Долгooчекуваната платежна услуга Apple Pay наскоро ќе стане реалност и за корисниците во Македонија. Компанијата Apple веќе споделила насоки и технички упатства со домашните банки, а услугата ќе биде достапна откако институциите ќе ја потврдат својата техничка подготвеност. Според неофицијални информации, стартот се очекува во септември 2025 година.

Ова претставува важен чекор за дигитализацијата на финансискиот сектор во земјава, кој во последните години бележи значителен раст на електронските плаќања и употребата на мобилни паричници.

Apple поставува основа – банките се подготвуваат

Иако Apple Pay сè уште не е официјално активен во Македонија, техничките подготовки се во завршна фаза. Компанијата веќе ги информирала релевантните партнери, вклучувајќи ги дел од водечките банки за потребните предуслови, безбедносни протоколи и начинот на интеграција во нивните системи.

„Со Apple веќе работиме на завршна техничка интеграција. Очекуваме во текот на следните недели да ја финализираме подготовката и да понудиме целосна поддршка за Apple Pay на домашниот пазар“, изјави претставник на една од банките кои активно работат на имплементација.

Што ќе донесе Apple Pay за корисниците?

Apple Pay овозможува брзи, безбедни и бесконтактни плаќања преку iPhone, Apple Watch и останати прифатени уреди. Откако картичката ќе се додаде во Apple Wallet, корисниците ќе можат да вршат плаќања на сите ПОС-терминали кои поддржуваат NFC технологија, без потреба од физичка картичка.

Секоја трансакција е дополнително заштитена со Face ID, Touch ID или лозинка, а податоците за картичката никогаш не се чуваат на уредот, ниту се споделуваат со трговците, што значително го зголемува нивото на безбедност.

Финтек пазарот добива сериозна надградба

Влегувањето на Apple Pay ќе претставува нов импулс за развојот на мобилните плаќања во Македонија, каде што сѐ повеќе корисници бараат дигитални и иновативни решенија. Дополнително, ова ќе поттикне и понатамошна конкуренција меѓу банките и финтек-компаниите, кои ќе се стремат да понудат слични модерни услуги.

Септември 2025 година се профилира како месецот кога оваа долгорочна очекувана услуга конечно ќе им биде достапна на македонските корисници – со што Македонија ќе стане дел од глобалното семејство на земји кои нудат Apple Pay како стандард за бесконтактно и безбедно плаќање.

Иако сè уште нема официјална информација кои банки први ќе го понудат Apple Pay во Македонија, може да се претпостави дека технички подготвените институции ќе бидат меѓу првите. Дел од нив веќе нудат слични дигитални платежни решенија – како Google Pay, Garmin Pay, Halk Pay, Fidesmo Pay и сопствени мобилни паричници. Меѓу нив се вбројуваат Стопанска банка, ПроКредит банка, Халкбанк, НЛБ Банка и Комерцијална банка, кои активно работат на развој на бесконтактни и мобилни услуги, овозможувајќи им на корисниците современо и сигурно искуство при плаќање.

Преземањето на авторски содржини (текстови и фотографии) од оваа страница е строго забрането без претходно писмено одобрение и е предмет на условите наведени на следниот линк.

УНИБанка АД Скопје, следејќи ги потребите на своите клиенти, воведе нова функционалност – трансфер на средства на Visa картичка. Ова е иновативна функционалност Visa+ со која се овозможува трансфер на средства на дебитна картичка во земјата или странство преку мобилен број.

Во услови кога живееме динамично, често патуваме, имаме бројни обврски и секогаш недостиг на време, можноста преку мобилна апликација да направиме брз и лесен трансфер на средства е нешто што би ни било од голема помош.

Со новата функционалност Visa+ можеме преку апликацијата за мобилно банкарство, едноставно и сигурно да испратиме средства до корисници на Visa картички, во земјата и во странство.

Станува збор за најнова функционалност во мобилното банкарство со која УНИБанка само ја потврдува својата позиција на лидер за напредни дигитални банкарски решенија, со кои се олеснува секојдневното функционирање и им се помага на клиентите да го трансформираат и поедностават начинот на кој управуваат со своите средства.

Целта е клиентите да можат да го реализираат трансферот самостојно, поекономично и без дополнителни документи, aкрајниот корисник да го добие вкупниот износ на средства.

Со новата услуга, границите веќе не се пречка, нема потреба од коресподентни банки, префрлувањето пари кон пријатели, семејство или деловни партнери станува полесно од кога било. Без граници, без чекање.

Не се потребни комплицирани податоци – доволни се само телефонскиот број на примачот со регистрирана картичка во Visa+, или бројот на Visa картичка, име презиме и адресана примачот. 

Клучни придобивки од новата услуга:

• Брзина: Трансфер во реално време – средства за само неколку минути;

• Едноставност: Без пополнување на сметки, документи за намена и сл.;

• Безбедност: Заштитена технологија за обработка на трансакции;

• Достапност: Секогаш и секаде преку мобилната апликација;

Со Visa+, Вашиот трансфер на средства е побрз, побезбеден и поедноставен!

За повеќе информации, посетете ја нашата веб-страницаwww.unibank.mk

Во екот на летната сезона и зголемениот број патувања, ПроКредит Банка нуди едноставно, сигурно и флексибилно решение за управување со готовина – уплата и повлекување на евра и денари директно од банкомат, 24/7, без провизија.

Услугата е достапна за сите клиенти на ПроКредит Банка кои поседуваат трансакциска сметка во евра и дебитна картичка MasterCard. Картичката, која е мултивалутна и поврзана со сметки во денари и евра, им овозможува на клиентите директен пристап до средствата во секое време,дури и за време на викенди, празници и неработни денови.

Преку банкоматите на ПроКредит Банка, клиентите можат:

• Да подигнат евра директно од својата девизна сметка

• Да уплатат евра или денари на сопствена трансакциска или штедна сметка

• Да искористат дигитална менувачница преку мобилната апликација, при што прво се извршува размена на валута (од денари во евра или обратно), а потоа следува повлекување на средствата

Сите овие трансакции се реализираат без дополнителни провизии, со максимална брзина и безбедност.

Дополнително, оваа услуга овозможува и напредна дигитална контрола преку мобилната апликација на ПроКредит Банка. Корисниците можат самостојно да ги прилагодуваат дневните лимити за подигнување готовина, со можност за повлекување до 300.000 денари дневно.

Функционалноста за повлекување и уплата во евра и денари е достапна во рамки на 24/7 зоните на ПроКредит Банка, опремени со најсовремените банкомати кои овозможуваат целосно самоуслужно банкарско искуство. 

ПроКредит е единствената банка на нашиот пазар која ја нуди оваа услуга. Со оваа услуга клиентите на банката имаат целосна контрола и флексибилност во управувањето со личните финансии, како и брз, лесен и безбеден пристап до средствата, во секое време и од каде било.

Повеќе информации за услугата се достапни на блогот на ПроКредит Банка.