Месечниот статистички билтен на Македонска берза за мај покажува намалена трговска активност и благо повлекување на инвеститорите во однос на април. Пазарната капитализација на котираните друштва изнесуваше 347,6 милијарди денари и забележа месечен пад од 1,47%, додека берзанскиот индекс МБИ10 се намали за 1,76% и месецот го заврши на ниво од 9.766,03 поени.

Вкупниот промет достигна 308,1 милиони денари, што претставува намалување од високи 17,70% на месечно ниво. Пад е забележан и кај бројот на реализирани трансакции, кои изнесуваа 1.307 или 15,51% помалку во споредба со претходниот месец. Особено се издвојува намалувањето на прометот во класичното тргување, кој се намали за 20,11% и изнесуваше 282,1 милиони денари.

Од друга страна, блок-трансакциите забележаа исклучително силен раст од 221,43%, достигнувајќи вредност од речиси 26 милиони денари, што укажува на зголемена активност кај поголемите инвеститори.

Според бројот на трансакции, најтргувана акција во мај беше акцијата на Комерцијална банка со 526 трансакции, пред Македонски Телеком со 188 и Алкалоид со 156 трансакции. Според количината на истргувани акции, апсолутен лидер беше Македонски Телеком со 85.922 акции, пред Комерцијална банка и Гранит.

Најголем раст на вредноста на акцијата во текот на месецот оствари ОКТА АД Скопје со импресивни 22%, додека меѓу добитниците се најдоа и Попова Кула Демир Капија и ТИТАН УСЈЕ. Од друга страна, најголем пад забележа на вредноста на акцијата забележа Макошпед АД Скопје со намалување од високи 25,32%, пред ВВ Тиквеш Кавадарци (-14,45%) и Стопанска банка АД Скопје (-8,71).

Податоците упатуваат на период на умерена корекција на домашниот пазар на капитал, со намалена ликвидност во редовното тргување, но и со зголемен интерес за поголеми блок-позиции, што претставува важен сигнал за движењата на инвеститорското расположение на Македонска берза.

Цените на нафтата продолжија да растат и во средата, поттикнати од обновените тензии на Блискиот Исток и неизвесноста околу преговорите меѓу САД и Иран.

Референтната сурова нафта „Брент“ поскапе за 1,6% и достигна 97,56 долари за барел, додека американската „WTI“ се искачи на 95,37 долари за барел, што претставува раст од 1,7%. Со ова, двата референтни типа на нафта се задржуваат близу еднонеделните максимуми.

Пазарите остануваат чувствителни поради застојот во дипломатските разговори меѓу Вашингтон и Техеран, како и поради новите воени активности во регионот. Дополнителен притисок врз цените создаваат и предупредувањата за намалени глобални резерви на нафта во пресрет на периодот на зголемена летна побарувачка.

Аналитичарите оценуваат дека геополитичкиот ризик останува главен двигател на цените, особено поради неизвесноста околу безбедноста и проодноста на Ормутскиот теснец, една од најважните светски транспортни рути за нафта.

Поддршка на растот на цените даваат и податоците од САД, кои покажуваат седма последователна недела на намалување на залихите на сурова нафта.

Доколку тензиите продолжат и не се постигне напредок во дипломатските напори, пазарните учесници предупредуваат дека цената на Брент би можела повторно да се приближи или дури да ја надмине психолошката граница од 100 долари за барел.

Цените на нафтата на светските берзи остануваат на високи нивоа, додека инвеститорите внимателно ги следат геополитичките тензии и нивното влијание врз глобалната енергетска понуда.

Суровата нафта „Брент“ се тргува околу 95 долари за барел, додека американската сурова нафта „WTI“ се движи околу 92 долари за барел.

Аналитичарите посочуваат дека пазарот е сè почувствителен на развојот на настаните на Блискиот Исток, како и на потенцијалните нарушувања во синџирите на снабдување со енергенси. Овие фактори директно влијаат врз очекувањата за глобалната понуда и стабилноста на пазарот.

Покачените цени на нафтата веќе создаваат притисок врз трошоците за транспорт, логистика и производство, што може да се пренесе и на повисоки цени за крајните потрошувачи и зголемен инфлаторен притисок.

Иако тековните нивоа се под историските рекорди од претходните енергетски кризи, аналитичарите предупредуваат дека нивото од околу 95 долари за барел претставува значаен праг кој може да влијае врз глобалните економски очекувања, особено доколку суровата нафта „Брент“ се доближи до границата од 100 долари.

Во наредниот период, фокусот на пазарите останува на геополитичките случувања, одлуките на големите производители на нафта и глобалната побарувачка, кои ќе го одредат понатамошниот тренд на цените.