Доларот се намали во среда, откако инвеститорите останаа воздржани поради неизвесноста околу војната меѓу САД и Израел против Иран. Американскиот претседател Доналд Трамп најави можна интервенција, но и потенцијални силни удари кон Иран, што го држи пазарот во неизвесност.

Еврото се зацврсти за 0,18% на 1,163175 долари, оддалечувајќи се од тримесечниот минимум што го достигна во понеделник. Британската фунта беше за 0,25% повисока на 1,3449 долари, а јенот се тргуваше на 158,14 за еден американски долар, близу до седумнеделниот минимум допрен претходно оваа недела.

Индексот на доларот, кој ја мери американската единица во однос на шест други светски водечки валути, се намали на 98,773, недалеку од тримесечниот врв во понеделник.

Клучен фокус на пазарот ќе бидат и американските податоци за инфлацијата за февруари кој ќе бидат објавени во текот на денот. Се очекува да покажат дека основните потрошувачки цени се зголемиле за 0,2% во текот на месецот, додека основните цени се зголемиле за 0,3%, според очекувањата на економистите.

Аналитичарите предупредуваат дека конфликтот може да трае со месеци, а трговците внимателно го следат ризикот. Дополнителен фактор за пазарот е падот на цените на нафтата по најавата на Меѓународната агенција за енергетика за рекордно ослободување на резерви, со цел ублажување на прекините во снабдувањето.

Цените на нафтата денеска забележаа нов пад на светските пазари, по извештаите дека Меѓународната агенција за енергетика (IEA) разгледува најголемо ослободување на стратешки резерви на нафта во својата историја.

Мерката се разгледува како одговор на потенцијалните прекини во снабдувањето поради ескалацијата на конфликтот меѓу САД и Израел со Иран.

Фјучерсите на „Brent“ суровата нафта се намалија за 88 центи, или околу 1%, и се тргуваа по цена од 86,92 долари за барел, додека американската референтна нафта „West Texas Intermediate“ (WTI) падна за 0,4% на 83,1 долари за барел. Пазарот останува силно нестабилен – претходно неделава цената на „WTI“ накратко достигна над 119 долари за барел, највисоко ниво од јуни 2022 година, по што следеше пад од повеќе од 11% во еден ден.

Според информации на „The Wall Street Journal“, предложеното ослободување на резерви би можело да ја надмине количината од 182 милиони барели што земјите-членки на Меѓународната агенција за енергетика (IEA) ја пласираа на пазарот во 2022 година по почетокот на руската инвазија врз Украина.

Аналитичарите на „Goldman Sachs“ проценуваат дека таква интервенција би можела привремено да компензира околу 12 дена од потенцијалниот прекин на извозот на нафта од Персискиот Залив.

Во меѓувреме, геополитичките тензии на Блискиот Исток продолжуваат да ја зголемуваат неизвесноста на пазарите. Воените операции меѓу САД и Израел против Иран, како и ризиците за безбедноста на транспортот во Ормутскиот теснец – клучната светска рута за извоз на нафта нив која поминува речиси 20% од светскиот проток на нафта, остануваат главен фактор што влијае врз движењето на цените.

Истовремено, лидерите на G7 одржаа консултации за можноста за координирано ослободување на итни резерви со цел да се стабилизира енергетскиот пазар. Сепак, дел од аналитичарите остануваат претпазливи, посочувајќи дека клучното прашање не е само обемот на резервите, туку и брзината со која тие можат да се пласираат на пазарот.

Развојот на настаните дополнително ја зголемува неизвесноста на енергетските пазари, каде што цените на нафтата во наредниот период ќе зависат пред сѐ од геополитичките случувања и од евентуалната интервенција со стратешки резерви.

Фјучерсите на американската нафта „WTI“ во вторникот паднаа под 90 долари за барел, откако во претходната трговска сесија достигнаа речиси 120 долари. Падот доаѓа по изјавата на американскиот претседател Доналд Трамп дека конфликтот со Иран можеби се приближува кон крај и дека воената операција на САД се одвива побрзо од првично планираното.

Трамп, исто така, најави дека има намера да ги укине санкциите поврзани со нафтата и дека американската морнарица ќе ги придружува танкерите низ Ормутскиот теснец, со цел да се обезбеди непречен транспорт и да се задржат цените на нафтата под контрола.

Дополнителен притисок врз цените дојде и од изјавата на министрите за финансии на земјите од Г7, кои порачаа дека групата е подготвена да ослободи нафта од стратешките резерви доколку тоа биде неопходно, иако засега не е преземена конкретна мерка.

Цените на нафтата нагло пораснаа во понеделникот, откако големите производители од Блискиот Исток почнаа да го намалуваат производството поради нарушувањата во сообраќајот низ Ормутскиот теснец. Поради сериозните ограничувања на танкерскиот транспорт, неколку клучни производители меѓу кои Саудиска Арабија, Обединетите Арапски Емирати, Кувајт и Ирак почнаа да го ограничуваат производството бидејќи складиштата брзо се полнат.