Компанијата Тетекс донесе одлука за распределба на дивиденда во вкупен износ од 21,6 милиони денари, со што акционерите ќе добијат по 55,56 денари бруто по акција.

Според усвоената одлука на акционерското собрание, дивидендата претставува 1,795 проценти од номиналната вредност на акцијата. Последниот ден за тргување со право на дивиденда е 8 мај, додека од 11 мај акциите ќе се тргуваат без право на исплата. Правото на дивиденда се стекнува на 12 мај, а исплатата ќе се реализира во законски предвидениот рок.

Во одлуката се наведува дека учеството во добивката на извршните директори ќе се пресметува само од делот што останува по издвојувањето на законските и статутарните резерви, во согласност со договорите и важечката регулатива.

Минатата година „Тетекс“ оствари добивка од 66,2 милиони денари. Покрај средствата наменети за дивиденда, околу 3,3 милиони денари ќе бидат издвоени за законски резерви, додека 41,3 милиони денари ќе останат како нераспределена добивка.

Македонски Телеком предложи исплата на повисока дивиденда за 2025 година, во износ од 28,9 денари по акција, што претставува зголемување во однос на минатогодишните 27,6 денари по акција.

Според предлогот, компанијата планира да распредели вкупно околу 2,5 милијарди денари за дивиденда, информираше друштвото преку објава на берза.

За оваа одлука ќе одлучуваат акционерите на редовното собрание закажано за 27 мај.

Од компанијата наведуваат дека растот на дивидендата е поддржан од подобрените финансиски резултати, при што нето-добивката во 2025 година изнесува 2,5 милијарди денари, што е зголемување од 13 проценти на годишно ниво.

Акциите на Македонски Телеком на Македонска берза во средата се тргувале по просечна цена од 500 денари, покажуваат последните достапни податоци.

Од полноќ е намалена цената на течниот нафтен гас, при што литар плин сега се продава по пониска цена за околу 5 денари, односно наместо 59, изнесува 54 денари.

Според информациите од Владата, намалувањето е резултат и на пониските цени во трговијата на големо, каде е забележан пад од 10 денари по килограм, што во малопродажба се пресметува како околу 5 денари по литар.

Ценовниот тренд го следат и другите компании на пазарот, па на бензинските станици цените на плинот веќе се движат меѓу 53 и 54 денари по литар.

Од Владата нагласуваат дека намалувањето не е краткорочен ефект, туку резултат на координирани мерки и анализа на Државниот пазарен инспекторат, по што е постигнат договор со трговците за намалување на бруто маржите.

Целта, како што беше посочено, е да се обезбеди постабилно ниво на цените во наредниот период и да се избегнат нагли осцилации, при што се очекува намалување од над 10 проценти во големопродажба и околу 9 до 10 проценти во малопродажба.

Од институциите велат дека станува збор за мерка со директен ефект врз трошоците на граѓаните, донесена врз основа на детални анализи и во координација со пазарните субјекти.