Двесте  и педесет милиони евра од билатералниот заем со Унгарија стануваат оперативни. Владата донесе одлука за нивно ставање на располагање на македонското стопанство, односно компаниите. Ова го соопшти министерката за финансии Гордана Димитриеска-Кочоска, на заедничка прес-конференција со премиерот Хритијан Мицкоски, по усвојуvање на договорите за кредитната линија за финансирање на инвестиции и развој на приватните трговски друштва кои ќе се пласираат преку Развојната банка, а кон крајните корисници преку деловните банки.

„Со денешните одлуки донесени од страна на Владата влегуваме во последната фаза од операционализација на средствата од унгарскиот заем наменети за компаниите. Со потпишување на договорите се отвора патот Развојната банка да ги добие средствата од Буџетот, а понатаму да бидат пренесени во комерцијалните банки, учеснички во оваа програма, и оттаму и до компаниите. Односно со потпишувањето на договорите, ќе започне со операционализација на средствата од кредитната линија за финансирање на инвестициите и развојот на приватните трговски друштва во износ од 250 милиони евра во денарска противвредност преку деловните банки“, рече министерката.

Таа додаде дека условите се повеќе од атрактивни со каматна стапка од 1,95%, рок на отплата до 15 години, грејс периодот до 3 години.

Според министерката ова дава огромна можност за домашните компании да се охрабарат и да влезат во инвестиција.

„Целта беше да креираме можности за реализација на одржливи инвестиции и затоа поддршката е насочена во сите сектори за инвестиции во основни средства, за кои домашните компании треба да учествуваат со 20% сопствени средства. Исклучок од оваа широка поставена поддршка се секторот производство или трговија на алкохолни пријалоци, освен на пиво и вино, производство или трговија со тутун,  како и дејности поврзани со коцкање, казина и еквивалентни претпријатија“, истакна министерката.

Таа посочи дека задачата на Владата и Министерството е да овозможат фер услови за сите компании, односно како што рече, средствата ќе бидат доделени транспареноста и дека секоја компанија ќе има еднакви можности и исти услови за нивно користиење.  

„Поддршката што ја обезбедуваме со оваа кредитна линија ќе поттикне инвестициски циклус од над 250 милиони евра, кој  е дел од нашиот нов концепт за економски раст заснован на инвестиции со кој се влијае и на подобрување на продуктивноста на компаниите, предизвик кој беше нотиран во минатиот период. Тоа е бенефитот што го очекуваме од оваа мерка за која Владата вложи навистина големи напори со цел средсвтата да бидат достапни за компаниите по навистина поволни услови“, порача министерката за финансии.

Првата и единствена македонска стриминг платформа „Глеј“ (GLEY) се подготвува да излезе на берза. Акционерското друштво „СВОД МАСТЕР“, коe управува со стриминг платформата, на Собранието на 22 јануари 2025 година, донесе одлука да емитува иницијална јавна понуда на акции (IPO) преку Македонска берза. Ова ќе биде и првата IPO на домашната берза од компанија, која преку постојано унапредување и развој на дигиталните услуги, ја задржува својата висока конкурентност на пазар кој глобално бележи раст.

Растот на стриминг платформите во светот е рапиден, како и нивниот развој со нови решенија со што постојано привлекуваат нови инвестиции. Излегувањето на GLEY на берзата претставува можност за поддршка на првата и единствена македонска платформа која постојано иновира и покажува растечки потенцијал. Процесот за подготовка на друштвото за котирање на Берзата почна во текот на 2024 година со трансформација на „СВОД МАСТЕРДОО “ во акционерско друштво.

„Во изминатите, речиси повеќе од три години, преку континуиран раст успеавме да влеземе во повеќе од 80.000 домови, ја обединивме речиси цела македонска филмска и сериска програмска понуда, понудивме многу детски наслови синхронизирани на мајчин јазик и воспоставивме широка покриеност на уреди преку кои може да се пристапи до програмскиот каталог на GLEY, кој брои над 2600 часови програма. При крајот на минатата година, покрај претплатата, воведовме и пакети со реклами кои носат уште една можност за приход. Имаме одлична соработка со двата големи телекомуникациски оператори како дистрибутивни и продажни канали. Спремни сме за новата фаза, инвестиција во наши оригинали, програми кои ексклузивно ќе бидат достапни кај нас и зајакната набавка на детска и друга странска програма како основа за рапиден раст на претплатниците и приходите. Во потрага за финансиски средства за овој исчекор, повторно следејќи ги светските трендови, се одлучивме за уште еден пионерски чекор – емисија на нови акции, односно докапитализација на берза, нудејќи профитабилни проекти и дополнителна вредност за идните акционери, со стабилна основа за долгогодишен успех. Со ова ќе се зацврсти и лидерската позиција на GLEY во зачувување на македонската култура и јазик во дигиталниот свет“, вели Дарко Перушески, извршен директор на „СВОД МАСТЕР АД“.

Севкупниот развој и инвестиции во технологијата, придонесе бројот на корисници на GLEY во 2024 да се зголеми за над 30% во однос на 2023 година, додека во истиот период растот на приходите од претплата изнесува над 20%. Просечно до сервисот пристапуваат над 20.000 корисници месечно а само лани сервисот го користеле над 70 илјади корисници.

Компанијата очекува приходите да продолжат да растат и во 2025 година, благодарение на новите кориснички пакети, маркетинг понудата до огласувачите и развојот на проекти со партнерските телекомуникациски оператори.

GLEY е достапна на сите паметни уреди поврзани на Интернет – ТВ приемници, мобилни телефони, таблети и компјутери. Од аспект на корисничко искуство сервисот обезбедува современ интерфејс кој е лесен за користење и кој постојано се подобрува. Паралелно, платформата се постави и како чувар на македонскиот јазик со превод на целата програма на мајчин јазик со што придонесува да се зачува јазичното богатство,особено меѓу младите генерации. Компанијата инвестира во превод и сихронизација на целата детска програма на македонски и на албански јазик.

Континуираното инвестирање во платформата овозможи да ги следи светските трендови на воведување реклами во одредени пакети. Во двата претплатнички пакети  „Глеј слободно“ (GLEY Free) и „Глеј основен“ (GLEY Basic), Друштвото почна да емитува реклами од огласувачи, кои добија шанса да пристапат до корисниците на нов начин. Притоа, корисниците добија бесплатен пристап до дел од програмата, која е достапна со претплата од само 166 денари месечно. Секако, тука е и пакетот „Глеј Премиум“ (Gley Premium) во кој корисниците може да пристапуваат до целата програма без реклами.

Партнерството со Македонски Телеком и А1 Македонија, како и соработки со други кабловски и телекомуникациски оператори, е дел од редовното деловно работење на GLEY. Со нив континуирано се реализираат проекти кои го прават GLEY технички и финансиски подостапен за нивните корисници.

Македонската стриминг револуција почна во ноември 2021 година, кога Друштвото официјално ја лансираше платформата GLEY. На домашниот пазар се позиционираше како партнер за развој на домашната продукција преку соработка со македонските продукциски куќи, нудејќи го најдоброто од домашната продукција, детската едукативна и забавна програма, регионалните хитови и висококвалитетна европска и холивудска продукција.

На почетокот на 2025 година вредноста на Биткоин (BTC) е 100.000 долари и тоа не е ништо ново. Она што пред само неколку години изгледаше незамисливо за многумина, денес е нормално, па дури и тривијално. Ова е моделот што го гледаме низ кратката историја на криптовалутите: невозможно вчера, очекувано или дури и разочарувачко денес.

„Една од карактеристиките на моменталниот растечки консензус околу криптовалутите е тоа што освојувањето на целта и постигнување вредност од 100.000 долари, заедно со значајниот напредок на индустријата во 2024 година што го направија тоа можно, беше толку моќно и возбудливо што за некои изгледа како да нема ништо повеќе што треба да се постигне“, според Ричард Тенг извршниот директор на Binance.

Според Тенг крипто индустријата во 2024 година направи неверојатен напредок за краток период, наспроти претходниот скептицизам за потенцијалот и моќта на блокчејн-технологијата. Една од најштетните последици на овој став е перцепцијата дека е предоцна за да се влезе во крипто.

„Да, BTC со вредност од 100.000 долари е новата нормала, но што следува? 300.000? 500.000? Еден милион? Невозможно!“ – според Тенг тоа е ставот на кој често наидува во разговорите со корисниците, а особено со оние кои сè уште не влегле во крипто просторот.

„За оние кои сè уште не се вклучени, ова создава чувство дека врвот веќе поминал. Зошто да се трудат, ако најдобрите можности се зад нас? Овој начин на размислување обесхрабрува истражување и води кон пропуштени шанси“, според Тенг.

Ова не се однесува само на цените на BTC, во освртот Тенг го зема Биткоин како корисен показател за напредокот на дигиталните средства и прифаќањето на блокчејн-технологијата. Пропуштените можности одат многу подалеку од пазарните добивки. Тие опфаќаат иновации и трансформации кои го менуваат начинот на работење на индустриите и ги подобруваат животите ширум светот.

„Сè уште сме во раните фази. Ако не сте дел од ова движење, сега е вистинското време да се приклучите. Можеби е тешко да се замисли следниот бран на експлозивен раст, но подетален поглед на тоа што се случува на теренот открива дека моментумот на индустријата од 2024 година само се забрзува во 2025 година – во масовното и институционално прифаќање, пазарните иновации и создавањето реална вредност“, истакнува Ричард Тенг.

Последните случувања во крипто индустријата како најавата за национална стратегиска резерва на Биткоин или одекот од создавањето на мемекоините $TRUMP и $MELANIA пред инаугурацијата на Доналд Трамп се доказ за способноста на криптовалутите да влијаат на социјалните, културните, па дури и политичките трендови на начини кои никогаш не сме можеле да ги замислиме.

„Растечкото прифаќање на криптовалутите на Вол Стрит сега оди многу подалеку од спот ETF-ите кои ги доминираа насловите во 2024 година. Производи за животно осигурување деноминирани во BTC, хибридни фондови за крипто и недвижности, како и големи управители на средства како BlackRock кои ги интегрираат Bitcoin ETF-ите во своите фондови фокусирани на приходи, ги вградуваат дигиталните средства сè подлабоко во глобалниот финансиски систем. Потоа, тука е неискористениот потенцијал за усвојување на криптовалутите. Во моментот, околу 700 милиони луѓе ширум светот се занимаваат со крипто – само дел од светската популација. Но, бројот на оние чии животи би можеле да се подобрат со дигиталните средства е во милијарди. Растечката свесност, подобрените кориснички интерфејси и отстранувањето на техничката комплексност го отвораат патот за поголемо прифаќање“, потенцира Тенг.

Според Тенг идејата дека е предоцна да се влезе во крипто не може да биде попогрешна, затоа што токму раните корисници профитираа од својата визија, но можностите кои претстојат се исто толку значајни. Со оглед на тоа што само мал процент од светската популација е вклучен, постои огромен простор за раст и инклузија.

Binance е посветен токму на олеснување на овој премин за новите корисници. Преку кориснички пријателските интерфејси и финансиските производи дизајнирани да бидат едноставни ги рушат бариерите и осигуруваат секој да може да учествува. Алатките за симулирано тргување на Binance им овозможуваат на корисниците да се запознаат со крипто пазарот без да ризикуваат вистински средства.

Инклузивноста на криптовалутите оди подалеку од финансискиот пристап. Станува збор за овозможување на индивидуи и заедници да преземат контрола врз своите средства, податоци и онлајн идентитети, поканувајќи ги сите да учествуваат во децентрализираната мрежа на иднината. Со намалување на зависноста од традиционалните финансиски системи и интернет платформи, дигиталните средства создаваат нови патишта за можности и зајакнување.

Зборувајќи за улогата на Binance Ричард Тенг потенцира дека фокусот останува на поттикнување на глобалното прифаќање и создавање алатки кои ќе ја направат криптовалутата подостапна за секого. Од создавање решенија кои лесно се прилагодуваат и прошируваат за финансиска инклузија до градење динамичен екосистем на Web3. Исто така ја нагласи важноста на соработката со носителите на политики за воспоставување регулативи кои овозможуваат напредок или за поддршка на иницијативи на локално ниво кои го покажуваат реалниот импакт на криптовалутите.

„Binance е тука да предводи и да ги поттикне корисниците. Во 2025 година, нашиот фокус ќе остане на поттикнување на глобалното прифаќање и создавање алатки кои ги прават криптовалутите достапни за секого. Нашата цел е да осигуриме дека растот на индустријата ќе биде во корист на што поголем број луѓе. Приказната за криптовалутите штотуку почнува да се пишува. Огромниот потенцијал на дигиталните средства да ги трансформираат животите и да ги преобликуваат индустриите само што почнува да се реализира. Ако досега бевте настрана, сега е вистинското време да истражите што нуди оваа технологија“, заклучи Тенг.