Цената на златото забележа пад, под притисок од зајакнувањето на американскиот долар и зголемената неизвесност на пазарите по неуспехот на мировните преговори меѓу САД и Иран.

Спот цената на златото падна за 0,8%, достигнувајќи цена од 4.711,24 долари за унца, додека фјучерсите во САД се намалија за 1,1% на 4.733,40 долари, откако претходно во сесијата беа забележани најниски нивоа од почетокот на април.

Зајакнатиот американски долар дополнително ги зголеми трошоците за инвеститорите кои купуваат злато во други валути, вршејќи дополнителен притисок врз цената на благородниот метал.

Пазарните движења доаѓаат во услови на зголемена геополитичка неизвесност, по ескалацијата на тензиите на Блискиот Исток и најавите за ограничување на бродскиот сообраќај кон иранските пристаништа. Во меѓувреме, цените на нафтата надминаа 100 долари за барел, што дополнително ги зголеми инфлаторните очекувања и ја намали веројатноста за брзо намалување на каматните стапки од страна на Федералните резерви на САД.

Според пазарните проценки, шансите за намалување на каматните стапки до крајот на годината паднале на околу 21%, наспроти 40% пред еден месец, што дополнително ја намалува атрактивноста на златото како средство без принос.

И покрај краткорочниот пад, дел од аналитичарите оценуваат дека намаленото шпекулативно позиционирање може да создаде основа за стабилизација на пазарот во наредниот период.

На пазарите на другите благородни метали, среброто падна за 2,5%, платината за 0,8%, додека паладиумот забележа раст од 1,1%.

Цените на нафтата повторно забележаа силен раст и ја надминаа психолошката граница од 100 долари за барел, по нова ескалација на геополитичките тензии на Блискиот Исток и прекин на дипломатските разговори меѓу САД и Иран.

На лондонскиот пазар, Брент нафтата порасна за над 7% и достигна 102,15 долари за барел, додека американската „WTI“ нафта се зголеми за повеќе од 8,5% на 104,90 долари, според пазарните податоци.

Растот следува по најавата на американската Централна команда (CENTCOM) за блокада на пристапот до иранските пристаништа, мерка која дополнително ги зголеми стравувањата од нарушување на глобалните енергетски текови. Според најавите, ограничувањата ќе се однесуваат на сите бродови што влегуваат или излегуваат од иранските пристаништа во Персискиот и Оманскиот Залив.

Во меѓувреме, неуспехот на мировните преговори меѓу Вашингтон и Техеран дополнително ја засили неизвесноста на пазарите, при што инвеститорите стравуваат од долгорочни прекини во снабдувањето со нафта од еден од клучните енергетски региони во светот.

Само неколку дена претходно, пазарот беше во спротивен тренд, со пад на цените по најавите за привремено примирје, што дополнително ја нагласува високата волатилност и чувствителноста на енергетските пазари на геополитички ризици.

Ормускиот теснец и понатаму останува клучна точка на глобалната енергетска безбедност, а секое нарушување на неговото функционирање директно влијае врз цените на нафтата.

Аналитичарите предупредуваат дека доколку тензиите продолжат, цените би можеле да го продолжат нагорниот тренд, со потенцијални последици врз инфлацијата, транспортните трошоци и глобалниот економски раст.

„Кредибилните и конзистентни макроекономски политики се поддршка за стабилноста на девизниот курс на денарот и се фактори за одржување на кредитниот рејтинг на нашата земја“. Ова се посочува во најновиот извештај на Агенцијата за кредитен рејтинг „Фич“, во кој рејтингот на земјава повторно е потврден на нивото „ББ+“.

Во извештајот се посочува дека измените што ги направи Народната банка во декември минатата година, во однос на промената на монетарната рамка, ќе придонесат за поефикасно пренесување на монетарните сигнали.

Во извештајот на Агенцијата за кредитен рејтинг „Фич“ се наведува дека девизните резерви, во јануари 2026 година, се зголемиле за речиси 14% на месечно ниво и се доволни за да покријат околу 5,1 месец од обврските за плаќања кон странство. „Фич“ оценува дека нивото на девизните резерви е соодветно за одржување на стабилноста на домашната валута.

Агенцијата посочува дека инфлацијата покажа тренд на намалување на почетокот на 2026 година. За наредниот период се очекува дека таа ќе се задржи на умерено ниво, со привремено благо зголемување под влијание на светските фактори, а потоа повторно ќе се стабилизира во 2027 година, како резултат на кредибилните и конзистентни макроекономски политики.