Connect with us

Банки

Органскиот раст на активата и успешното раководење на бизнис-линиите резултираше со 9% згоемување на добивката на Стопанска банка АД – Скопје

Објавено

пред 2 години

на

Во првите девет месеци од 2024 година макроекономското окружување покажува позитивни знаци на стабилизација и раст. Сепак, предизвиците од инфлацијата, трговскиот биланс и структурата на пазарот на труд остануваат важни области кои треба да се следат со внимание. Долгорочните стратегии за економски развој, како и структурните реформи ќе бидат клучни за одржлив раст во иднина. Економските активности во анализираниот период се одвиваа во услови на раст на бруто-домашниот производ од 2,3% во вториот квартал и стапка на инфлација која во септември изнесуваше 2,6%, при што се забележаа намалувања на извозните активности на ниво на државата, кои имаа свој одраз врз активностите на компаниите во банкарскиот сектор.

Каматните стапки сè уште се одржуваат на релативно повисоко ниво, без промени на условите на домашната сцена, додека во еврозоната беше забележано трикратно намалување на референтната каматна стапка, во очекување дека трендот ќе продолжи и понатаму. Ова е прво последователно намалување на стапката во последната деценија, што укажува на промена на фокусот на ЕЦБ од намалување на инфлацијата кон заштита на економскиот раст. Во првата половина на годината се реализираа и редовните парламентарни и претседателски избори, што дополнително доведе до забавување на инвестициите и одложување на крупни проекти. Геополитичката состојба е непроменета, со сè уште присутните воени конфликти на Русија и Украина, Израел и Палестина, кои имаат свој одраз врз финансиските и политичките текови.

И покрај изразените предизвици и неизвесности, во трите квартали од 2024 година Стопанска банка АД Скопје продолжи со остварување на солидни резултати и висока профитабилност, капитализирајќи ги развојните можности втемелени врз здравата основа на Банката, видно од сите клучни индикатори.

Добивката пред оданочување и исправка на вредност изнесува 4.021.514 илјади денари, што е 9% повеќе споредено со истиот период од претходната година. Во согласност со стратегијата на Групацијата и Банката како нејзин дел за одржување висок квалитет на активата и ниска стапка на нефункционални побарувања, Банката издвои исправка на вредност на финансиските средства и посебна резерва за вонбилансна изложеност, на нето-основа, во износ од 922.253 илјади денари, што е за 2% помалку споредено со минатата година, која покрај исправката за нефункционалните побарувања, вклучува и дел за покривање на ризиците и на редовното портфолио, како превентива од неочекувани движења.

Со тоа, добивката на Банката пред оданочување на 30.09.2024 година изнесува 3.099.261 илјади денари. Наведениот резултат е последица како на органскиот раст на активата така и на успешното раководење на бизнис-линиите во рамките на утврдената рамка на прифатлив апетит за ризик.

Во натамошниот текст ќе бидат претставени одделните позиции од билансот на успех и од билансот на состојба на Банката.

Биланс на успех

Нето-приходите од камати изнесуваат 4.644.564 илјади денари и се зголемени за 11% во однос на истиот период од минатата година, резултат во кој најголемо учество имаат каматните приходи од кредитни активности и каматните приходи од позициите за ликвидност (меѓубанкарски пласмани, депозити и вложувања во хартии од вредност), кои забележаа пораст како резултат на зголемената ликвидност на Банката која произлегува од депозитите.

Нето-приходите од провизии и надоместоци изнесуваат 644.601 илјади денари и се приближно на исто ниво во однос на истиот период од минатата година.

Нето-приходите од курсни разлики изнесуваат 117.084 илјади денари и се зголемени за 5% споредено со истиот период од минатата година.

Останатите приходи од дејноста изнесуваат 342.789 илјади денари.

И покрај сè уште присутните инфлаторни притисоци и ценовни флуктуации, Банката продолжува со оперативна ефикасност во однос на контролата на трошоците од работењето. Притоа, останатите расходи од дејноста и трошоците за вработени изнесуваат 775.069 илјади денари и 863.316 илјади денари, респективно и се нешто повисоки во однос на истиот период од претходната година.

Одржувањето на квалитетот на кредитното портфолио и управување со кредитниот ризик е една од приоритетните цели на Банката. Оттука, заклучно со крајот на третиот квартал од 2024 година, Банката издвои исправка на вредност на финансиските средства и посебна резерва за вонбилансна изложеност, на нето-основа, во износ од 922.253 илјади денари.

Како резултат на сето наведено, остварената добивка пред оданочување и исправка на вредност изнесува 4.021.514 илјади денари, додека добивката пред оданочување на 30.09.2024 година изнесува 3.099.261 илјади денари и е за 13% повисока во однос на истиот период минатата година.

Биланс на состојба

Вкупната актива на Банката во анализираниот период изнесува 136.059.970 илјади денари, односно е повисока во однос со крајот на годината за 4% или 4.697.045 илјади денари.

Паричните средства и парични еквиваленти споредени со крајот на 2023 година се пониски за 1.981.569 илјади денари, како резултат на пренасочување на овие средства во вложувања во хартии од вредност.

Кредитите на и побарувања од други комитенти нето изнесуваат 94.427.049 илјади денари и се поголеми за 2%, односно за 2.119.965 илјади денари во однос на 31.12.2023 г.

Кредитите на и побарувањата од банки изнесуваат 377.053 илјади денари и бележат зголемување за 15% споредено со крајот на минатата година.

Вложувањата во хартии од вредност изнесуваат 15.345.585 илјади денари и забележаа зголемување од 35% споредено со крајот на минатата година, како што беше споменато, поради поголемиот пораст на депозитни од кредитни активности, пред сè во делот на депозити на населението.

Останатите побарувања изнесуваат 1.911.063 илјади денари, што претставува зголемување од 39% во однос на крајот на 2023 година.

Вкупните депозити на други комитенти изнесуваат 101.996.965 илјади денари.

Капиталот и резервите изнесуваат 28.503.587 илјади денари, што претставува зголемување за 11% во однос на крајот на 2023 година. Дополнително, Банката пренамени износ од 2.460.000 илјади денари од задржаната добивка од претходни години во добивка ограничена за распределба на акционерите во иднина, со што се зголемија сопствените средства и стапката на адекватност на капиталот, која изнесува приближно 19%. Во согласност со Одлуката за распределба на добивката за 2023 година, донесена од Собранието на акционери на 31.05.2024 година, добивката од претходната година се распредели во задржаната добивка расположлива за распределба во иднина во износ од 2.569.600 илјади денари и задржана добивка за инвестиции во износ од 900.000 илјади денари. И понатаму Банката е посветена да остварува добивка која ќе биде генератор на капиталот, кој се очекува и натаму да се зголемува покрај порастот на активностите и како резултат на регулаторните барања поставени од страна на централната банка.

Вложувања или продажба на материјални средства (недвижности, постојки и опрема) или значителен отпис (поголем од 30% од вредноста на средството споредено со последните годишни ревидирани финансиски извештаи)

Недвижностите и опремата изнесуваат 953.984 илјади денари и бележат зголемување за 3% споредено со крајот на минатата година.

Обврските по кредити изнесуваат 2.589.601 илјади денари и во однос на крајот на 2023 година се намалени за 5%.

Очекувања за претстојниот период

Очекувањата за економската активност во претстојниот период се во значителна мера обележани од политичката стабилност, глобалните економски трендови и домашните реформски напори. Економските фундаменти се движат во позитивна насока, со намалување на инфлацијата, невработеноста, зголемување на стапката на раст на бруто-домашниот производ, кои ветуваат позитивен амбиент за економските субјекти. Во иста насока е и проекцијата на Меѓународниот монетарен фонд, кој предвидува закрепнување на домашната економија и зајакнување на растот во 2024 година, поттикнат од планираните јавни инвестиции, особено од започнувањето на изградбата на автопатските делници од коридорите 8 и 10-д, како и постепено намалување на инфлацијата. Девизните резерви се одржуваат на солидно ниво, со обезбедување на 4-6 месеци покриеност на увозот. Банкарскиот сектор е ликвиден, добро капитализиран, профитабилен, при што нефункционалните кредити се стабилни и се на историски ниско ниво.

Во следниот период се очекува продолжување на деловните активности во согласност со дефинираниот деловен план на Банката со целосна ориентираност кон поддршка на клиентите, прудентно управување со ризиците и одржување висока стабилност, сигурност и ефикасност во сите сегменти од нејзиното работење. Исто така, Банката продолжува со реализација на започнатите проекти, пред сè во делот на дигитализацијата и трансформацијата за подобра услуга кон клиентите, поефикасно интерно работење и оптимизација на процесите, понуда на нови услуги и зајакнување на конкурентската позиција на пазарот. Секако, фокусот останува на редовното и ефикасно извршување на основните деловни активности, одржување на лидерското пазарно учество од околу 27% во сегментот на кредитирање на населението, со фокус за натамошно зголемување на пазарното учество во делот на кредитирање на компаниите.

Оваа година Стопанска банка прославува 80 години од основањето и следствено целиот натамошен период ќе биде исполнет со многубројни новитети и изненадувања на задоволство на нашите клиенти и соработници, но и на пошироката заедница.

Стопанска банка е позната по поддршката што ја дава низ многу проекти и настани во општеството, здравството, социјалната и животната средина, кои не само што ќе продолжат туку и ќе се интензивираат за подобрување на животната средина, инклузијата и создавањето подобар свет за сите.

Слични Теми:

Банки

Големо признание за НЛБ: Избрана меѓу 36 институции кои ќе го тестираат дигиталното евро

Објавено

пред 7 часа

на

Нова Љубљанска банка (НЛБ Групацијата) е избрана меѓу 36 банки и финтек компании кои ќе учествуваат во пилот-проектот на Европската централна банка (ЕЦБ) за тестирање на дигиталното евро.

Пилот-фазата треба да започне во втората половина на 2027 година и ќе трае 12 месеци. Во тој период ќе се тестираат техничките функционалности на дигиталното евро, неговата примена во секојдневните плаќања и корисничкото искуство пред евентуалното официјално воведување на новата европска дигитална валута.

Покрај НЛБ, во проектот учествуваат и големи европски банки, меѓу кои UniCredit, Deutsche Bank, Raiffeisen Bank и Piraeus Bank, како и водечки финтек компании како Revolut, Stripe, Nexi Payments, Satispay и хрватскиот CorvusPay.

Од Европската централна банка соопштија дека за повикот за учество биле доставени повеќе од 50 апликации, што, според институцијата, ја потврдува силната заинтересираност на приватниот сектор за развојот на европскиот систем за дигитални плаќања.

Членот на Извршниот одбор на ЕЦБ и претседател на работната група за дигиталното евро, Пјеро Чиполоне, изјави дека големиот интерес од пазарот ја потврдува подготвеноста на приватниот сектор активно да придонесе во развојот на проектот и во зајакнувањето на европскиот платен систем.

За време на тестирањето ќе се користи бета-верзија на дигиталното евро, а во проектот ќе бидат вклучени вработени во ЕЦБ, националните централни банки од еврозоната и избрани трговци. Корисниците ќе можат да тестираат различни видови трансакции, вклучувајќи плаќања во продавници, онлајн купувања и трансфери од лице до лице.

Продолжи со читање

Банки

НЛБ Банка и Прагма продукција ја најавуваат големата летна концертна сезона 2026

Објавено

пред 9 часа

на

НЛБ Банка и Прагма продукција, на прес-конференција во НЛБ Галерија, ја најавија соработката за претстојната летна концертна сезона, која ќе донесе серија атрактивни музички настани за различни генерации публика. Партнерството опфаќа осум концерти на регионални и домашни музички ѕвезди во текот на летото, меѓу кои настапите на: Дупер, Слаткаристика & Friends, Два Бона, Rita Ora, Senidah, Петар Грашо, Саша Ковачевиќ, Црвена Јабука и Нина Бадриќ. Со ова партнерство, НЛБ Банка ја продолжува својата заложба за поддршка на културата, музиката и настаните што создаваат вредни искуства за заедницата, со посебен фокус на младата популација и на корисниците на NLB Next пакетот за млади. 

На прес-конференцијата како специјални гости присуствуваа Дупер и Слаткаристика, две големи домашни музички имиња, чии концерти се дел од програмата наменета за младата публика. По официјалниот дел беше организирано дружење на артистите со младите посетители, кои си заминаа со бесплатниот NLB Next пакет за млади и влезници за концертите.

Концертна сезона за различни генерации публика

Летната концертна сезона е осмислена како музичка програма што ги поврзува различните генерации публика, од младите кои живеат динамично, дигитално и во чекор со своите интереси, до клиентите кои уживаат во музика блиска до нивниот вкус, навики и очекувања. Дел од концертите се наменети за NLB Next генерацијата, за која музиката, дружењата, патувањата и новите искуства се природен дел од секојдневието, додека другите настани носат содржина за останатите клиенти на Банката и пошироката публика.

На овој начин, партнерството меѓу НЛБ Банка и Прагма продукција создава платформа што ги обединува младешката енергија и музичките вкусови на повеќе генерации. За младите, NLB Next се надоврзува на нивниот животен стил, современ, мобилен и исполнет со избори, додека за останатите генерации е подготвена внимателно избрана музичка содржина, која носи квалитетно концертно искуство и дополнителна вредност.

Со ваквиот пристап, НЛБ Банка го зајакнува присуството во сегментот на младите, но истовремено ја потврдува посветеноста кон сите останати, нудејќи им музички доживувања што се блиски до нивните интереси и начинот на кој сакаат да го поминат летото.

„Со NLB Next сакаме да бидеме онаму каде што се младите, во нивниот ритам, нивните интереси и нивните искуства. Музиката е еден од најсилните начини за поврзување со младата генерација, а ова партнерство ни овозможува да им понудиме повеќе од банкарство, можност за нови доживувања, забава и привилегии што се дел од нивното секојдневие. NLB Next е креиран како современо, дигитално и бесплатно банкарско решение за млади од 18 до 25 години, но и како платформа која ги следи нивните NEXT чекори, од прва сметка и прва плата, до први големи музички искуства“. – изјави Ивона Галиќ Петков, Самостоен советник за односи со јавност во НЛБ Банка.

„Летната концертна сезона 2026 ја подготвуваме како програма што ќе понуди разновидни музички доживувања, од големи регионални до домашни артисти кои имаат силна врска со младата публика. Со НЛБ Банка како партнер, оваа сезона добива дополнителна вредност бидејќи преку музиката се поврзуваме со различни генерации публика и создаваме искуства што се паметат. Веруваме дека заедно ќе реализираме лето исполнето со квалитетна музика, добра енергија и концерти блиски до вкусот на секој посетител“. – изјави Кристијан Стефановски од Прагма продукција.

Како артисти кои имаат силна врска со младата публика и чија музика е дел од нивното секојдневие, Дупер и Слаткаристика ги најавија своите настапи како дел од концертната програма за младите. Дупер е еден од најпрепознатливите современи македонски бендови, познат по свеж звук, позитивна енергија и песни што лесно се поврзуваат со младата генерација. Слаткаристика, пак, е едно од највлијателните имиња на домашната хип-хоп сцена, артист со препознатлив стил, силна концертна енергија и публика која го следи со години.

„Многу сме задоволни од соработката и целата организација, ова е една од ретките можности млади музичари од Македонија да соработуваат со идоли од нивната генерацијa. Соработуваме со Слаткар кој што сме го гледале на телевизија, ќе му бидеме гости и на концертот. За добра соработка треба да има и добра дружба, а ние тоа го имаме. Мислам дека ова ќе биде навистина успешна соработка“. – изјавија од Дупер.

„Ова ми се блиски луѓе, имаме многу убав однос и иста естетика. Мислам дека ова е старт на дружба што ќе трае со години. Нема многу да ви споделувам, ве чекам сите на концертот на 2 август“. – порача Марко Маринковиќ – Слаткар.

НЛБ Банка и Прагма продукција најавуваат динамично концертно лето со богата програма, силна музичка енергија и содржини што ги поврзуваат младите, но и сите останати љубители на добрата музика.

Продолжи со читање

Банки

Комерцијална банка со активности за поголема финансиска писменост кај младите

Објавено

пред 9 часа

на

Комерцијална банка АД Скопје, преку платформата Zipp.club и иницијативата „Финансиска училница“, го одбележа Светскиот ден на вештините на младите.

Од банката истакнуваат дека финансиските знаења и вештини се важни за носење правилни одлуки, поголема самостојност и сигурно градење на иднината.

Преку едукативните активности, младите добиваат практични знаења што можат веднаш да ги применат, како и насоки за постепено постигнување финансиска независност.

„Добрите финансиски одлуки започнуваат со повеќе знаење“, порачуваат од Комерцијална банка.

Продолжи со читање

Популарно

Copyright © 2023 bankarstvo.mk. All Rights Reserved. Developed by Digital Orange