Во текот на овој месец, НЛБ Банка беше дел од повеќе кариерни иницијативи и настани, насочени кон поврзување со младите и нивните професионални амбиции. Преку директна комуникација со студентите, банката имаше можност да ги слушне нивните идеи, визии и очекувања за иднината.

Активностите се реализираа на неколку високообразовни институции, меѓу кои Интернационалниот Балкански Универзитет, Универзитетот Американ Колеџ Скопје, York Europe Campus – CITY, како и Универзитетот „Гоце Делчев“ во Штип.

Од НЛБ Банка посочуваат дека ваквите средби не се само формални настани, туку простор за инспирација, размена на идеи и градење взаемна доверба. Преку нив, студентите се запознаваат со можностите што ги нуди банката – од практикантство и менторство, до развој на кариера во динамична и мотивирачка работна средина.

Воедно, од банката нагласуваат дека и тие учат од младите – од нивната енергија, љубопитност и подготвеност да размислуваат поинаку.

Овие активности, како што велат, ја потврдуваат важноста од раното поврзување на академското знаење со практичната примена, како клучен чекор во градењето успешни професионални приказни.

НЛБ Банка најавува дека ќе продолжи со инвестиции во младите и нивна поддршка, со цел создавање цврста основа за идните генерации професионалци.

Комерцијална банка во соработка со Visa Inc. организира наградна игра во која корисниците на Visa картички имаат можност да освојат премиум патување во Disneyland Paris.

Наградната игра е во тек и ќе трае до 31 мај 2026 година. Секое плаќање со Visa картичка во овој период автоматски учествува во извлекувањето, при што поголем број трансакции значи и поголеми шанси за добивка.

Главната награда вклучува премиум патување за четири лица во познатиот забавен парк во Париз, една од најпосетуваните туристички атракции во Европа.

Извлекувањето на добитникот е закажано за 3 јуни 2026 година.

Повеќе информации, како и целосните правила за учество, се достапни на веб-страницата на Комерцијална банка.

„Во услови на светски економски предизвици, зголемувањето на учеството на жените на пазарот на труд носи значителни економски и општествени придобивки. Намалувањето на родовите разлики придонесува за поголема иновативност, поефикасно искористување на човечкиот капитал и за намалување на јазот во приходите. Сепак, жените и натаму се соочуваат со предизвици, како што се пониска застапеност на раководните позиции и ограничен пристап до финансиски услуги“, истакна вицегувернерката Ана Митреска во своето обраќање на манифестацијата „Избор на најуспешни жени менаџери“, во организација на агенцијата „Марили“.

Таа посочи дека, во услови на забрзана технолошка трансформација и развој на вештачката интелигенција, неопходни се соодветни политики за заштита и унапредување на родовата еднаквост на пазарот на труд. Според некои процени, околу 75% од работните места на жените се во занимања со висока изложеност на вештачка интелигенција, што укажува на потребата од навремено приспособување и дополнителна поддршка.

„Светскиот извештај за родовиот јаз за 2025 година покажува дека има натамошен напредок кон родова еднаквост, но тој е бавен и со нерамномерно темпо. На светско ниво, родовиот јаз е затворен за околу две третини, а за постигнување целосна еднаквост, со сегашната динамика, ќе бидат потребни уште 123 години. Нашата земја е рангирана на 90-тото место од вкупно 148 земји, додека во делот на економското учество и можности, се наоѓа на 119-тото место. Јазот во платите изнесува околу 12%, а разликата во учеството на пазарот на труд е околу 18 процентни поени во корист на мажите. Во однос на финансиската вклученост, податоците од „Финдекс“ (2024) покажуваат дека 77% од жените и 92% од мажите имаат сметка. Овие разлики упатуваат на родов јаз во финансиската вклученост од околу 10 процентни поени“, посочи Митреска.

Таа нагласи дека Народната банка активно работи на унапредување на финансиската едукација и вклученост, како и на поддршка на женското претприемаштво преку Кодексот за финансирање жени претприемачи.

„Иако учеството на фирмите што се во сопственост на жени во вкупните кредити сè уште е ниско, тие покажуваат висока финансиска дисциплина, со нефункционални кредити од 1,54%, во споредба со 2,76% кај фирмите што се во сопственост на мажи. Во наредниот период, активностите ќе бидат насочени кон проширување на коалицијата, подобрување на податоците и осмислување системски решенија за зголемена финансиска поддршка на жените претприемачи“, истакна Митреска.

На крајот, таа им упати честитки на наградените жени менаџерки, посочувајќи дека нивниот успех претставува инспирација за идните генерации и значаен придонес за развојот на современата економија.