„Народната банка спроведува сеопфатен и комплементарен сет на мерки насочени кон одржување на ценовната стабилност и стабилноста на девизниот курс“, истакна вицегувернерката Ана Митреска на гостувањето во поткастот „Финсајт“ со Наташа Мерсовска на порталот „Банкарство.мк“.

Таа нагласи дека монетарната политика и натаму се води претпазливо, при што главните инструменти ќе придонесат за постепено стабилизирање на инфлацијата.

„Монетарната политика и натаму е во зоната на претпазливост. Каматната стапка е на непроменето ниво, а истовремено се применуваат и дополнителни мерки – заострување на задолжителната резерва, повлекување ликвидност од банкарскиот систем, зголемени капитални барања за банките и построги кредитни стандарди. Овој пристап овозможува координирано делување врз инфлациските притисоци и кредитната активност“, посочи Митреска.

Во однос на инфлацијата, таа истакна дека централната банка внимателно ги следи движењата на цените и очекувањата на пазарите.

„Согласно тековните пазарни очекувања, по растот на цените на енергентите и храната во првата половина од годината, се очекува нивно постепено стабилизирање во втората половина, што би придонесло за намалувањето на притисоците врз цените“, нагласи Митреска.

Таа додаде дека Народната банка е подготвена за дополнителни интервенции доколку се зголемат ризиците.

„Доколку се појават знаци на подолготрајни инфлациски притисоци, Народната банка е подготвена да реагира со дополнително затегнување на монетарната политика, користејќи ги каматните стапки и другите расположливи инструменти“, истакна Митреска.

Стопанска банка Скопје во првите три месеци од годинава остварила нето-добивка од 679,5 милиони денари (околу 12,9 милиони долари), што претставува пад од 18% во споредба со истиот период лани.

Податоците покажуваат намалување на профитабилноста на банката на почетокот на 2026 година, во услови на променливи економски околности и динамики во банкарскиот сектор.

И покрај падот, банката останува меѓу значајните финансиски институции на домашниот пазар.

Комерцијална банка АД Скопје во периодот од 1 јануари до 31 март 2026 година оствари позитивен финансиски резултат од 1,46 милијарди денари, што претставува раст од 2,8% во однос на истиот период минатата година, кога добивката изнесуваше 1,42 милијарди денари. Воедно, планираната бруто-добивка за првиот квартал е реализирана со 115,4%.

Резултатите се остварени во услови на зголемена неизвесност во глобалното економско окружување, поврзана со геополитичките тензии на Блискиот Исток и растот на цените на енергенсите, што создава дополнителни ризици за инфлацијата и економските изгледи.

Приходи и оперативно работење

Вкупните приходи од работењето достигнаа 2,15 милијарди денари, што претставува раст од 6,4% на годишно ниво. Добивката пред исправка на вредност, како индикатор за оперативната ефикасност на Банката, е зголемена за 7,5% во однос на истиот период минатата година.

Нето-приходите од камати, кои претставуваат клучна компонента на приходите, бележат раст од 2,1%, при што зголемување е забележано кај приходите од државниот сектор поради поголемите вложувања во државни хартии од вредност, како и кај кредитирањето на домаќинствата и компаниите. Во исто време, расходите по основ на камата се зголемени за 10,8%, главно поради растот на орочените депозити. Нето каматната маржа е намалена од 3,65% на 3,45%.

Нето-приходите од провизии и надоместоци изнесуваат 384,8 милиони денари, што претставува раст од 14,9%, како резултат на зголемениот обем на активности со клиентите. Приходите од курсни разлики достигнаа 97,5 милиони денари, што е намалување од 13,9% на годишно ниво.

Останатите приходи од работењето изнесуваат 158,9 милиони денари, со значително зголемување од 82,1%, главно поради капитални добивки од продажба на преземен имот по основ на ненаплатени побарувања.

Оперативните расходи достигнаа 573,1 милион денари, што претставува умерено зголемување од 3,6%, главно поради повисоки трошоци за вработени и амортизација.

Во првиот квартал од 2026 година, Банката издвои 125,9 милиони денари за исправка на вредност на финансиските средства, што е значително повеќе во однос на истиот период минатата година, како резултат на промена на ризичната категорија кај одредени корпоративни клиенти.

Биланс на состојба

Вкупната актива на Банката на 31 март 2026 година достигна 197,4 милијарди денари, што претставува зголемување од 2,5% во однос на крајот на 2025 година.

Паричните средства и паричните еквиваленти се зголемени за 8,2%, додека вложувањата во хартии од вредност бележат раст од 6,1%, главно поради поголеми вложувања во државни обврзници.

Кредитите кон клиенти се зголемени за 0,5%, пред сè поради растот на кредитирањето на домаќинствата.

Вкупните депозити достигнаа 167,6 милијарди денари, што претставува раст од 1,7% во однос на крајот на минатата година, главно како резултат на повисоките депозити на нефинансиските компании и нерезидентите.

Обврските по кредити изнесуваат 3,44 милијарди денари, со благо зголемување од 1,1%, при што во текот на периодот се повлечени средства од кредитни линии наменети за поддршка на компаниите и за зелени инвестиции.

Капитал и дивиденда

Акционерскиот капитал и резервите на Банката изнесуваат 21,48 милијарди денари. Согласно одлуката на Собранието на акционери, дел од добивката од 2025 година е распределен во резервен фонд и задржана добивка за инвестициски вложувања, додека 3,08 милијарди денари ќе бидат исплатени како дивиденда на акционерите во мај 2026 година.