Народната банка работи на воведување инстант-плаќања преку национална платформа, која ќе овозможи трансферите на пари да се извршуваат за само неколку секунди, 24 часа дневно и 365 дена во годината.

Гувернерот на Народната банка, Трајко Славески, во гостување во централниот дневник на „Македонската телевизија“ истакна дека развојот на платните системи е еден од приоритетите на централната банка. Новата национална платформа претставува клон на европскиот систем ТИПС и треба да донесе значително побрзи и поевтини трансфери.

„ТИПС-клонот е систем на инстант-плаќања каде што плаќањата ќе се извршуваат за неколку секунди, со релативно ниска цена и тоа 24 часа“, посочи Славески.

За разлика од сегашните ситуации кога трансфер направен по завршувањето на работното време може да биде реализиран наредниот ден или средствата да пристигнат по ден-два, со новиот систем парите ќе стигнуваат на сметката практично во истиот момент.

Во првата фаза инстант-плаќањата ќе бидат достапни преку постојните канали за мобилно и електронско банкарство. На тој начин, граѓаните и компаниите ќе можат да префрлаат средства независно од работното време на банките и од денот во неделата.

Понатамошниот развој на системот треба да отвори можност и за плаќање на продажни места, користење QR-кодови, како и трансфери само со внесување мобилен телефонски број или електронска адреса. Според Славески, целта е да се намалат дополнителните посредувања што ги зголемуваат трошоците.

Иницијативата има и европска димензија, бидејќи Северна Македонија е меѓу земјите од Западен Балкан на кои им е понудена можност уште пред членството во Европската Унија да се приклучат кон системот за инстант-плаќања на Европската централна банка.

Гувернерот се осврна и на приклучувањето на земјата кон Единствената област за плаќање во евра (СЕПА), реализирано на 7 октомври минатата година. Според него, во моментов околу 60 проценти од вкупните прекугранични плаќања во евра се извршуваат преку СЕПА, што придонело за значително намалување на провизиите за трансфер на средства за граѓаните и компаниите.

Halkbank АД Скопје ги промовира поволностите на Halk Premium пакетот, наменет за приматели на плата, кој за месечен надомест од 300 денари обединува повеќе банкарски и дополнителни услуги.

Пакетот вклучува Mastercard World дебитна картичка, влез во деловни салони и Fast Track услуги на аеродроми, асистенција на пат во Европа и патничко осигурување со покритие од 10 дена.

Меѓу поволностите е и повлекување готовина без провизија од сите банкомати во земјата, како и користење електронско и мобилно банкарство 24/7 и СМС известување.

Корисниците на пакетот добиваат и ORYX Home Assistance, услуга која обезбедува 24-часовна асистенција во домот.

Halk Premium е достапен за 300 денари месечно, а повеќе информации за условите и услугите во пакетот се достапни на веб-страницата на Halkbank.

АЛТА БАНКА АД Белград дополнително ја зацврсти својата сопственичка позиција во АЛТА банка АД Битола, откако се стекна со уште 56 обични акции од македонската банка.

По последната трансакција, белградската банка располага со вкупно 372.408 обични акции, односно со 95,2506 отсто од вкупниот број издадени обични акции на АЛТА банка АД Битола.

Информацијата е објавена во известување за промена кај акционер со значителен удел, согласно Правилата за котација на Македонската берза.

Известувањето е објавено врз основа на член 38 став 2 од Правилата за котација на Македонска берза АД Скопје.