Собранието на Универзална Инвестициона Банка АД Скопје на ден 09.03.2026 година донесе одлука за именување на Антонио Валентинов Дичев и Николај Бебов за нови членови на Надзорниот одбор, со мандат од четири години, сметано од денот на добивање на претходна согласност од Народната банка.

Новите членови ќе ги остваруваат своите права и обврски согласно Законот за банките, Статутот и интерните акти на Банката.

Николај Бебов

Николај Бебов е магистер по право на Универзитетот „Колумбија“ во Њујорк, додека основните правни студии ги завршил на Софискиот универзитет „Св. Климент Охридски“. Тој е ко-основач и партнер во реномираната правна групација за финансиски услуги „Tsvetkova Bebov & Partners“ и важи за еден од водечките експерти во Бугарија во областа на банкарското и финансиското право, како и пазарите на капитал.

Бебов бил ангажиран како експерт и ко-раководител во повеќе значајни проекти во Северна Македонија, меѓу кои:

• Проект за законодавство за нетирање и финансиски колатерал, поддржан од ЕБОР
• Проект за усогласување на законодавството за пазарите на капитал

Тој има богато искуство во трансакции на пазарите на долгови и акции, IPO, листинзи, корпоративно управување, банкарско кредитирање, проектно и аквизициско финансирање, како и во регулаторни прашања поврзани со CRR, CRD и BRRD, вклучително и теми од областа на банкарската стабилност, резолуција и управување со ризици.

Антонио Валентинов Дичев

Антонио Валентинов Дичев е доктор на науки по финансии на Академијата за економија „Д.А. Ценов“ во Свиштов, Бугарија, со докторска дисертација на тема „Проценка на финансиски ризик преку машинско учење“.

Професионалната кариера ја започнал во Фибанк, каде напредувал од аналитичар до раководител на одделение за статистички анализи и модели, а потоа и заменик-директор на секторот за управување со ризици и член на АЛКО, позиција која ја извршува и денес.

Со цел дополнително зголемување на безбедноста при интернет плаќањата и усогласување со новите регулаторни барања кои стапија во сила од 1 март 2026 година, АЛТА банка АД Битола воведува засилена автентикација при онлајн плаќања со платежни картички.

Како дел од оваа новина, Банката ја воведува новата мобилна апликација ALTA Bank2Go, преку која корисниците ќе можат брзо и едноставно да ги потврдуваат интернет трансакциите преку push нотификации на својот мобилен уред. Овој начин на потврда овозможува побрз, поедноставен и посигурен процес при извршување на онлајн плаќањата.

Засилената автентикација (Strong Customer Authentication – SCA) претставува дополнителен безбедносен механизам кој значително го намалува ризикот од злоупотреба и неовластени трансакции, обезбедувајќи повисоко ниво на заштита при онлајн плаќањата.

Користењето на апликацијата ALTA Bank2Go е бесплатно, а за нејзино користење потребно е клиентите да бидат регистрирани и активни корисници на постоечката мобилна апликација Bank2Go, која е наменета за секојдневни банкарски услуги како увид во состојба, плаќања и трансфери.

Со воведувањето на ова решение, АЛТА банка продолжува да инвестира во современи дигитални услуги со цел да обезбеди повисоко ниво на безбедност и поедноставно банкарско искуство за своите клиенти.

Секогаш е задоволство да се прославуваат успесите, особено кога тоа се прави на искрен начин, кој јавноста го препознава. Но, за секој успех е потребен труд, многу работа и квалитетен и посветен тим кој е подготвен да ги реализира дури и најамбициозните замисли. Токму таков е тимот на Публицис Груп, кој ја освои наградата за Најдобар корпоративен настан на овогодинешниот BEAM Festival, за организирање на прославата за 40-от роденден на НЛБ Банка Скопје.

Одделот за организација на настани на Публицис Груп, заедно со креативниот тим на Saatchi & Saatchi и во соработка со тимот на НЛБ Банка Скопје организираа спектакуларен гала концерт со нашиот најголем виртуоз на пијано, маестро Симон Трпчевски, кој настапи во придружба на квинтетот Македонисимо и Камерниот ансамбл – солисти од Факултетот за музичка уметност во Скопје, како и поп-дивата Каролина Гочева.

„Со огромна чест и задоволство ја примаме оваа награда и притоа сакаме да се заблагодариме на НЛБ Банка Скопје за укажаната доверба да организираме еден вака важен настан, кој одбележува јубилеј со кој малку компании во земјава можат да се пофалат. Честитки до целата екипа која беше вклучена во процесот и која помогна да го направиме невозможното – возможно“, изјавија од Публицис Груп.

Настанот кој се одржа на 26 ноември 2025 година во Националната опера и балет на едно место ги собра претставниците на институциите, партнерите и соработниците, клиентите, важните и истакнати поединци на Банката, како и вработените, кои ја имаа можност да уживаат во спектакуларна прослава која уште долго ќе се памети.

Претходно истиот ден беше организирана и конференцијата „NLBNext“ на тема „Иднината на банкарството“ која понуди интересни панел дискусии и го задржа вниманието на присутните. Беше креирана и интензивна ПР комуникација која неколку дена ги исполни економските рубрики на најрелевантните медиуми во земјава.

„Нашата прослава инспирирана од јубилејниот слоган Што ако можеш сѐ? и четирите децении посветеност, иновации и раст е доказ дека кога ќе се спојат луѓето, визијата и храброста, само небото е граница. Море од идеи, неколку креативни концепти и стотици часови тимска работа за да се создаде искуство што се памети.

Јубилејот на Банката беше повеќе од само настан. Тој беше живописно патување низ историјата, сегашноста и иднината, прослава посветена на извонредност и партнерства“, изјавија од НЛБ Банка.

Наградата од BEAM Festival уште еднаш ги потврдува високите стандарди кон кои се придржува Публицис Груп, особено кога е во прашање реализацијата на идеите на своите клиенти. Но, исто така претставува мотивација за енергичниот и креативен тим на Агенцијата да продолжи да ги тестира своите можности и да ја поместува границата на она што го дефинираме како успех.

ПР објава