друга страна, повисоките камати на новопримените депозити значат и нешто подобри услови за новото штедење во банките.

Продолжи со читање

Банки

НЛБ Банка ја исплати септемвриската пензија

Објавено

пред 10 часа

на

НЛБ Банка информира дека е извршена исплатата на пензиите за месец септември, а средствата веќе им се достапни на пензионерите.

Од Банката посочуваат дека корисниците можат веднаш да располагаат со средствата и ги охрабруваат пензионерите да ги користат достапните дигитални и безготовински канали за плаќање.

„Ве советуваме вашето ценето време да го заштедите преку користење на мрежата на банкомати, поголемо користење на безготовински плаќања во продажната мрежа или преку електронско и мобилно банкарство“, наведуваат од НЛБ Банка.

Со ова, пензионерите кои својата пензија ја примаат преку НЛБ Банка можат да ги користат средствата уште веднаш, без потреба од чекање на шалтер.

Продолжи со читање

Банки

НЛБ Банка ја отвора новата NLB Next зона со „AFTER CLASS“ за студентите

Објавено

пред 10 часа

на

НЛБ Банка Скопје на 1 октомври ќе ја отвори новата NLB Next зона со „AFTER CLASS“ настан во Паркчето Кино Карпош.

Настанот е најавен како неформален почеток на новата академска година и е наменет пред сè за студентите и младите.

Програмата ќе трае од 14:00 до 16:00 часот, а за атмосферата ќе се погрижи DJ THE AFT3R. Предвидени се и street food понуда и коктели.

Од НЛБ Банка ги повикуваат младите по првите предавања да се соберат во Паркчето Кино Карпош и заедно да го одбележат стартот на академската година.

Со отворањето на новата NLB Next зона, Банката продолжува со активности насочени кон помладата генерација и создавање простор за дружење, комуникација и современо банкарско искуство.

Продолжи со читање

Популарно

Copyright © 2023 bankarstvo.mk. All Rights Reserved. Developed by Digital Orange