Управата за финансиска полиција до Основното јавно обвинителство Скопје поднесе кривична пријава против лицето А.А., сопственик и управител на правниот субјект „АРМАН КОМПАНИ ДООЕЛ Скопје“, поради сериозни злоупотреби во врска со даночни обврски во периодот од 2020 до крајот на 2024 година.

Според наодите од истрагата, А.А. свесно и со однапред утврдена намера, со цел да обезбеди противправна имотна корист за себе и компанијата, не ја евидентирал набавената трговска стока – јаткасти производи во вредност од 53.257.786 денари, ниту во сметководствената евиденција ниту како кусок.

Со тоа, избегнал да пресмета, пријави и уплати:

• ДДВ по стапка од 5% во износ од 2.662.889 денари,
• Данок на добивка од 10% во износ од 5.325.778 денари.

Дополнително, пријавениот не ги прикажал како приход застарените обврски кон добавувачи во вредност од 40.903.524 денари, што потекнуваат од 2020 година, со што избегнал обврска за дополнителен данок на добивка од 4.090.352 денари.

Најзагрижувачки е фактот што пријавениот не изготвил и не поднел завршни сметки за 2021, 2022 и 2023 година до Управата за јавни приходи и до Централниот регистар, со што, според Управата, се избегнала уплата на вкупни даночни обврски во износ од 12.079.019 денари по разни основи.

Вкупната затаена даночна обврска што ја утврди Управата за финансиска полиција изнесува околу 200.000 евра.

Овој случај ја истакнува важноста на засилениот надзор и контролата над корпоративното работење, особено кај микро и мали компании кои често оперираат со значителен обем на сива економија. Финансиските институции и регулаторите остануваат фокусирани на почитување на даночната регулатива и правичниот третман на сите пазарни учесници.

Состојбите во економијата, политиките што ги презема Владата и посветеноста во остварувањето на тие политики со цел остварување на планираниот економски раст и стабилизирање на инфлацијата се дел од темите на кои министерката за финансии Гордана Димитриеска-Кочоска ќе разговара на состаноците во Вашингтон, каде што учествува на Пролетните средби на Меѓународниот монетарен фонд и Светската банка.

„Во Вашингтон ќе разговараме со меѓународните финансики институции и инвеститорите за состојбите во економијата. Важно е да одржуваме редовни состаноци, затоа што на почетокот на 2026 година очекуваме издавање еврообврзница од најмалку 700 милиони евра, бидејќи доспева за враќање претходно издадена еврообврзница на износ од 700 милиони евра. Ваквата постојана комуникација со меѓународните институции е важна и за да покажеме дека работиме посветено, што,пак, влијае врз висината на каматата“, рече министерката во интервју за Македонската телевизија.

Таа додаде дека проекцијата за раст на економијата од 3,7% нема да се ревидира, а тоа се темели на она што се работи и дека ова ќе биде презентирано и на состаноците со претставниците од ММФ и Светската банка. Во однос на инфлацијата наведе дека, исто така, се преземаат мерки и дека на среден рок ќе има стабилизирање.

Наведе дека очекува поддршка од Светската банка во однос на спроведување дигитализација на процесите во Министерството за финансии и Управата за јавни приходи, како и од Трезорот на САД преку експертиза за забрзана имплементација на тие процеси.

Како што посочи, тоа ќе помогне во давање побрзи услуги кон бизнисот, за што било разговарано и на средбите со македонските иселеници во Чикаго, кои имаат свои компании во САД, но и во РС Македонија и планираат да ги прошират своите деловни активности.

Во одговор на прашање во врска со исплатата на платата на вработените во институциите од секторот култура, рече дека тоа ќе биде направено во оној момент кога платата ќе биде пресметана согласно закон.

„Уште од првиот ден инсистирам пресметките да ги направат согласно општиот и посебниот колективен договор и во оној момент кога ќе се пресметаат, тие ќе бидат исплатени согласно закон. Инаку, преку Буџетот плата земаат 90000 лица и досега немало проблем. Истите закони важат и за вработените во секторот култура и тие треба да се почитуваат“, рече министерката, додавајќи дека прашањето со исплатата на платите на инспекторатите произлегува од неусогласеност со посебните закони.

На Денот на планетата Земја, децата на вработените во MINT Fintech Group засадија 9 нови магнолии во парк-просторот кај Офицерски дом, во соработка со надлежното општинско претпријатие во Општина Битола.

Ова е третата година по ред како финтек компанијата со седиште во Битола ја реализира оваа еколошка и симболична акција, каде бројот на садници расте заедно со годините на компанијата.

Првите магнолии беа засадени во срцето на градот – кај Градскиот часовник, каде годинава пролетта ги пречека во полн цвет. Минатата година – во новиот парк кај Довлеџик. Оваа година – позади Офицерски.

Секоја магнолија е порака. Порака дека технологијата и природата не се спротивности – туку партнери. Порака дека иновативноста е најсилна кога расте со почит кон корените.

Магнолијата како симбол отсекогаш била присутна во Битола – најпознат пример е
онаа во дворот на историската куќа на семејството Иконому на плоштадот Магнолија. Според народните верувања, магнолијата засадена пред куќа носи мир и задоволство, а позади куќа – финансиски просперитет. Совршена метафора за MINT.

„Нашата цел е оваа мала традиција да прерасне во голема магнолиска приказна за градот – каде секое дрво е жив симбол на одржливост, љубов и технолошка визија со локален пулс“, велат од MINT Fintech Group.

9 магнолии. 9 години. 1 град што расте.