Според информациите од Сојузот на синдикати на Македонија, вредноста на синдикалната минимална кошница за април 2025 година изнесува 62.691 денари, што претставува пораст од 836 денари во однос на март.

Најголем дел од буџетот, односно 21.480 денари (34,3%), се однесува на трошоците за храна и пијалоци. За облека и обувки се издвоени 5.634 денари (9,0%), додека за станарина, вода, електрична енергија и греење се наменети 6.096 денари (9,7%). За лична хигиена и хигиена во домот се трошат 2.455 денари (3,9%).

Во априлската синдикална минимална кошница за здравје се превидени 1.136 денари (1,8%), за транспорт 4.615 денари (7,4%), за комуникации 3.417 денари (5,5%), за рекреација и култура 5.592 денари (8,9%), за образование 7.036 денари (11,2%), за ресторани и хотели 4.131 денари (6,6%) и за останати стоки и услуги 1.100 денари (1,8%).

Од ССМ потенцираат дека мерките за ограничување на маржите на трговците имаат делумен ефект, бидејќи намалувањето на цените на основните прехранбени производи е само 6,78 проценти.

Оттаму бараат зголемување на минималната плата на најмалку 500 евра и дополнително зголемување на сите останати плати за најмалку 100 евра. „Евидентно од вредноста на Синдикалната минимална кошница е дека мерките се потребни и истите задолжително мора да траат подолг временски период, но поради нефер трговските практики на дел од трговците, последната мерка на Владата за ограничување на маржите за најмалку 10 отсто даде половичен ефект. Измерено преку оние 63 основни прехранбени производи кои се дел од Синдикалната минимална кошница, евидентирано е намалување на делот од храната и пијалоците само за 6,78 проценти во месец март, но граѓаните и работниците оправдано реагираат дека тоа не е доволно, односно нема видлив ефект и дека цените се или исти или се зголемени“, стои во соопштението од ССМ.

Тие додаваат дека со оглед на тоа што 2,5 минимални плати не ја покриваат вредноста на Синдикалната минимална кошница, реално и оправдано е барањето за зголемување на минималната плата на најмалку 500 евра, како и дополнително зголемување на сите останати плати за најмалку 100 евра. „Се прашуваме, дали ако целта на Синдикалната минимална кошница е да ја покаже реалната состојба и да изврши притисок за потребата од зголемување на платите на работниците, дали целта на Владината просечна кошница е да покаже дека не треба да има зголемување на платите и дека македонскиот работник и со вака ниските плати живее добро?“, дополнуваат од ССМ.

Сојузот на синдикатите на Македонија ја пресметува Синдикалната минимална кошница од 2011 година, со цел да укаже на креаторите на политиките дека платите се ниски и потребно е континуирано да се зголемуваат.

Компанијата Circle, позната како креатор на стабилната криптовалута USDC (чија вредност е поврзана со американскиот долар), најави голем чекор напред во светот на дигиталните финансии со лансирање на глобална мрежа за исплати и меѓународни трансакции, со голем потенцијал и амбиција да стане сериозен конкурент на гигантите како Visa и Mastercard.

Официјалното лансирање на мрежата е закажано за 22 април во Њујорк, во седиштето на компанијата. Главниот извршен директор на Circle, Џереми Алер, ќе ја изложи стратегијата зад новиот систем за плаќања, базиран на стабилни криптовалути, пред сè USDC.

Според извештајот на CoinDesk, пазарот на стабилни криптовалути бележи значителен раст, поттикнат и од промените во американската регулатива по изборот на Доналд Трамп. Новите прописи од Белата куќа отвораат простор за развој на легитимни дигитални токени, поддржани со реална вредност, чекор кој ги охрабрува и инвеститорите и развивачите.

Во моментов, Circle и Tether се водечки издавачи на стабилни криптовалути, со пазарна вредност од 60 милијарди долари за USDC и 144 милијарди долари за USDT. Иако првично фокусирана на биткоин-плаќања, Circle сега го враќа фокусот кон инфраструктура за финансиски институции како банки, финтек компании и провајдери за трансфер на пари.

Според достапните информации, новата мрежа најпрво ќе се користи за меѓународни трансфери, но долгорочната цел е целосна интеграција како платежна мрежа од нова генерација.

Од друга страна, Европската унија изрази загриженост за зголеменото влијание на стабилните криптовалути врзани за доларот. Регулаторите предупредуваат дека ова може да доведе до одлив на средства од традиционалниот банкарски систем, што би имало значајни последици по монетарната стабилност на еврозоната.

Со ова, Circle не само што ја менува сликата на глобалните плаќања, туку и повторно ја отвора дебатата за иднината на дигиталните финансии, регулативата и конкуренцијата меѓу традиционалните и новите финансиски системи.

Финтек апликацијата Mint App продолжува да се развива и да ги следи современите трендови во управувањето со личните финансии. Со најновата верзија 1.3.0, корисниците добиваат пристап до три нови алатки кои овозможуваат уште подобра контрола, транспарентност и мотивација во секој финансиски чекор.

Во оваа верзија добивате:

• Преглед на крипто берзата – следете вредности и трендови во реално време (Следете ги движењата на најпопуларните криптовалути, добијте увид во пазарните трендови и донесувајте информирани одлуки базирани на точни и тековни податоци.);
• Калкулатор за приватно здравствено осигурување (индивидуално и семејно) – Едноставно споредете трошоци и бенефити за индивидуално и семејно осигурување. Оваа нова функционалност помага корисниците полесно да изберат најсоодветна полиса според нивните потреби и буџет;
• Специјален велигденски Mint Egg – oд денес до понеделник, корисниците имаат можност да отворат специјално велигденско јајце во апликацијата, кое крие изненадувања во форма на бонуси, награди и ексклузивни понуди!

Mint App расте со вас – за да имате повеќе контрола, јасност и мотивација во секој финансиски чекор.

Со секое ново ажурирање, Mint App се стреми да обезбеди практични и иновативни решенија кои ги поедноставуваат личните финансии. Апликацијата е наменета за сите кои сакаат да ги следат своите приходи и трошоци, да планираат буџет, да добиваат персонализирани финансиски совети и да останат чекор пред со своите финансиски цели.

Ажурирајте ја или преземете ја апликацијата на следниот линк: https://mint.com.mk/mintapp