Цените на суровата нафта бележат раст и успеаја да го пробијат мааното ниво на отпор од 95 долари за барел, што сигнализира засилен позитивен тренд и силен притисок од купувачите на пазарот.

Според анализата, движењето на цената следи стрмна краткорочна нагорна линија, што укажува на стабилност и континуитет на растечкиот тренд. Овој развој се смета за потврда дека пазарот останува под контрола на купувачите.

Дополнителна поддршка за растот дава и фактот што цената се одржува над 50-дневниот експоненцијален подвижен просек (EMA50), кој делува како динамично ниво на поддршка.

Техничките индикатори исто така сигнализираат позитивни изгледи, откако се повлекоа од зоната на прекупеност, оставајќи простор за натамошно зголемување на цената на нафтата во краток рок.

Еврото бележи пад на европските пазари и четврти ден по ред губи вредност во однос на американскиот долар, под притисок на зголемените геополитички тензии меѓу САД и Иран и растот на цените на нафтата.

Најновите податоци покажуваат дека европската валута ослабна за 0,1 отсто и се спушти на 1,1672 долари, приближувајќи се до најниското ниво во последните две недели. Во текот на неделата, еврото загуби околу 0,8 проценти во однос на доларот, што укажува на прв неделен пад по еден месец.

Паралелно, американската валута продолжува да зајакнува, при што доларскиот индекс порасна за повеќе од 0,1 процент и бележи раст четврти ден по ред. Инвеститорите сè повеќе се ориентираат кон доларот како побезбедна инвестиција во услови на неизвесност на глобалните пазари.

Причината за ваквите движења е ескалацијата на тензиите во Ормускиот теснец, каде САД и Иран разменуваат контрола врз бродови и танкери, што предизвикува страв од прекини во снабдувањето со енергенси. Затворањето на овој клучен транспортен коридор создава ризик од сериозен шок за глобалната економија.

Во меѓувреме, цените на нафтата продолжуваат да растат и се зголемија за повеќе од 0,5 проценти, достигнувајќи највисоки нивоа во последните две недели. Ова дополнително ги зголемува инфлаторните притисоци во Европа.

Растот на инфлацијата ја зголемува веројатноста за ново зголемување на каматните стапки од страна на Европска централна банка. Според пазарните проценки, шансите за зголемување на каматите за 25 базични поени се искачија од 20 на 30 проценти.

Претседателката на банката, Кристин Лагард, изјави дека институцијата е подготвена да ги зголеми каматните стапки дури и ако растот на инфлацијата биде привремен.

Геополитичката неизвесност дополнително се засилува со изјавите на Доналд Трамп, кој порача дека САД не брзаат со договор со Иран, но не ја исклучи можноста за воена интервенција. Од иранска страна, претседателот Масуд Пезешкијан ги оцени американските закани и блокади како главна пречка за напредок во преговорите.

Аналитичарите предупредуваат дека ризиците за глобалната економија се потценети и дека инфлаторните притисоци може да продолжат до крајот на годината, особено ако дојде до подолготрајни прекини во снабдувањето со енергенси.

Европската унија се соочува со сериозни економски предизвици, а лидерите мора јасно да ги дефинираат приоритетите и да го стават економскиот раст во центарот на својата политика, предупредуваат аналитичарите.

Според проценките, ЕУ се наоѓа под притисок од повеќе кризи истовремено, од безбедносни ризици и геополитички тензии до забавен економски раст и структурни слабости. Од состаноците во институциите како Европски совет и Европска комисија произлегува дека капацитетите на Унијата се ограничени, а бројот на предизвици расте.

Еден од клучните приоритети останува справувањето со руската агресија и поддршката за Украина, што се смета за важен чекор кон долгорочна стабилност и можен нов бран на проширување на ЕУ. Во исто време, политичките промени во Унгарија, каде по долг период беше сменет премиерот Виктор Орбан, се оценуваат како фактор што може да ја олесни заедничката европска политика.

Сепак, економијата останува најитниот предизвик. Експертите предупредуваат дека без силна индустриска и технолошка база, Европа не може да обезбеди ниту безбедност ниту стратешка автономија. Анализите подготвени од поранешниот претседател на Европската централна банка Марио Драги и поранешниот италијански премиер Енрико Лета укажуваат на слабостите на единствениот пазар и потребата од длабоки реформи, но нивните препораки засега имаат ограничена примена.

Дополнителен притисок врз економијата создава комбинацијата од низок раст, висок јавен долг и демографски пад. Се очекува работоспособното население во Европа да се намали за околу 12 проценти во следната деценија, што ќе ги оптовари јавните финансии и ќе ги намали ресурсите.

Во такви услови, земјите членки тешко можат истовремено да ги зголемат трошоците за одбрана и да ги одржат социјалните системи. Иако во повеќето држави издвојувањата за одбрана се околу 2 проценти од БДП, актуелните геополитички случувања покажуваат дека Европа мора да инвестира повеќе во сопствената безбедност.

Како можен излез се посочува завршувањето на единствениот европски пазар до 2027 година, што лидерите го најавија на мартовскиот самит. Во сегашната форма, овој пазар поддржува околу 60 милиони работни места и носи економски придобивки од 8 до 9 проценти од БДП на ЕУ. Со дополнителни реформи, растот би можел да се зголеми за уште 1 до 2 проценти во следната деценија.

И покрај предизвиците, аналитичарите оценуваат дека Европа има силни адути, образовен систем, стабилни институции и заедничка валута. Но, предупредуваат дека без итни и суштински реформи, овие предности може да бидат доведени во прашање.

Заклучокот е јасен. Без фокус на економски раст и конкурентност, ЕУ ризикува да се соочи со подлабока економска криза и ограничена способност да одговори на безбедносните и социјалните предизвици во иднина.