Речиси 10 милиони луѓе од Европа и пошироко ги споделиле своите ставови за идниот изглед на евро банкнотите преку јавната анкета на Европската централна банка (ЕЦБ).

Вкупно 9,96 милиони лица учествувале во анкетата, што според претседателката на ЕЦБ, Кристин Лагард, покажува голем интерес на Европејците за идниот изглед на банкнотите.

„Овој неверојатен број покажува колкав интерес имаат Европејците за нивните идни банкноти. Со нивното учество во процесот на редизајнирање е направен важен чекор во подготовката на следната серија банкноти“, изјави Лагард.

Во анкетата учествувале околу 2,6 отсто од населението во еврозоната, а интересот бил висок кај сите возрасни групи. Две третини од одговорите биле од лица помлади од 35 години.

ЕЦБ најави дека резултатите ќе бидат анализирани со стандардни статистички методи со цел тие што пореално да ја претстават структурата на населението во еврозоната.

Граѓаните избирале меѓу десет предлози

Анкетата се спроведувала од 23 јули до 21 септември 2026 година и опфаќала десет предлози за дизајн, базирани на две теми – „Европска култура“ и „Реки и птици“.

Паралелно била спроведена и посебна анкета од независна истражувачка компанија, со репрезентативен примерок од населението во еврозоната и со исти прашања. Обработката на тие резултати сè уште е во тек.

Резултатите од двете анкети, заедно со препораките на независното жири за избор на дизајн и техничката проценка, ќе бидат основа за одлуката на Управниот совет на ЕЦБ за конечниот концепт на идните евро банкноти.

Одлуката се очекува кон крајот на 2026 година.

ЕЦБ засега нема да ги објави резултатите за секој поединечен предлог за дизајн. По изборот на конечниот концепт ќе биде објавен детален извештај со мислењата за секој од предлозите, како и резултатите по земји.

Новите евро банкноти се очекуваат во раните 2030-ти

Откако Управниот совет ќе го избере концептот, избраниот дизајн дополнително ќе се приспособува и развива за да може да биде преточен во конечниот изглед на банкнотите.

Новата серија ќе содржи подобрени безбедносни карактеристики, како и унапредувања во поглед на пристапноста и одржливоста.

Според плановите на ЕЦБ, новите банкноти треба постепено да бидат пуштени во оптек од почетокот на 2030-тите години.

Сегашните евро банкноти ќе продолжат да важат и ќе останат во оптек паралелно со новата серија.

Штаермеркише Шпаркасе Групацијата, во чиј состав е и Шпаркасе Банка АД Скопје, ја заврши првата половина од 2026 година со раст на деловната активност и позитивни финансиски резултати.

Во првите шест месеци од годинава, групацијата остварила нето-добивка по оданочување од 270,6 милиони евра, додека оперативниот резултат достигнал 337 милиони евра.

Според објавените податоци, корпоративното кредитирање во овој период е зголемено за 2,1 отсто. Истовремено, забележан е поголем интерес за станбено финансирање, како и значителен раст на приходите од провизии, особено во сегментите на инвестициските услуги и хартиите од вредност.

Вкупната актива на групацијата достигнала 23,9 милијарди евра, додека капиталот изнесувал 4,2 милијарди евра. Од Шпаркасе посочуваат и на стабилниот квалитет на кредитната изложеност, како и на придонесот на банките членки од Југоисточна Европа во вкупните резултати.

Шпаркасе Банка АД Скопје е дел од меѓународната банкарска групација, а од банката оценуваат дека постигнатите резултати ја потврдуваат финансиската стабилност на групацијата и нејзината долгорочна ориентација кон пазарите на кои работи.

Банката најавува дека и натаму ќе биде насочена кон развој на современи финансиски решенија, поддршка на клиентите и активности насочени кон домашната економија и заедницата.

Во Народната банка од 21 до 24 септември се одржа четиридневна работилница посветена на супервизијата над платежните услуги, на која експерти од Хрватската народна банка и претставници на домашната централна банка разменуваа искуства и практики од оваа област.

Работилницата се одржа во рамки на билатералната мерка „Payment Services Supervision“, како дел од Програмата за зајакнување на капацитетите на централните банки во Западен Балкан.

Главниот фокус беше ставен на супервизијата и надзорот над давателите на платежни услуги и издавачите на електронски пари, како и на практичната примена на европската регулаторна рамка.

Меѓу темите за кои се разговарало биле теренската и вонтеренската супервизија, засилената автентикација на корисниците, заштитата на средствата на корисниците, информирањето на корисниците на платежни услуги, како и актуелните регулаторни и супервизорски прашања.

Според Народната банка, размената на конкретни примери и искуства од супервизорската работа треба да придонесе за натамошно унапредување на домашните практики за надзор, особено во услови на брз развој на платежниот сектор и појава на нови платежни услуги и деловни модели.

Соработката со Хрватската народна банка ќе продолжи и во наредниот период преку дополнителни активности за размена на практични знаења и зајакнување на капацитетите во областа на супервизијата над платежните услуги.