Во рамки на одбележувањето на Глобалната недела на парите – Global Money Week 2025, Македонска берза организираше едукативно предавање наменето за ученици од Државниот музичко-балетски училишен центар „Илија Николовски-Луј“ од Скопје.

Преку интерактивна презентација и дискусија, учениците имаа можност да се запознаат со:

• историјата и начинот на функционирање на Македонска берза,

• можностите за финансирање на бизниси преку издавање акции и обврзници,

• основите на инвестирање во хартии од вредност,

• како функционира виртуелната берза како алатка за симулирање на реално тргување.

Оваа активност е дел од глобалната иницијатива за зголемување на финансиската писменост кај децата и младите, која секоја година се одбележува со настани и предавања во над 100 земји.

Од Македонска берза истакнуваат дека финансиската едукација останува нивна стратешка определба и оти преку вакви активности продолжуваат да ја поддржуваат визијата за општество со високо ниво на финансиска свест и знаење.

Еврото продолжува со нагорниот тренд во однос на американскиот долар, достигнувајќи денеска највисока вредност во последните три години. Според податоците од финансиските пазари, европската валута утрово се тргуваше по курс од 1,13556 долари што претставува највисоко ниво од крајот на февруари 2022 година.

На крајот од неделата, еврото би можело да забележи кумулативен раст од околу 3,5% во однос на доларот, што претставува значајно слабеење на американската валута. Главните фактори зад ваквото движење се геополитичките тензии и неодамнешните одлуки на администрацијата на претседателот Доналд Трамп во врска со трговските политики.

Трамп оваа недела објави 90-дневна суспензија на реципрочните царини како дел од иницијативата за нови трговски преговори. Европската унија одговори со сопствена суспензија на царините за американските стоки, но сигналите од Брисел се воздржани.

Францускиот претседател Емануел Макрон го нарече потегот на САД „кревка пауза“, нагласувајќи дека довербата на бизнисите останува под притисок. Истовремено, ЕУ ја потврди својата цврста позиција дека нема да прави отстапки во однос на дигиталната регулаторна рамка како дел од трговскиот договор со САД.

Во вакви услови на неизвесност, доларот сè повеќе губи на вредност, додека инвеститорите го насочуваат вниманието кон поодржливи валутни и инвестициски алтернативи како што е еврото.

Македонската берза АД Скопје изрече мерка јавна опомена за компанијата РЖ Интер-Трансшпед АД Скопје, која е котирана на Официјалниот пазар, подсегмент Берзанска котација, поради ненавремено исполнување на обврските за известување. Опомената е објавена преку интернет страницата на Берзата.

Компанијата не ги објавила неревидираните финансиски извештаи (Биланс на состојба, Биланс на успех, Извештај за парични текови и Извештај за промените во капиталот) за периодот од 01.01 до 31.12.2024 година, во предвидениот рок, најдоцна до 1 март 2025 година.

Со ова, издавачот постапил спротивно на член 40, став 3 од Правилата за котација на Македонската берза.

Овој потег претставува потсетник за сите котирани компании за потребата од доследно почитување на обврските за транспарентност и навремено известување, како клучни елементи за довербата на инвеститорите и стабилноста на пазарот на хартии од вредност.