Халкбанк АД Скопје ја известува јавноста дека пензиите за февруари 2026 година се веќе достапни за подигање.

Пензионерите можат да ги примат средствата на своите трансакциски сметки во сите филијали на Банката, преку банкомати, како и електронско и мобилно банкарство.

За корисниците кои дале согласност, подигањето на пензиите е можно и преку поштенските единици на Пошта на Северна Македонија.

Народната банка ја информира јавноста дека од 1 март 2026 година стапува во сила законската обврска за банките за вршење засилена автентикација на клиентите при извршувањето онлајн плаќања со платежни картички. Засилената автентикација има за цел да обезбеди заштита на паричните средства на граѓаните и на компаниите кај банките преку дополнителни сигурносни проверки на идентитетот на лицето при извршувањето на плаќањата без физичко присуство.

Имајќи предвид дека граѓаните и компаниите имаат сѐ поголема потреба за извршување секојдневни онлајн купопродажби, а со тоа и плаќања преку интернет, заради нивната брзина и практичност, се зголемува и потребата од повисоко ниво на безбедност. Дигиталните напади и обидите за злоупотреба на податоците од картичките стануваат сѐ почести, па затоа се воведува дополнителна проверка на идентитетот на лицето кое го врши плаќањето.

Засилената автентикацијаму овозможува на клиентот на банката, при плаќање на интернет, покрај внесувањето на податоците од картичката, да даде дополнителна потврда за трансакцијата преку официјална апликација на банката, којашто се инсталира на мобилен телефон и му овозможува безбедно да ги следи своите сметки и да одобрува плаќања. Наместо досегашната потврда со СМС-код, клиентот ќе добие известување преку мобилната банкарска апликација и ќе треба да ја одобри трансакцијата. Потврдата се врши со ПИН за апликацијата, отпечаток од прст или препознавање на лице. Без оваа потврда, плаќањето нема да може да се изврши, дури и ако некој ги има податоците од картичката.

Засилената автентикација како законска обврска за давателите на платежни услуги произлегува од Законот за платежни услуги и платни системи. Таа се воведува постепено во земјава и веќе е во примена при извршувањето онлајн увид во платежните сметки од страна на клиентите, како и при извршувањето плаќања со платежни картички на физичките продажни места или со платни налози преку електронското или мобилното банкарство. Со примената на засилената автентикација и при извршувањето на плаќањата преку интернет, од 1 март 2026 година, се заокружува процесот на усогласување со правилата и стандардите што се применуваат во Европската Унија за безбедно извршување онлајн плаќања.

Со оваа промена се зајакнува довербата во дигиталните плаќања и се унапредува заштитата на корисниците.

УНИБанка во 2025 година оствари позитивни финансиски резултати преку реализација на низа активности поврзани со зголемување и подобрување на понудата за клиентите со нови атрактивни продукти.

Најновите изгледи за светската активност покажуваат одредена отпорност и приспособливост на промените во трговските политики, поддржана од сѐ поголемите инвестиции во развој на технологијата, од фискалната и монетарната политика и приспособливите финансиски услови. Главните активности и натаму се насочени кон намалувањето на трговските тензии и политичката неизвесност, справувањето со финансиските ризици, фискалната одржливост и спроведувањето реформи за зајакнување на продуктивноста. Mакроекономските показатели за домашната економија упатуваат дека остварувањата во најважните сегменти од економијата се во согласност со очекувањата. Домашната инфлација очекувано забави во четвртото тримесечје, главно под влијание на забавувањето на растот кај базичната инфлација. Домашната економска активност умерено забрзува, согласно очекувањата од последните проекции за засилен економски раст во 2025 година. Економските услови и натаму се неизвесни, односно ризиците поврзани со надворешното окружување сѐ уште се изразени, а внимателно се следат и домашните фактори коишто влијаат врз побарувачката и ценовната динамика.

Во вакви економски услови на делување, банката е максимално и високо професионално посветена на барањата и потребите на клиентите за полесен, побрз и поедноставен пристап до банкарските продукти, а истовремено активно воведува нови иновативни продукти коишто уште повеќе ќе ги задоволат интересите и потребите на клиентите.

Остварени приходи

Остварените вкупни приходи од работење во 2025 година изнесуваат 2.429,5 милиони денари  и во однос на истиот период од минатата година бележат зголемување од  3.2%.

Најголем придонес во остварувањето на  позитивен финансиски резултат во износ од 492,5 милиони денари имаат приходите од камати како најзначаен елемент на банкарските приходи.

Имено, во структурата на вкупните приходи (приходи од камати, приходи од провизии и надомести, нето-приходи/расходи од курсни разлики и останати приходи од дејноста), најголемо учество од 65.1% имаат приходите од камати, кои во споредба со истиот период  од 2024 година се зголемени за 3.3%, а анализата на секторската структура на приходите од камати покажува поголема ориентација на банката кон кредитирање на секторот население.

Остварени расходи

Остварените расходи во 2025 година изнесуваат 1.937 милиони денари и бележат зголемување од 3.6% во однос на истиот период од 2024 година. Зголемувањето на расходите се должи, пред се зголемувањето на расходите за камати, провизии и трошоците за вработени.

Погледот кон 2026 година е насочен кон раст на дигиталните услуги, мобилните плаќања, усовршување на персонализираното корисничко искуство и инвестирање во зелените и ЕСГ-проекти, со цел да се зголеми задоволството на клиентите и да се обезбеди долгорочна одржливост.