Connect with us

Банки

Советот на Народната банка го усвои Кварталниот извештај: Монетарната политика ќе придонесе за забавување на инфлацијата и задржување на стабилноста на курсот

Објавено

пред 9 месеци

на

Советот на Народната банка, на 2 февруари 2024 година, ја одржа својата редовна седница, на која го усвои Кварталниот извештај за последното тримесечје од 2023 година. Во Извештајот се наведува дека во последниот квартал лани, Народната банка нема направено дополнителна промена во поставеноста на монетарната политика, соодветно на условите во економијата. Тековното ниво на основната каматна стапка, заедно со промените кај задолжителната резерва, како и со преземените макропрудентни мерки, овозможуваат забавување на инфлацијата, во согласност со очекувањата и задржување на стабилноста на девизниот курс. Со оглед на монетарната стратегија на стабилен девизен курс на денарот во однос на еврото, поставеноста на монетарната политика на Народната банка соодветствува со монетарната политика на Европската централна банка.

Најновите показатели од домашната економија упатуваат на макроекономска слика којашто главно соодветствува со октомвриските оцени. Реалниот БДП во третиот квартал бележи годишен раст од 1,2%, што е во согласност со октомврискиот циклус проекции (раст од 1,1%). Расположливите високофреквентни податоци за економската активност покажуваат рани знаци на забрзување на годишниот раст во последното тримесечје од годината, што засега е во согласност со октомвриските оцени за умерен раст на БДП во 2023 година од 1,9%, а понатаму зголемување на 3% во 2024 година и 4% во 2025 − 2026 година. Зголемените геополитички тензии поради војната во Украина и конфликтот меѓу Израел и Газа и нивното евентуално проширување се клучните ризици на краток рок, коишто би можеле да предизвикаат нарушување на енергетските пазари и на глобалните трговски текови.

Во последното тримесечје од 2023 година, годишната стапка на инфлација дополнително забави, сведувајќи се на 3,4%. За целата 2023 година, просечната годишна стапка на инфлација изнесува 9,4% и е во согласност со проекцијата (9,5%). Според октомвриските оцени, за 2024 година се очекува дека просечната инфлација ќе се сведе на нивото од 3,5% до 4% и потоа ќе се стабилизира околу 2% на среден рок. Ризици околу инфлацијата сè уште постојат и се поврзани главно со цените на примарните производи на светските берзи, поради геополитичките тензии и климатските промени, како и со промените на регулираните цени и побарувачката.

Во четвртиот квартал од 2023 година, кредитната активност на банкарскиот сектор умерено се засили во однос на претходниот квартал, што е карактеристично за крајот на годината. Сепак, на годишна основа, стапката на раст на вкупните кредити и натаму забавува, при затегнати монетарни услови, така што во последното тримесечје на 2023 година се сведе на 5,1%, што е малку под очекувањата според октомвриската проекција (5,7%). Истовремено, е забележан поизразен квартален раст кај депозитната база и натамошно забрзување на годишниот раст на депозитите, којшто достигна 9,1%, што е над очекувањата за крајот на годината според октомвриската проекција (8,4%). Притоа, и натаму има поволни придвижувања од аспект на рочната и валутната структура на штедењето (раст на долгорочните и на денарските депозити), одразувајќи ги ефектите од мерките преземени од страна на Народната банка и стабилизираните очекувања на економските субјекти.

Надворешната позиција на економијата е поволна и овозможува раст на девизните резерви. Податоците за девизните резерви за четвртото тримесечје се подобри од очекувањата според октомвриските проекции, со што за целата 2023 година тие остварија повисок раст од очекуваниот и останаа во сигурната зона.

Во Извештајот се наведува дека условите за водење на монетарната политика и натаму се неизвесни, додека ризиците за светската и домашната економија на краток и на среден рок сѐ уште постојат, поради што е потребна натамошна претпазливост, особено при водењето на макроекономските политики коишто влијаат врз побарувачката во економијата. Народната банка и натаму е подготвена да ги употреби сите неопходни инструменти и да презема соодветни мерки со коишто ќе се придонесе за задржување на стабилноста на девизниот курс, стабилизирање на инфлациските очекувања и за ценовна стабилност на среден рок.

Слични Теми:

Банки

Бројни медали и одличен настап на КБ тимот на спортските игри по повод Денот на штедењето

Објавено

пред 20 часа

на

Со уште една жетва на медали вработените на Комерцијална банка имаа одличен настап на спортските игри што се одржаа викендов по повод Денот на штедењето.

Во конкуренција на 13 финансиски институции, КБ тимот собра четири златни и три бронзени медали. Златото им припадна на мешаната екипа во одбојка, женските екипи во пикадо и во куглање и на машката екипа во куглање. На трето место се пласираа женските екипи во тенис и во пинг-понг и машката екипа во пинг-понг.

Турнирот беше во организација на Синдикатот на финансиски организации на Македонија – СФОМ.

Комерцијална банка им честита на вработените и се радува на нивниот успешен настап на спортските игри, со кој уште еднаш покажаа дека тимскиот дух и посветеноста се вредности кои постојано ги негуваат.

Продолжи со читање

Банки

ПроКредит Банка со поддршка од ЕИБ презема проактивни чекори во управувањето со климатските ризици

Објавено

пред 20 часа

на

ПроКредит Банка започна нова соработка со Европската инвестициска банка (ЕИБ) како дел од Програмата за техничка помош на Greening Financial Systems (GFS), со што ќе добие поддршка во напорите за управување со климатските ризици преку споделено знаење и техничка експертиза коишто се неопходни за спроведување на сеопфатен план за климатска транзиција.

Со оваа иницијатива, ПроКредит Банка ја потврдува својата долгорочна посветеност на одржливост, справувајќи се со еден од најитните предизвици на нашето време – климатските промени.

Народната банка на Северна Македонија веќе ја истакна важноста на управувањето со климатските ризици во финансискиот сектор, а почнувајќи од 2025 година, ова ќе стане и законско барање. Сепак, ПроКредит Банка презема проактивен пристап со интегрирање на овие промени пред регулативата, позиционирајќи се како лидер во финансискиот сектор во транзицијата кон одржливост.

Преку програмата GFS, експертите на ЕИБ тесно ќе соработуваат со повисокото раководство на банката, како и одделот за ризик, за да ги проценат нејзините сегашни практики и да развијат стратегија за поефикасно управување со климатските ризици.

Програмата ќе биде со времетраење од 16 до 18 месеци и ќе се фокусира на усогласување на практиките за управување со климатските ризици на ПроКредит со водечките финансиски институции во ЕУ, со цел да утврди дека банката е добро подготвена за идните регулаторни барања и климатскиот пејзаж што се развива.

„Како одговорна банка, ја разбираме нашата улога во обезбедување поддршка за нашите клиенти при справување со предизвиците што ги носат климатските промени.

Со учество во оваа програма, добиваме пристап до најсовремени сознанија и алатки кои ќе ни помогнат да изградиме ефикасен систем за адекватно идентификување на климатските ризици на кои се изложени нашите клиенти. Ваквиот пристап ќе овозможи навремено преземање мерки со цел справување со последиците од климатските промени. Ова е особено важно како за растот и развојот на нашите клиенти така и за економијата во целост, а ќе придонесе и во реализацијата на плановите за зелена транзиција.

Она што е за нас особено важно, е што ваквите современи практики кои се дел од нашето работење ќе помогнат уште повеќе во создавањето на одржлива иднина за сите“ , изјави Маја Михајлова, член на Управниот одбор на ПроКредит Банка.

Програмата GFS, поддржана од ЕИБ во партнерство со германското Сојузно министерство за економски прашања и климатски активности (BMWK), е дизајнирана да им помогне на банките и финансиските институции да изградат капацитет, да споделуваат најдобри практики и да го зголемат уделот на зелените инвестиции во нивните портфолија. Крајната цел на ЕИБ е да создаде финансиски системи отпорни на климата на глобално ниво и да ги поддржи финансиските посредници во промовирањето на одржливиот раст.

Додека Северна Македонија го продолжува својот пат кон одржлив развој, ПроКредит Банка е подготвена да одигра клучна улога во поттикнувањето на оваа промена. Раното усвојување на мерките за управување со климатскиот ризик од страна на банката поставува силен пример во финансискиот сектор, покажувајќи ја важноста од преземање итни активности за ублажување на ризиците поврзани со климатските промени.

Продолжи со читање

Банки

Познато е колкав надомест ќе земаат членовите на надзорните органи на НЛБ Банка

Објавено

пред 2 дена

на

НЛБ Банка АД Скопје го закажа Собранието на акционери кое е предвидено да се одржи на 29.11.2024 година (Петок) со почеток во 12.00 часот, во просториите на банката.

Покрај именувањето на нов член на Надзорниот одбор, кој треба да го замени Блаж Бродњак кој поднесе оставка од функцијата Претседател на Надзорниот Одбор на ден 10.10.2024 година, на дневен ред за Собранието на акционери е и утврдување на годишните надоместоци на членовите на надзорните органи.

За нив ќе се гласа на претстојното Собрание на акционери, но со оглед на тоа што најголем и доминантен акционер на НЛБ Банка АД Скопје е Нова Љубљанска Банка д.д. Љубљана, со 86,97% учество (742.804 акции) во вкупниот број на акции и која преку своите претставници во Надзорниот одбор управува со Банката, логично е да се очекува дека овие одлуки ќе бидат усвоени.

Согласно предложената одлука, Членот на Надзорниот одбор ќе прима основен надомест за извршување на функцијата во износ од 15.000 евра нето годишно (основен надомест) или 1250 евра месечно.

Претседателот на Надзорниот одбор има право да добие дополнителна исплата за
извршување на претседателската функција во износ од 25% од основниот надомест
(дополнителен надомест) односно дополнителни 3.750 евра годишно.

Членот на друг одбор (кој е и член на Надзорниот одбор) има право да добие
дополнителен надомест за извршување на функцијата, што изнесува 10% од
основниот надомест (исплата за член на друг одбор), при што исплатата се плаќа за
членство во најмногу два одбори, без оглед дали поединечен член на Надзорниот
одбор е член на повеќе од два одбори.

Покрај исплата за член на друг одбор, претседателот на одборот (кој е и член на
Надзорниот одбор) има право да добие дополнителна исплата за извршување на
функцијата претседател во износ од 5 % од основниот надомест (исплата за
претседател на одбор), при што оваа исплата се плаќа за функција во еден одбор, без
оглед дали поединечниот член на Надзорниот одбор ја извршува оваа функција во
повеќе од еден одбор.

Член на одбор (кој не е член на Надзорниот одбор) ќе добие исплата на основен
надомест за извршување на функцијата во износ од 7.500 евра нето годишно (основен
надомест за членство во одбор).

Претседателот на одборот (кој не е член на Надзорниот одбор) има право да добие
дополнителен надомест за извршување на функцијата во износ од 15 % од основниот
надомест на одборот (дополнителен надомест за членство во одбор).

Надворешните членови на Надзорниот одбор и членовите на другите одбори ќе го добиваат горенаведениот надомест во пропорционални месечни исплати на кои имаат право сè додека ја извршуваат функцијата. Доколку тие ја извршуваат функцијата помалку од еден месец, тие имаат право на пропорционална исплата пресметана врз основа на бројот на денови кога ја извршувале секоја функција.

Оваа Одлука доколку биде донесена, ќе се применува од 01.01.2025 година.

Продолжи со читање

Популарно